Read Hmong Daw Yauj 38 Bible Online

Yauj 38 - Hmong Daw bible

Yauj 38

¹Tus TSWV teb Yauj hauv nthwv cua daj cua dub tuaj hais tias:

²“Koj yog leejtwg, koj thiaj tuaj nug kuv lub tswvyim, koj tej lus tsis muaj hauvpaus hauvntsis li los sav?

³Nimno koj cia li sawv khov kho ib yam li tus txivneej yawg thiab cia li teb tej lus uas kuv yuav nug koj.

⁴Thaum kuv tsim lub ntiajteb koj puas nyob ntawd? Yog koj paub txhij paub txhua, koj cia li qhia rau kuv saib;

⁵leejtwg yog tus uas hais tias yuav tsim lub ntiajteb loj li cas? Leejtwg yog tus muab hlua ntsuas lub ntiajteb? Koj paub tej no huv tibsi los?

⁶Yam dabtsi tuav tej ncej uas txheem lub ntiajteb no kom khov? Leejtwg yog tus txhos tus ncej zeb uas txheem lub ntiajteb?

⁷Hnub ntawd thaum kaj ntug txoog, tej hnubqub hu nkauj ua ke thiab tej timtswv saum ntuj qw zoo siab.

⁸“Leejtwg yog tus uas kaw rooj qho dej hiavtxwv thaum hiavtxwv phwj yaws hauv nruab tivtxwv tuaj?

⁹Kuv yog tus uas ua kom huab laum nkaus hiavtxwv thiab ua kom qhov tsaus ntuj qhwv nkaus dej hiavtxwv.

¹⁰Kuv tu kom muab ciam dej ciam av rau hiavtxwv nyob, thiab muab ntsia liaj lub rooj qho tsis pub dej tawm.

¹¹Kuv hais rau dej hais tias, ‘Kuv tsuas pub koj puv txij no xwb, tsis pub puv dhau! Koj lub zog uas ntas tuaj tsuas pub ntas tuaj txog txij no xwb.’

¹²“Yauj, txij thaum koj xeevxwm ua neej los txog nimno, koj puas tau hais kom lub hnub tawm tuaj?

¹³Thaum sawv ntxov koj puas tau kom tshav ntuj ci tuaj ziab ntiajteb thiab co kom cov neeg siab phem tawm hauv tej chaw uas lawv nkaum los?

¹⁴Tej duab tshav ntuj ntawd ua rau sawvdaws pom tej toj roob hauv pes sawv ntshais ntsho ib yam li tej ntaub uas luag muab nthuav pom tej nre tais meej nriav, thiab pom tseeb li lub yeem homthawj uas luag nias rau av nplaum.

¹⁵Nruab hnub pom kev rau cov neeg siab phem ua tsis tau phem thiab txwv tsis pub lawv ua nruj ua tsiv.

¹⁶“Koj twb mus txog hauv qhov uas hiavtxwv txhawv lawm los? Koj twb mus hauv qab thu dej hiavtxwv los lawm los?

¹⁷Twb muaj neeg coj koj mus saib lub roojvag uas quas tubtuag teb uas tsaus ntuj nti lawm los?

¹⁸Koj puas paub hais tias lub ntiajteb no loj li cas? Yog koj paub, koj cia li qhia kuv saib!

¹⁹“Koj puas paub hais tias tus duab ci yog ci qhov twg tuaj? Lossis qhov tsaus ntuj yog los qhov twg los?

²⁰Koj puas qhia tau kom tej duab ci thiab duab tsaus, ci thiab tsaus mus txog txij twg lossis hais kom rov los nyob qhov qub?

²¹Kuv xav hais tias koj ua tau, rau qhov koj twb laus heev lawm, thiab thaum tsim ntiajteb koj twb nyob ntawd ntag!

²²“Koj puas tau mus pom tej txhab uas kuv cia ntim daus thiab lawg?

²³Kuv npaj tej ntawd cia rau lub sijhawm uas muaj kev txomnyem thiab hnub uas muaj kev tsov kev rog.

²⁴Koj twb mus txog ntawm qhov chaw uas lub hnub tawm tuaj lossis ntawm qhov chaw uas cov cua sab hnubtuaj ntsawj tuaj lawm los?

²⁵“Leejtwg yog tus khawb kwj rau nag los thiab qhib kev rau xob nroo?

²⁶Leejtwg yog tus tso nag los rau tej toj roob hau pes uas tsis muaj neeg nyob?

²⁷Leejtwg yog tus ywg dej rau thaj av uas qhuav nkig nkuav kom tej nroj tsuag hlob taus?

²⁸Leejtwg yog tej nag thiab tej lwg txiv?

²⁹Leejtwg yog tej dej nkoog thiab tej te niam?

³⁰Tej ntawd ua rau dej khov tawv cuag pobzeb thiab ua rau nplaim hiavtxwv nkoog khov kho.

³¹“Koj puas yog tus uas muab cov hnubqub Txhiaj Txivmim los teeb ua ib ntsau lossis muab cov hnubqub Pojsua Kwv ntas cais nyias nyob nyias?

³²Puas yog koj ua rau tej hnubqub tig tau mus los haum lub caij lub nyoog lossis qhia kev rau tej hnubqub Ntsau loj thiab Ntsau me?

³³Koj paub tej kevcai uas luag tswjhwm saum nruab ntug, thiab koj muab tau tej kevcai ntawd los siv rau hauv lub ntiajteb no los?

³⁴“Koj puas hais tau kom tej huab tso nag los rau koj?

³⁵Yog koj hais kom xob laim, nws puas tawm tuaj hais rau koj tias, ‘Kuv nyob ntawm no?’

³⁶Leejtwg qhia rau tus qaibdeg hais tias tus dej Niles yuav huam tuaj lossis leejtwg qhia rau tus lau qaib hais tias nag yuav los?

³⁷Leejtwg muaj kev txawj ntse suav txheeb tej huab thiab hais kom tej huab ntawd tso nag los

³⁸rau tej plua av kom nplaum ua tej thooj?

³⁹“Koj puas nrhiav tau nqaij rau tej tsov ntxhuav noj, thiab ua kom tej menyuam tsov ntxhuav tsau plab,

⁴⁰thaum lawv nkaum hauv qhov tsua lossis pw hauv lawv tej qhov?

⁴¹Thaum uablag tshaib plab thiab ya rau ub rau no, leejtwg yog tug pub rau uablag noj, thiab pub rau uablag tej menyuam uas quaj thov kuv?