Read Hmong Daw Yauj 6 Bible Online

Yauj 6 - Hmong Daw bible

Yauj 6

¹Yauj teb hais tias: “Yog muab kuv tej kev txomnyem thiab kev nyuaj siab los luj rau saum teev,

³tseem hnyav dua tej suabzeb ntawm ntug hiavtxwv, yog li ntawd, kuv tej lus yuav tsis hnyav rau koj ua luaj twg.

⁴Vajtswv tus uas muaj hwjchim loj kawg nkaus muab xubvos tua kuv, mas tej taug huam thoob plaws kuv lub cev. Vajtswv tso nws tej kev nruj tsiv tuaj tawmtsam kuv.

⁵“Tus neesluav qus txaus siab heev thaum nws tau zaub noj, thiab thaum nyuj tau zaub noj, nyuj nyob ntsiag to.

⁶Leejtwg thiaj noj taus tej nqaij uas tsis rau ntsev? Lub qe txheej dawb puas qab dabtsi?

⁷Kuv tsis nqhis tej zaub mov uas zoo li ntawd, thiab txhua yam uas kuv noj ua rau kuv mob.

⁸“Vim li cas Vajtswv tsis muab tej uas kuv thov rau kuv? Vim li cas nws tsis teb kuv tej lus thov?

⁹Kheev lam Vajtswv muab kuv tua kom tuag!

¹⁰Yog kuv paub hais tias Vajtswv yuav muab kuv tua, txawm yog mob npaum li cas los kuv yeej zoo siab. Kuv paub hais tias Vajtswv yog tus dawbhuv; kuv tsis tau tawmtsam nws tej lus samhwm li.

¹¹Kuv yuav ua li cas cuab tau zog ua kuv lub neej mus ntxiv? Thaum kuv tsis muaj kev cia siab lawm, yuav ua li cas xav ua neej nyob?

¹²Kuv lub cev puas yog pobzeb? Kuv tej txha puas yog tooj?

¹³Kuv lub zog ntaug tas pab tsis tau kuv lawm; tsis muaj ib qhov chaw uas kuv yuav vamkhom li.

¹⁴“Thaum raug kev txomnyem nyuaj siab li no, kuv xav tau kev pab ntawm tej phoojywg uas siab dawb siab zoo, tsis hais thaum kuv tso Vajtswv tseg lossis tsis tso.

¹⁵Tiamsis nej cov uas yog kuv phoojywg, nej dag kuv ib yam li lub hav qhuav uas tsis muaj dej thaum lub caij tsis los nag.

¹⁶Yog los daus thiab dej nkoog yuav ua rau dej ntws tsis taus,

¹⁷tiamsis thaum tshav ntuj tuaj ziab, tej dej nkoog yuav yaj tas, thiab tshuav lub kwjha qhuav qhawv cia lawm xwb.

¹⁸Tej neeg uas taug kev mus nrhiav dej haus yuam kev tas; lawv mus mus los los thiab tuag tas rau tom tiaj suabpuam.

¹⁹Tej neeg taug kev hauv lub nroog Senpas thiab lub nroog Temas tuaj nrhiav dej haus,

²⁰tiamsis lawv tej kev cia siab yuav ploj tas rau ntawm lub kwjha qhuav ntawd.

²¹Nej zoo ib yam li tej kwjha qhuav rau kuv xwb, nej tuaj pom kuv raug txomnyem li no, ua rau nej ntshai thiab khiav rov qab.

²²Kuv puas tau thov kom nej muab ib yam dabtsi pub rau kuv, lossis muab xiab lwm tus kom tuaj tso kuv,

²³lossis cawm kom kuv dim ntawm kuv cov yeebncuab, lossis dim ntawm cov neeg uas tsimtxom kuv?

²⁴“Nej cia li qhia kuv, kuv yuav nyob twjywm mloog; qhia saib kuv ua txhaum dabtsi.

²⁵Tej lus tseeb hloov tau lwm tus lub siab, tiamsis nej tej lus tsis muaj qabhau li.

²⁶Nej xav hais tias tej lus uas kuv hais tsis muaj qabhau ib yam li cua ntsawj xwb; tiamsis ua li cas nej ho teb kuv tej lus uas tas kev cia siab thiab?

²⁷Txawm yog tej menyuam ntsuag los nej muab rho ntawv coj mus ua qhev, thiab ua tsis ncaj rau tej phoojywg zoo kom nej npluanuj.

²⁸“Nej saib kuv lub ntsejmuag, kuv yeej tsis dag.

²⁹Nej hais ntau dhau heev lawm, cia li tseg tej uas nej hais tsis tseeb. Tsis txhob liam hais tias kuv ua txhaum, rau qhov kuv yeej ua yog lawm.

³⁰Tiamsis nej xav hais tias kuv yog neeg dag. Nej xav hais tias kuv tsis paub qhov yog thiab qhov tsis yog.