Read Hmong Daw Yauj 34 Bible Online

Yauj 34 - Hmong Daw bible

Yauj 34

¹Elihus hais ntxiv tias: “Nej cov uas yog neeg txawj ntse, nimno nej cia li mloog tej uas kuv yuav hais.

³Thaum nej noj, nej thiaj paub hais tias zaub mov qab, tiamsis thaum nej hnov luag tej lus, nej ho tsis ntse.

⁴Cia peb xaiv saib qhov twg yog qhov zoo; cia peb txiav txim siab saib qhov twg yog qhov yog.

⁵Yauj khav hais tias nws tsis muaj txim txhaum dabtsi, tsuas yog Vajtswv thiaj tsis lees hais tias, Yauj yog neeg ncaj ncees xwb;

⁶Yauj nug hais tias, ‘Kuv yuav ua li cas dag hais tias kuv ua txhaum? Kuv muaj mob kho tsis tau, tiamsis tsis yog vim kuv ua txhaum.’

⁷“Nej puas tau pom dua ib tug neeg zoo li Yauj? Nws yeej tsis hwm Vajtswv li.

⁸Nws nyiam ua phoojywg nrog cov neeg ua phem ua qias thiab mus koom nrog cov neeg txhaum xwb.

⁹Nws hais tias qhov uas ua raws li Vajtswv siab nyiam tsis muaj qabhau dabtsi li.

¹⁰“Nej cov uas yog neeg paub tab, nej cia li mloog kuv hais! Vajtswv tus uas muaj hwjchim loj kawg nkaus puas ua txhaum?

¹¹Nws yuav muab nqi zog rau neeg raws li tes haujlwm uas lawv ua, thiab ua zoo rau lawv kom tsimnyog qhov uas lawv tau.

¹²Vajtswv tus uas muaj hwjchim loj kawg nkaus yeej tsis ua txhaum li; nws ibtxwm ua ncaj rau sawvdaws.

¹³Puas muaj leejtwg muab hwjchim rau Vajtswv? Puas muaj leejtwg tsa Vajtswv kav lub ntiajteb?

¹⁴Yog Vajtswv rho neeg txojsia lawm,

¹⁵ces txhua tus uas muaj sia yuav tuag rov mus ua av dua.

¹⁶“Yog hais tias nej yog neeg ntse, nimno nej cia li mloog kuv hais.

¹⁷Nej tseem yuav rau txim rau Vajtswv tus uas ncaj ncees thiab los? Nej xav hais tias Vajtswv ntxub kev ncaj ncees no los?

¹⁸Vajtswv rau txim rau cov vajntxwv thiab cov nomtswv thaum lawv ua phem ua qias lossis ua tsis ncaj.

¹⁹Vajtswv tsis tuaj cov nomtswv tog lossis tsis saib cov npluanuj tseemceeb dua cov pluag. Rau qhov txhua tus puavleej yog Vajtswv tsim.

²⁰Hmo ntuj tej neeg cia li tuag twjywm lawm. Vajtswv ua tau kom neeg tuag thiab puastsuaj mus; tej neeg uas muaj zog los Vajtswv ua kom tuag yoojyim heev.

²¹Vajtswv saib ntsoov txhua tus neeg tshais ruam mus kev.

²²Tsis muaj ib qhov tsaus ntuj uas thaiv tau kom Vajtswv tsis pom tus neeg txhaum li.

²³Vajtswv tsis tau teem ib lub sijhawm rau neeg mus rau Vajtswv txiav txim.

²⁴Vajtswv muab ib co thawjcoj rho thiab muab ib co los hloov tsis tas yuav taug lawv lub neej li.

²⁵Rau qhov Vajtswv yeej paub tej uas lawv ua huv tibsi lawm; thaum tsaus ntuj nws muab lawv ntsawm thiab tsuj ntiag tseg.

²⁶Vajtswv rau txim rau cov neeg txhaum rau sawvdaws saib ntsoov,

²⁷rau qhov lawv tso nws tseg thiab tsis quavntsej nws tej lus samhwm.

²⁸Lawv quab yuam tej neeg pluag, ua rau cov neeg pluag lub suab quaj mus txog Vajtswv, thiab Vajtswv hnov lawv lub suab quaj thov pab.

²⁹“Yog Vajtswv txiav txim siab tsis ua ib yam dabtsi los yeej tsis muaj leejtwg thuam tau nws li. Yog Vajtswv khiav nkaum lawm, yeej tsis muaj leejtwg nrhiav tau tsis hais ib tug twg lossis ib haivneeg twg li.

³⁰Ntau haivneeg ua tsis tau ib yam dabtsi rau cov neeg ua phem ua qias kom tsis txhob tswjhwm lawv.

³¹“Yauj, koj puas lees koj tej kev txhaum rau Vajtswv, thiab coglus hais tias koj yuav tsis ua ntxiv lawm?

³²Koj puas tau thov Vajtswv qhia koj tej kev txhaum rau koj, thiab koj puas txaus siab tso koj tej kev phem kev qias tseg?

³³Rau qhov koj tsis lees paub tej uas Vajtswv ua, koj yuav ua li cas kom Vajtswv ua raws li koj xav tau? Koj yog tus txiav txim siab tsis yog kuv; cia li qhia tej uas koj xav rau kuv.

³⁴“Tus neeg uas thoob tsib to nrog yeej mloog kuv hais, tus neeg muaj tswvyim uas hnov kuv hais yuav hais tias

³⁵tej lus uas Yauj hais tsis yog lus txawj ntse, thiab tej uas nws hais tsis muaj qabhau dabtsi.

³⁶Nej ua tib zoo mloog tej uas Yauj hais; nej yuav pom hais tias nws hais li tus neeg siab phem hais.

³⁷Yauj ntxeev siab tsub ntxiv rau nws tej kev txhaum; nws ua saib tsis taus Vajtswv tabmeeg peb.”