Read Hmong Daw Yauj 32 Bible Online

Yauj 32 - Hmong Daw bible

Yauj 32

¹Rau qhov Yauj hais tias nws tsis muaj txim txhaum dabtsi, peb tug txivneej ntawd thiaj tseg tsis teb Yauj lawm.

²Tiamsis muaj ib tug txivneej npe hu ua Elihus chim heev, nws tswj tsis tau nws txojkev chim rau qhov Yauj hais tias Yauj ua ncaj, tiamsis Vajtswv ua tsis ncaj. (Elihus yog Npalakees tus tub uas yog Npuxes tus xeebntxwv thiab yog xeem Las).

³Elihus chim heev rau Yauj peb tug phoojywg. Vim lawv tsis muaj lus teb Yauj li, qhov ntawd suav hais tias Vajtswv yog tus ua tsis ncaj.

⁴Vim Elihus hluas dua lawv, nws thiaj tos kom lawv hais tas tso.

⁵Thaum Elihus pom hais tias lawv peb leeg ntawd, teb tsis tau Yauj tej lus li, mas nws chim heev.

⁶Npalakees tus tub Elihus uas yog Npuxes tus xeebntxwv thiaj cuab hais nws zaj tuaj; nws teb hais tias: “Kuv yog tus hluas thiab nej yog cov laus lawm, yog li ntawd, kuv thiaj ntshai qhia tej uas kuv xav rau nej mloog.

⁷Kuv xav hais tias, ‘Tsimnyog cia nej hais, nej cov laus tsimnyog sib pab tawm tswvyim.

⁸Tiamsis yog Vajtswv tus uas muaj hwjchim loj kawg nkaus tus ntsujplig los kav neeg lub siab thiab pub tswvyim rau neeg xwb.

⁹Tsis yog hais tias leejtwg laus ces txawm yuav muaj kev txawj ntse, lossis kev laus yuav ua kom lawv paub qhov yog thiab qhov tsis yog.

¹⁰Yog li ntawd, kuv xav kom nej mloog kuv hais; cia kuv hais tej uas kuv xav rau nej mloog.’

¹¹“Kuv ua siab ntev mloog nej hais ntev loo los lawm, thiab tos nej nthuav nej tej kev txawj ntse los hais tso.

¹²Kuv ua tib zoo mloog lawm, nej tsis muaj lus hais; nej tsis muaj ib tug teb tau Yauj tej lus li.

¹³Nej yuav ua li cas hais tau tias nej muaj tswvyim, Vajtswv yuav teb rau Yauj tej uas nej teb tsis tau.

¹⁴Yauj hais rau nej xwb, tsis yog hais rau kuv, tiamsis kuv yuav tsis teb li nej.

¹⁵“Yauj, lawv swb lus lawm, lawv tsis muaj lus teb koj li.

¹⁶Thaum lawv tsis muaj lus hais, txawm yuav cia kuv nyob twjywm thiab los? Lawv sawv ntawd los tsis muaj lus hais li.

¹⁷Tsis tau, nimno kuv yuav tsum teb thiab hais tej uas kuv xav rau koj mloog.

¹⁸Kuv yuav rawm hais kuv tej lus; kuv ua tsis taus siab ntev lawm.

¹⁹Yog tsis muaj sijhawm rau kuv hais lus, kuv tej lus yuav phwj ib yam li cov cawv txiv hmab tshiab uas phwj tawm hauv lub hnab tuaj.

²⁰Kuv yuav tsum hais kuv lub siab thiaj nqig.

²¹Qhov uas kuv cav no tsis yog kuv yuav xav tuaj leejtwg tog lossis tsis yog kuv qhuas ib tug twg.

²²Kuv tsis lam ua txuj qhuas ib tug twg, yog kuv ua li ntawd Vajtswv yuav rau txim rau kuv.”