Read Hmong Daw Yauj 4 Bible Online

Yauj 4 - Hmong Daw bible

Yauj 4

¹Tom qab ntawd Elifas uas yog neeg Temas hais rau Yauj hais tias: “Yog kuv hais ob peb lo lus koj puas chim? Kuv npo tsis tau kuv tej lus lawm.

³Koj twb ntuas tej neeg ntau leej los lawm, thiab txhawb cov neeg uas qaug zog kom muaj zog tuaj.

⁴Thaum muaj neeg qaug zog thiab dawm ntog lawm, koj tej lus txhawb tau lawv lub zog.

⁵Nimno kev txomnyem los raug koj lawm, koj yuav tsis muaj zog tiv taus tej kev txomnyem ntawd.

⁶Koj hwm Vajtswv thiab ua koj lub neej zoo tsis muaj leejtwg thuam tau; tsimnyog koj muab siab npuab thiab cia siab rau tus TSWV.

⁷Koj ua tib zoo xav saib tej neeg ncaj ncees yeej tsis muaj ib tug raug kev puastsuaj li.

⁸Raws li kuv pom mas tej neeg uas ua kev txhaum, thiab ua kev phem kev qias yeej yuav tau sau tej uas lawv ua ntawd.

⁹Vajtswv txojkev chim ua rau lawv raug kev puastsuaj ib yam li nthwv cua daj cua dub los nplawm lawv tej vajtse vau tas.

¹⁰Cov neeg siab phem nthe nrov ib yam li tsov ntxhuav nyooj, tiamsis Vajtswv kaw lawv qhovncauj thiab tsoo lawv tej hniav lov.

¹¹Lawv yuav tuag ib yam li tej tsov ntxhuav tuag tshaib uas tom tsis tau tsiaj noj, thiab lawv tej menyuam yuav khiav ua sab ua sua tas.

¹²“Muaj ib lub suab hais rau kuv; lub suab ntawd hais yau heev kuv twb yuav luag tsis hnov.

¹³Lub suab ntawd zoo li yam li zaj npau suav phem uas ua rau kuv tsim dheev nruab dab ntub los.

¹⁴Kuv ntshai ua ibce tshee hnyo; thiab ua rau kuv lub cev tshee laim dais.

¹⁵Muaj ib nthwv cua ntsawj ntxias zias rau kuv lub plhu, ua rau kuv poob siab nthav ibce xob tagnrho.

¹⁶Kuv pom ib yam sawv ntawm kuv hauv ntej; kuv tsa qhovmuag ntsia, tiamsis kuv tsis paub hais tias yog dabtsi. Kuv txawm hnov ib lub suab hais ntawm qhov chaw uas ntsiag to tuaj hais tias,

¹⁷‘Puas muaj ib tug neeg ncaj ncees tshaj Vajtswv? Lossis puas muaj ib tug neeg dawbhuv tshaj tus TSWV uas Tsim nws?

¹⁸Vajtswv tsis ntseeg nws cov timtswv saum ntuj siab; txawm yog nws cov timtswv los ua txhaum thiab.

¹⁹Koj puas xav hais tias Vajtswv yuav cia siab rau tus uas nws muab av nplaum puab? Tej uas nws muab av puab ntawd tsis ruaj tsis khov ib yam li tus kab npauj uas luag muab zuaj ces yuav mos tas?

²⁰Thaum sawv ntxov tej neeg tseem ua neej nyob, tiamsis thaum tsis tau tsaus ntuj lawv twb tuag lawm, tsis muaj leejtwg paub.

²¹Luag yuav txeeb txhua tsav yam uas lawv muaj mus tas; thaum lawv tseem tsis tau muaj kev txawj ntse lawv twb tuag lawm.’