Read Hmong Daw Yauj 40 Bible Online

Yauj 40 - Hmong Daw bible

Yauj 40

¹Tus TSWV hais rau Yauj hais tias: “Yauj, koj pheej nrog Vajtswv tus uas muaj hwjchim loj kawg nkaus sib cav; nimno koj yuav tso tseg lossis tseem yuav cav thiab?”

³Yauj teb tus TSWV hais tias: “Tus TSWV, kuv yog neeg ruam heev, kuv ua li cas teb tau koj tej lus? Kuv yuav tsis hais ib los ntxiv li lawm.

⁵Kuv twb hais tshaj qhov uas tsimnyog kuv hais lawm.”

⁶Tom qab ntawd, tus TSWV rov hais hauv nthwv cua daj cua dub tuaj rau Yauj ib zaug ntxiv.

⁷Tus TSWV hais rau Yauj hais tias, “Koj cia li sawv khov kho ib yam li tus txivneej yawg thiab teb kuv tej lus.

⁸Koj hais rau kuv tias kuv ua tsis ncaj, thiab hais tias kuv yog tus txhaum, koj yog tus tsis txhaum no los?

⁹Koj muaj zog npaum li kuv los? Koj ua tau koj lub suab nrov qeeg nkaws ib yam li kuv lub los?

¹⁰Yog koj ua tau, koj cia li sawv khav txiv ntxhias ib yam li tus muaj hwjchim, muab koj lub meejmom thiab lub tshwjchim los hnav kiag saib.

¹¹Koj cia li saib tej neeg khavtheeb; cia li nthe tawg ntho kom lawv txo hwjchim.

¹²Koj cia li saib cov neeg khavtheeb thiab txo lawv lub hwjchim kom qis; muab cov neeg siab phem tsuj nthi rau ntawm lawv qhov chaw.

¹³Muab lawv faus kiag rau hauv nruab av; muab lawv khi kiag rau hauv tubtuag teb.

¹⁴Yog koj ua tau, kuv yog thawj tug uas yuav qhuas koj, thiab lees hais tias koj yog tus uas kovyeej lawm.

¹⁵“Koj cia li saib tus tsiaj Npehemaus; kuv tsim nws thiab tsim koj huv tibsi. Nws noj zaub li tus nyuj,

¹⁶tiamsis yog dabtsi ua rau tus tsiaj ntawd lub cev muaj zog heev, thiab yog lub hwjchim dabtsi ua rau nws tej nqaij puv nruj nreem!

¹⁷Nws tus kotw tsa ntshuas ib yam li tsob ntoo ciab, thiab nws ncejpuab ntug ntoob muaj zog heev.

¹⁸Nws tej pobtxha khov cuag tooj, thiab nws tej tes taw tawv cuag hlau.

¹⁹“Tus tsiaj uas muaj hwvxyeej tshaj tej tsiaj uas kuv tsim; tsuas yog tus tswv uas tsim nws thiaj kovyeej nws xwb.

²⁰Nws noj zaub saum tej roob uas yog tej tsiaj nruab nrag tej chaw ncig.

²¹Nws pw hauv qab tej xyuv pos, thiab pw tsau hawv tsawv hauv qab tej tauj iab.

²²Tej ntoo pos thiab tej lwgzaj uas tuaj ntawm ntug dej ua duab ntxoov ntxoo rau nws nkaum.

²³Nws tsis ntshai tus dej uas ntws ceev; thaum tus dej Yauladees ntsawj nws taubhau los nws tseem nres khov kho.

²⁴Leejtwg muaj cuabkav ua rau nws digmuag thiab ntes tau nws? Lossis leejtwg muaj cuabkav muab hlua chaws tau nws qhovntswg?