Read Hmong Daw Yauj 41 Bible Online

Yauj 41 - Hmong Daw bible

Yauj 41

¹“Koj muaj cuabkav muab nuv ntses nuv tau Levi-athas lossis muab hlua khi tau nws tus nplaig los?

²Koj puas muab hlua chaws tau nws qhovntswg? Lossis muab nuv ntses nqe tau nws lub puabtsaig?

³Nws puas yuav thov kom koj tso nws mus? Nws puas yuav ua tib zoo thov kom koj hlub nws?

⁴Nws puas kam lees thiab coglus rau koj hais tias nws yuav ua koj qhev mus ibtxhis?

⁵Koj puas yuav khi tau nws ib yam li khi noog rau koj tej ntxhais ua si?

⁶Cov neeg ntaus ntses puas tuaj kheev nqi yuav nws? Tej tub lag tub luam puas yuav muab nws coj mus txhoov muag?

⁷Koj puas yuav muab hmuv nkaug tau nws daim tawv lossis muab hmuv hlau nkaug tau nws taubhau tshab?

⁸Yog koj nrog nws sib ntsuas zog ib zaug, koj yuav zeem kiag tsis kov ntxiv li lawm.

⁹“Yog leejtwg pom Levi-athas, nws yuav ntshai ua ibce tuag tas thiab ntog rau hau av.

¹⁰Thaum muaj neeg mus thab nws, nws yuav ua tsiv kawg nkaus, tsis muaj leejtwg yuav tiv taus li.

¹¹Leejtwg tawmtsam nws tas thiab tseem muaj sia nyob? Nyob hauv ntiajteb no yeej tsis muaj leejtwg ua tau li ntawd.

¹²“Cia kuv qhia Zaj tej tes taw rau koj paub, thiab qhia rau koj saib nws loj thiab muaj zog npaum li cas.

¹³Tsis muaj leejtwg laws tau nws daim tawv lossis nkaug tshab nws tej nplai.

¹⁴Leejtwg muaj cuabkav rua tau nws lub qhovncauj uas hniav zuag plias thiab txaus ntshai ntawd?

¹⁵Nws lub nraubqaum ua nplai rees ua tej nreej tawv cuag pobzeb.

¹⁶Nws tej nplai sib dhos ntom nti, txawm yog cua los twb txeem tsis tau.

¹⁷Tej nplai ntawd sib dhos ua nreej rees, tsis muaj ib yam dabtsi ua tau rau cov nplai ntawd nti li.

¹⁸Thaum nws txham muaj duab ci laim liab vog, thiab nws ob lub qhovmuag ci li thaum lub hnub tawm tuaj.

¹⁹Muaj nplaim taws cig laim lias hauv nws qhovncauj thiab ya liab vog tuaj.

²⁰Muaj pa ncho tawm hauv nws qhovntswg tuaj ib yam li tej pa quavnyab ncho hauv qab laujkaub.

²¹Nws tej pa ua tau hluavtaws; muaj hluavtaws tawm liab vog hauv nws qhovncauj tuaj.

²²Nws lub cajdab muaj zog heev, txhua tus uas pom nws ntshai kawg li.

²³Nws daim tawv, tawv cuag hlau txias, tsis muaj ib qho zooj li.

²⁴Nws siab tawv ib yam li pobzeb, thiab tawv ib yam li txhib zeb tsis ntshai dabtsi li.

²⁵Thaum nws tawm plaws tuaj, txawm yog tej neeg uas muaj zog heev los yeej ntshai ua ibce tuag tas tsis paub ua zaj twg.

²⁶Tsis muaj ib rab ntaj uas yuav txiav tau nws li; txawm yog muab ntaj, muab hmuv lossis muab xubvos tua los yeej tsis to li.

²⁷Muab hmuv hlau nkaug nws, ces ib yam lib muab quavnyab nkaug, thiab muab hmuv tooj nkaug, ces ib yam li muab ntoo lwj nkaug xwb.

²⁸Tsis muaj ib xibxub vos uas yuav ua tau rau nws khiav li; muab pobzeb ntaus nws, ces ib yam li muab quavnyab ntaus xwb.

²⁹Muab qws ntaus nws, ces ib yam li muab ib tug quavnyab npleg ntaus; thiab thaum neeg muab hmuv nkaug nws, nws tseem luag thiab.

³⁰Nws tej nplai hauv qab plab ntse cuag li tej txhais lamhwj; thaum nws mus, nws tshiav av tawg pes rhe ib yam li khais laij liag.

³¹Nws ua rau dej hiavtxwv npau ib yam li dej kub npau, thiab ua rau dej hiavtxwv ua npuas ib yam li laujkaub roj.

³²Nws mus kev mas ua rau dej txaws dawb vog rov tom qab; thiab nws ua rau dej hiavtxwv ua npuas dawb paug.

³³Tsis muaj ib yam dabtsi hauv ntiajteb no yuav piv tau nws; nws yog tus tsiaj uas tsis paub ntshai dabtsi li.

³⁴Txawm yog tej tsiaj ua tau heev los nws tsis ntshai; nws yog tus vajntxwv uas kav tagnrho txhua yam tsiaj nruab nrag.”