Read Hmong Daw Yauj 5 Bible Online

Yauj 5 - Hmong Daw bible

Yauj 5

¹“Yauj, koj cia li tsa suab hu saib puas muaj leejtwg teb koj? Puas muaj ib tug timtswv nyob qhov twg uas koj yuav mus cuag tau?

²Tus neeg ruam tuag vim nws txojkev chim, tus neeg tsis paub qabhau tuag vim nws txojkev khib.

³Kuv pom cov neeg ruam nyob tso siab lug, tiamsis tos nco kuv txawm foom tsis zoo rau lawv tej vajtse lawm.

⁴Lawv tej menyuam yuav khiav tsis dim kev txomnyem li; tsis muaj leejtwg yuav pab txheem lawv hauv tsev tu plaub.

⁵Cov neeg tshaib plab yuav tau noj cov neeg ruam tej qoobloo, txawm yog tej qoobloo uas tuaj xyaw hmab pos los lawv yuav sau kom tas mus. thiab cov neeg ntshaw nyiaj yuav txeeb lawv tej nyiaj tej kub kom tas.

⁶Kev phem kev qias yeej tsis tawm hauv av tuaj, lossis teebmeem yeej tsis tshwm hauv nruab av tuaj li.

⁷Tiamsis neeg lob teebmeem los rau ib yam li txim taws ya hauv qhovcub tuaj.

⁸“Kheev kuv lam yog koj, kuv twb mus cuag Vajtswv thiab piav kuv tej kev txomnyem rau nws lawm.

⁹Peb tsis totaub tej haujlwm tseemceeb uas Vajtswv ua, thiab nws tej txujci tseemceeb muaj ntau heev suav tsis txheeb li.

¹⁰Nws tso nag los rau lub ntiajteb thiab nws ua kom muaj dej yug tej qoobloo hauv tej liaj tej teb.

¹¹Vajtswv tsa cov neeg uas txo hwjchim lub neej rau qhov siab, thiab pab cov neeg uas muaj kev txhawjxeeb quaj ntsuag kom muaj kev zoo siab.

¹²Nws tawmtsam cov neeg dag ntxias tej tswvyim thiab muab cov neeg txawj ntse tej tswvyim cuab lawv kev, kom lawv ua tsis tau lawv tej haujlwm tiav;

¹⁴txawm yog nruab hnub nrig los lawv maub ib yam li tsaus ntuj nti.

¹⁵Tiamsis Vajtswv pab cov neeg pluag dim kev ploj kev tuag; thiab nws pab cov neeg txomnyem dim kev tsimtxom.

¹⁶Vajtswv pub cov neeg txomnyem muaj chaw cia siab, tiamsis nws kaw cov neeg ua phem ua qias lub qhovncauj.

¹⁷“Tus uas Vajtswv qhuab qhia, tus ntawd tau koob hmoov; thaum Vajtswv qhuab ntuas koj, koj tsis txhob tu siab.

¹⁸Vajtswv ua rau koj nqaij to, tiamsis nws yuav qhwv koj lub qhov txhab; nws txhais tes nplawm koj, tiamsis nws txhais tes yuav kho koj.

¹⁹Nws niaj hnub yuav cawm kom koj dim kev puastsuaj.

²⁰Thaum muaj kev tshaib nqhis, nws yuav cawm tsis pub koj tuag, thiab thaum muaj kev tsov kev rog, nws yuav tsomkwm tsis pub koj tuag.

²¹Vajtswv yuav pab kom koj tsis txhob raug xaiv raug lus; thiab thaum muaj kev puastsuaj tuaj nws yuav cawm koj.

²²Thaum muaj kev puastsuaj thiab muaj kev tshaib nqhis koj yuav luag, thiab koj yuav tsis ntshai tej tsiaj qus.

²³Tej liaj tej teb uas koj laij yuav tsis muaj pobzeb, thiab tej tsiaj qus yuav tsis tom koj.

²⁴Koj yuav nyob kaj siab lug hauv koj lub tsevntaub; thaum koj tsa qhovmuag saib koj tej yaj, koj yuav pom txhua tus nyob txhij.

²⁵Koj yuav muaj xeebntxwv coob ib yam li tej nroj tsuag hauv tiaj nrag.

²⁶Koj yuav ua neej nyob laus nkoos ib yam li hnab nplej uas siav kus rau lub caij sau qoobloo.

²⁷Yauj, peb twb pom thiab paub hais tias tej no yog lus tseeb tiag, yog li ntawd, koj cia li khaws nkaus tej no rau nruab siab.”