Read Hmong Daw Yauj 36 Bible Online

Yauj 36 - Hmong Daw bible

Yauj 36

¹Elihus hais ntxiv tias: “Koj ua siab ntev mloog kuv hais, tej lus no yog kuv sawv cev Vajtswv hais rau koj.

³Kuv muaj kev txawj ntse heev; kuv yuav qhia rau koj raws li kuv paub hais tias Vajtswv tus uas tsim kuv, nws yog tus ncaj ncees.

⁴Tej lus uas kuv hais rau koj tsis yog lus cuav; tus uas nyob ntawm koj hauv ntej no yog ib tug neeg ncaj thiab ntse heev.

⁵“Vajtswv yog tus muaj zog loj zog nchav! Nws tsis xaiv leejtwg ntsejmuag; tsis muaj ib yam uas Vajtswv tsis paub li.

⁶Vajtswv tsis pub tus neeg txhaum ua neej nyob, tiamsis nws ua ncaj rau tus neeg txomnyem.

⁷Vajtswv tsomkwm cov neeg ncaj ncees; nws cia lawv kav lwm tus ib yam li tej vajntxwv, thiab cia luag hwm lawv mus ibtxhis.

⁸Tiamsis qhov uas lawv raug luag cuab luag khi thiab raug txomnyem yog vim tej uas lawv ua,

⁹Vajtswv thiaj qhia lawv tej kev txhaum thiab lawv tej kev khavtheeb rau lawv.

¹⁰Vajtswv ua rau lawv mloog Vajtswv tej lus ntuas, thiab tso lawv tej kev phem kev qias tseg.

¹¹Yog lawv mloog Vajtswv lus thiab pehawm nws, lawv lub neej yuav vammeej thiab nyob kaj siab lug.

¹²Tiamsis yog lawv tsis mloog Vajtswv lus, lawv yuav tuag rau hniav ntaj hniav riam vim lawv tsis quavntsej Vajtswv.

¹³“Cov neeg uas tsis hwm Vajtswv, lawv tsuas npautaws tas mus li xwb, txawm yog thaum lawv raug txim los lawv tsis thov Vajtswv li.

¹⁴Lawv tuag tas rau thaum lawv tseem hluas, lawv lub neej puastsuaj tas txajmuag ntsuav.

¹⁵Tiamsis Vajtswv cia kev txomnyem los qhia neeg ua neej, thiab siv txojkev ntxhov siab los qhib neeg lub qhovmuag.

¹⁶“Vajtswv tso koj dim kev nyuaj siab, thiab pub kom koj nyob tso siab lug; saum koj lub rooj muaj zaub mov nplua mias.

¹⁷Tiamsis nimno tsimnyog koj raug txim raws li tej uas koj ua.

¹⁸Ceevfaj tsis txhob cia luag tej nyiaj xiab ntxias tau koj, lossis tsis txhob cia kev npluanuj coj koj mus yuam kev.

¹⁹Tej nyiaj xiab ntawd yuav tsis pab koj thaum koj thov kev pab; txawm yog koj siv tagnrho koj lub zog los pab tsis tau koj dim.

²⁰Tsis txhob tos hais tias muaj ib hmos txhua haivneeg yuav raug kev puastsuaj.

²¹Ceevfaj tsis txhob raus tes rau kev ua phem ua qias; qhov uas koj raug txomnyem yog ua kom koj tso kev txhaum tseg.

²²“Nco ntsoov hais tias Vajtswv yog tus muaj hwjchim loj kawg nkaus; nws yog tus xibhwb uas zoo tshaj tej xibhwb huv tibsi.

²³Tsis muaj leejtwg hais kom Vajtswv ua li ub li no lossis liam hais tias Vajtswv ua txhaum.

²⁴Luag ibtxwm qhuas tej uas Vajtswv ua; koj los yuav tsum qhuas nws thiab.

²⁵Txhua tus puavleej pom tej uas Vajtswv tau ua lawm, tiamsis peb tsuas tuaj deb saib xwb.

²⁶Peb tsis paub Vajtswv lub hwjchim lossis tsis paub hais tias Vajtswv nyob thaum twg los lawm.

²⁷“Vajtswv yog tus nqa tej dej hauv ntiajteb no mus thiab tso ua nag los rau lub ntiajteb.

²⁸Vajtswv tso nag hauv tej tauv huab los rau neeg ntiajteb.

²⁹Tsis muaj leejtwg paub hais tias yog li cas huab thiaj txawj txav lossis yog li cas xob thiaj nroo thoob saum ntuj qhov chaw uas Vajtswv nyob tuaj.

³⁰Vajtswv ua kom muaj xob laim thoob ntuj, tiamsis hauv qab thu hiavtxwv tseem tsaus ntuj nti.

³¹Qhov ntawd qhia hais tias Vajtswv pub txhua haivneeg muaj noj muaj haus nplua mias.

³²Vajtswv sau zog tej xob laim rau hauv nws xibteg thiab tso tej xob laim ntawd mus raug qhov chaw uas nws hom tseg.

³³Xob nroo yog ceebtoom hais tias yuav los nagxob nagcua, txawm yog tej tsiaj los twb paub hais tias nagxob nagcua yuav los.