Read Hmong Daw Phau Ntawv Nkauj 10 Bible Online

Phau Ntawv Nkauj 10 - Hmong Daw bible

Phau Ntawv Nkauj 10

¹Tus TSWV, vim li cas koj yuav nyob deb ua luaj li? Vim li cas koj khiav nkaum thaum peb raug kev txomnyem?

²Cov neeg siab phem khavtheeb thiab tsimtxom cov neeg pluag; lawv ntes tau cov pluag thaum cov neeg pluag poob qhov.

³Cov neeg siab phem khavtheeb rau txojkev uas lawv ntshaw ua phem ua qias; Cov neeg siab hlob tsawm foom tus TSWV thiab tsis txais yuav nws.

⁴Cov neeg siab phem yeej tsis quavntsej txog tus TSWV, vim lawv txojkev khavtheeb lawv thiaj xav hais tias, “Tsis muaj Vajtswv.”

⁵Cov neeg siab phem yeej vammeej txhua yam. Tiamsis lawv tsis paub txog Vajtswv txojkev txiav txim, lawv tsuas tabhaj luag lawv cov yeebncuab plig xwb.

⁶Lawv rov hais rau lawv tias, “Peb yuav tsis ntog ib zaug li, thiab peb yuav tsis raug kev txomnyem hlo li.”

⁷Lawv hais lus tsawm luag, dag luag, thiab hais lus chob luag siab, lawv hais tej lus uas txaus ntxub thiab lus phem lus qias xwb.

⁸Lawv mus nkaum hauv tej zos, thiab tos tua tej neeg tsis muaj txim. Lawv nyas nrhw tua cov neeg txomnyem uas tsis muaj leejtwg pab,

⁹lawv nkaum zov tos luag ib yam li tus tsov ntxhuav. Lawv zov ntes cov neeg pluag; lawv ntes tau cov neeg pluag thaum mag lawv tej vojhlua thiab muab luag mus povtseg.

¹⁰Cov neeg tsis muaj tus pab raug luag caij tsuj, cov neeg txomnyem ntog vim cov neeg siab phem lub zog.

¹¹Cov neeg siab phem xav hais tias, “Vajtswv yeej tsis quavntsej peb. Nws twb qi qhovmuag lawm, nws yeej tsis pom peb li!”

¹²Tus TSWV, cia li rau txim rau tus neeg siab phem! Thov nco ntsoov cov neeg uas raug kev txomnyem!

¹³Yog li cas tus neeg siab phem thiaj thuam Vajtswv thiab xav hais tias, “Vajtswv yeej tsis rau txim rau kuv li”?

¹⁴Tiamsis koj yeej muaj qhovmuag pom, koj yeej mob siab txog tej teebmeem thiab kev txomnyem ntawd, koj yeej npaj nroos yuav pab. Cov neeg uas tsis muaj leejtwg pab yuav los cuag koj, koj yeej ibtxwm pab cov neeg uas raug txomnyem.

¹⁵Cia li rhuav cov neeg siab phem thiab ua phem ua qias lub hwjchim; rau txim rau lawv vim tej kev txhaum uas lawv ua mus txog thaum lawv tso tseg.

¹⁶Tus TSWV yog tus vajntxwv uas nyob mus ibtxhis. Txhua tus uas pe lwm haivneeg tej vajtswv, tus TSWV yuav muab ntiab tawm hauv nws lub tebchaws mus.

¹⁷Tus TSWV, koj yeej mloog cov neeg uas tsis muab hlob tej lus thov, koj yuav txhawb lawv lub zog kom lawv ua tau lub siab ntev.

¹⁸Koj hnov cov neeg uas raug luag tsimtxom thiab cov menyuam ntsuag tej suab quaj; koj yuav txiav txim ncaj rau lawv kom neeg ntiajteb tsis txhob ua phem ntxiv lawm.