Read Hmong Daw Phau Ntawv Nkauj 101 Bible Online

Phau Ntawv Nkauj 101 - Hmong Daw bible

Phau Ntawv Nkauj 101

¹Tus TSWV, kuv hu nkauj qhuas koj, kuv zaj nkauj yog hais txog qhov uas koj ua siab dawb siab zoo thiab ncaj ncees.

²Kuv yuav xyaum ua lub neej kom tsis muaj leejtwg thuam tau li. Thaum twg koj mam los cuag kuv? Kuv yuav ua lub neej dawbhuv nyob hauv kuv lub tsev,

³thiab kuv yuav tsis quavntsej tej kev phem kev qias li. Kuv ntxub tej uas cov neeg khiav tawm ntawm Vajtswv mus lawm ua; kuv yuav tsis raus tes rau tej kev phem kev qias ntawd li.

⁴Kuv yuav tsis ua neeg siab nkhaus, thiab kuv yuav tsis koom nrog cov neeg siab phem.

⁵Kuv yuav muab cov neeg uas hais luag plig ua kom puastsuaj; kuv yuav tsis ua siab ntev rau tus neeg khavtheeb thiab muaj plhus hlo li.

⁶Kuv yuav pub cov neeg uas muaj lub siab npuab Vajtswv nyob hauv kuv lub loog. Kuv yuav cia cov neeg uas muaj lub siab ncaj ua kuv tes haujlwm.

⁷Yuav tsis muaj neeg dag nyob hauv kuv lub loog; yuav tsis muaj cov neeg ntsejmuag ncaj siab nkhaus nyob tabmeeg kuv.

⁸Kuv yuav rhuav cov neeg siab phem uas nyob hauv peb lub tebchaws ib hnub dhau ib hnub kom ploj mus tas; kuv yuav muab cov neeg limhiam ntiab tawm hauv tus TSWV lub nroog mus.