Read Hmong Daw Yauj 33 Bible Online

Yauj 33 - Hmong Daw bible

Yauj 33

¹Yauj, koj ua tib zoo mloog tej lus uas kuv yuav hais rau koj.

²Kuv yuav hais tej uas kuv twb xav tseg lawm rau koj mloog.

³Tej lus uas kuv hais yog los ntawm lub siab pheejxeeb, thiab kuv hais tej lus tseeb xwb.

⁴Vajtswv tus ntsujplig tsim kuv thiab pub txojsia rau kuv.

⁵Yog koj teb tau, cia li teb kuv tej lus thiab npaj nrog kuv sib cav.

⁶Koj thiab kuv zoo ib yam nkaus tabmeeg Vajtswv, wb ob leeg puavleej yog muab av puab.

⁷Yog li ntawd, tsis tas koj yuav ntshai kuv; kuv yuav tsis hais hnyav rau koj.

⁸Tej no yog tej lus uas kuv hnov koj hais:

⁹“Kuv tsis muaj txim; kuv tsis tau ua txhaum dabtsi. Kuv ncaj ncees thiab tsis muaj txim.

¹⁰Tiamsis yog Vajtswv nrhiav lus tawmtsam kuv, thiab ua rau kuv ib yam li ua rau tus yeebncuab.

¹¹Vajtswv muab saw hlau khi kuv kotaw; nws saib ntsoov kuv tshais txhua kauj ruam.”

¹²Yauj, cia kuv qhia koj, koj yeej ua tsis yog lawm. Vajtswv muaj hwjchim loj dua neeg.

¹³Ua li cas koj liam hais tias Vajtswv tsis teb koj tej lus yws?

¹⁴Txawm yog Vajtswv hais tas hais thiab los tsis muaj leejtwg quavntsej nws tej lus li.

¹⁵Thaum tsaus ntuj uas neeg pw tsaug zog, Vajtswv hais rau neeg hauv nruab npau suav thiab ua rau neeg ua yogtoog pom.

¹⁶Vajtswv ua kom neeg mloog Vajtswv tej lus, thiab kom lawv hwm Vajtswv tej lus ntuas.

¹⁷Vajtswv hais kom neeg tso lawv tej kev txhaum tseg thiab cawm lawv dim ntawm txojkev uas ua neeg khavtheeb.

¹⁸Vajtswv tsis xav kom neeg raug kev puastsuaj; Vajtswv cawm kom neeg dim ntawm txojkev tuag.

¹⁹Vajtswv ntuas neeg los ntawm tej kab mob kev nkeeg uas ua rau nws lub cev mob lwj ntsuav.

²⁰Tus neeg muaj mob, nws yeej tsis qab los, txawm yog zaub mov qab npaum twg los nws dhuav kawg li.

²¹Nws lub cev yuag zuj zus tsis tshuav dabtsi li; ua rau koj pom nws tej pobtxha nyob zoj;

²²nws twb yuav mus rau hauv tubtuag teb.

²³Tej zaum kuj muaj ib tug timtswv los pab nws, yog ib tug ntawm Vajtswv ib txhiab tus timtswv uas los qhia kom neeg paub txojkev ncaj ncees.

²⁴Vim txojkev hlub, tus timtswv ntawd hais tias, “Cia li tso nws! Nws tsis yog tus uas yuav mus rau hauv tubtuag teb. Ntawm no yog qhov uas txhiv nws.”

²⁵Nws lub cev yuav rov puv mos nyoos thiab muaj zog tuaj;

²⁶thaum nws thov, Vajtswv yuav teb nws tej lus; nws yuav pehawm Vajtswv ntawm lub siab xyivfab hlo; Vajtswv yuav pauj tej uas nws ua ncaj ua ncees rov rau nws.

²⁷Nws yuav hais tabmeeg rau sawvdaws tias, “Kuv tau ua txhaum lawm tiag. Kuv yeej ua tsis ncaj tiamsis yog Vajtswv tshwj kuv xwb.

²⁸Vajtswv tsis cia kuv mus rau hauv tubtuag teb, kuv thiaj tseem muaj sia nyob.”

²⁹Vajtswv ua txua yam no, nws ua tas los ua thiab;

³⁰Vajtswv cawm neeg txojsia thiab pub kom neeg muaj kev kaj siab.

³¹Yauj, nimno koj cia li mloog kuv tej lus thiab nyob twjywm cia kuv hais.

³²Tiamsis yog koj muaj dabtsi cia li hais rau kuv; yog koj hais yog lawm, kuv txaus siab yuav li koj hais.

³³Tiamsis yog koj hais tsis yog, ces koj nyob twjywm mloog kuv hais, thiab kuv yuav qhia kom koj ua tau neeg ntse.