Read Hmong Daw Yauj 37 Bible Online

Yauj 37 - Hmong Daw bible

Yauj 37

¹“Nagxob nagcua ua rau kuv lub siab tshee hnyo.

²Nej txhua tus cia li mloog Vajtswv lub suab, yog lub suab xob nroo uas tawm ntawm nws lub qhovncauj tuaj.

³Vajtswv ua kom muaj xob laim ci thoob plaws saum nruab ntug, sab ntuj tim no mus ti nkaus sab ntuj tim ub.

⁴Ces hnov nws lub suab nrov nroo ntws tuaj, yog lub suab xob nroo uas txaus ntshai thaum uas muaj xob laim tuaj.

⁵Vajtswv ua kom muaj tej txujci tseemceeb tshwm thiab muaj ntau yam uas peb xav tsis thoob li.

⁶Vajtswv tso daus, tso nag tshauv thiab tuamtsam nag los rau lub ntiajteb.

⁷Txhua tus uas Vajtswv tsim yuav paub Vajtswv tes haujlwm; Vajtswv tsis pub neeg ua tau tes haujlwm uas Vajtswv ua.

⁸Tej tsiaj qus nkag mus nkaum rau hauv lawv tej qhov.

⁹Cua daj cua dub ntsawj sab qabteb tuaj, thiab cov cua uas txias heev ntsawj sab qaumteb tuaj.

¹⁰Vajtswv tshuab pa ua rau dej nkoog tas, thiab muab dej ua kom khov ua tej thooj.

¹¹Xob laim ci nplas hauv tej tauv huab tuaj,

¹²tej huab ntawd txav mus raws li Vajtswv siab nyiam. Tej huab ntawd ua raws li Vajtswv tej lus samhwm thoob plaws qab ntuj.

¹³Vajtswv tso nag los ywg lub ntiajteb; tej zaum yog Vajtswv tso los rau txim lossis tso los qhia kom neeg paub nws txojkev hlub.

¹⁴“Yauj, koj so ib pliag thiab ua tib zoo mloog; ua tib zoo saib tej txujci tseemceeb uas Vajtswv ua.

¹⁵Koj puas paub hais tias Vajtswv yog tus samhwm thiab ua kom muaj xob laim hauv tej tauv huab tuaj?

¹⁶Koj puas paub hais tias ua li cas tej huab thiaj nyob tau nta yees saum nruab ntug, tsis yog Vajtswv tej txujci tseemceeb uas xav tsis thoob los?

¹⁷Koj tsuas paub tiv cua kub txomnyem ntsuav thaum cua ntsawj sab qabteb tuaj rau thaj av.

¹⁸Koj puas pab tau Vajtswv nthuav lub ntuj, thiab ua kom lub ntuj tawv li tooj thiab du li iav?

¹⁹Koj qhia rau peb saib yuav hais li cas rau Vajtswv; peb tsis muaj tswvyim thiab tsis paub hais.

²⁰Kuv yuav tsis nrog Vajtswv hais; vim li cas kuv yuav cia nws rhuav kuv?

²¹“Thaum cua ntsawj lub ntuj kaj huv si, lub hnub uas nyob saum nruab ntug ci heev tsis muaj leejtwg ntsia taus.

²²Muaj ib qho ci ntsa iab sab qaumteb tuaj, thiab Vajtswv lub tshwjchim ci ntsa iab tuaj ua rau peb ntshai kawg li.

²³Vajtswv lub hwjchim loj heev ua rau peb txav tsis tau ze nws; Vajtswv yeej ua ncaj ua ncees thaum nws txiav txim rau neeg.

²⁴Twb yog vim li ntawd neeg thiaj hwm nws, thiab nws tsis quavntsej cov neeg uas khav hais tias lawv ntse.”