Read Hmong Daw Yauj 31 Bible Online

Yauj 31 - Hmong Daw bible

Yauj 31

¹“Kuv twv taus rau lub ntuj hais tias, kuv tsis tau ntsia ib tug hluas nkauj twg rau zaj phem li.

²“Vajtswv tus uas muaj hwjchim loj kawg nkaus ua dabtsi rau peb, thiab muab dabtsi pauj tej haujlwm uas peb tibneeg ua?

³Vajtswv tso sub tawg sub ntsha thiab kev puastsuaj rau cov uas ua txhaum.

⁴Vajtswv paub txhua yam uas kuv ua; nws saib ntsoov kuv rho txhua kauj ruam mus kev.

⁵“Kuv twv taus rau lub ntuj hais tias kuv tsis tau ua phem thiab tsis tau dag ntxias leejtwg li.

⁶Cia Vajtswv muab rab teev uas haum txiaj los luj kuv, nws thiaj pom hais tias kuv yog neeg zoo npaum li cas.

⁷Yog hais tias kuv tsis taug txojkev ncaj lossis cia txojkev phem coj kuv mus ua txhaum, yog kuv txhais tes tsis ncaj tsis huv vim muaj txhim,

⁸ces cia kom kuv tej qoobloo puastsuaj mus, lossis thov kom lwm tus tau noj tej qoobloo uas kuv cog.

⁹“Yog hais tias kuv ntshaw luag pojniam, lossis mus nkaum xauj nws qhov tsev,

¹⁰ces cia kom kuv tus pojniam mus ua zaub mov rau luag noj thiab luag nrog nws pw.

¹¹Cov uas ua kev phem kev qias li ntawd, tsimnyog raug txim tuag.

¹²Qhov ntawd yuav zoo ib yam cov hluavtaws leejfaj uas kub txhua tsav yam uas nws muaj tas dulug.

¹³“Thaum kuv cov tubtxib ib tug yws kuv, kuv mloog nws hais thiab ua zoo rau nws.

¹⁴Yog kuv tsis ua li ntawd, kuv yuav ua li cas fim taus Vajtswv? Thaum uas Vajtswv los txiav txim rau kuv, kuv yuav hais li cas rau nws?

¹⁵Tus Vajtswv uas tsim kuv thiab tsim kuv cov tubtxib yog tib tug.

¹⁶“Kuv yeej ibtxwm pab cov neeg pluag, tsis muaj ib zaug uas kuv tsis kam pab li, kuv yeej ibtxwm pab cov pojntsuam thiab tsis tau ua rau lawv tu siab,

¹⁷lossis cia tej menyuam ntsuag tshaib nqhis thaum kuv muaj noj muaj haus.

¹⁸Kuv yeej ibtxwm pab luag los laus li no.

¹⁹“Thaum kuv pom ib tug twg txomnyem uas tsis taus ris tsho hnav,

²⁰kuv muab tej ris tsho uas kuv muab tej plaub yaj ntos rau tus ntawd hnav. Ces nws thiaj ua kuv tsaug thiab nco kuv txiaj ntsig.

²¹Yog kuv tau txhav ib tug menyuam ntsuag twg tug yuav, vim kuv paub hais tias kuv yuav yeej nws hauv tsev tu plaub,

²²ces cia kom kuv ob txhais npab lov; cia kom kuv ob txhais npab pluam ntawm kuv xubpwg mus.

²³Rau qhov kuv ntshai Vajtswv rau txim rau kuv, kuv thiaj tsis ua txhaum li ntawd.

²⁴“Kuv yeej ibtxwm tsis cia siab rau tej nyiaj txiag

²⁵lossis tso siab rau kev npluanuj.

²⁶Kuv yeej tsis tau pe lub hnub uas ci ntsa iab lossis pe lub hli thaum tabtom nra.

²⁷Kuv tsis tau nwj kuv txhais tes hawm tej ntawd kom ua rau kuv yuam kev ib zaug li.

²⁸Tus uas ua txhaum li ntawd tsimnyog raug txim tuag, rau qhov nws saib tsis taus Vajtswv tus uas muaj hwjchim loj kawg nkaus.

²⁹“Thaum kuv cov yeebncuab raug kev txomnyem kuv tsis hnyos lawv, lossis zoo siab thaum lawv raug kev puastsuaj;

³⁰kuv tsis tau ua txhaum uas yog thov Vajtswv kom kuv cov yeebncuab tuag.

³¹Txhua tus tub zog uas ua haujlwm rau kuv hais tias kuv yeej ibtxwm nyiam tiam qhua.

³²Kuv zoo siab hlo caw tej neeg taug kev los so hauv kuv tsev, thiab tsis cia lawv pw ntawm tej kev.

³³“Luag lwm tus pheej npog luag tej kev txhaum, tiamsis kuv yeej tsis npog kuv tej kev txhaum li.

³⁴Kuv yeej ibtxwm tsis ntshai tej uas luag hais kuv; kuv ibtxwm tsis nyob ntsiag to lossis nkaum nkoos hauv tsev, vim ntshai nyob tsam luag txob thuam kuv.

³⁵“Tsis muaj leejtwg yuav mloog kuv tej lus li los? Kuv twv taus rau lub ntuj hais tias txhua lo lus uas kuv hais yog lus tseeb. Cia Vajtswv tus muaj hwjchim loj kawg nkaus teb kuv. “Kheev lam kuv pom tej uas yeebncuab kom kuv ntawd sau rau hauv nruab ntaw,

³⁶kuv yuav muab dai rau ntawm xubpwg, thiab muab ntoo rau saum taubhau ib yam li ntoo kausmom yeebkoob;

³⁷kuv yuav piav txhua yam uas kuv ua qhia rau Vajtswv mloog, thiab kuv yuav muaj plhus ntxiag thaum kuv mus cuag nws.

³⁸“Yog kuv tau txeeb daim teb uas kuv ua no ntawm lwm tus los,

³⁹lossis yog kuv tau mus txhav luag tej qoobloo loj noj, thiab cia tus tswv qoob tshaib plab;

⁴⁰ces cia tej pos thiab nroj tuaj hloov kuv tej qoobloo chaw.” Yauj cov lus xaus li no.