Read Hmong Daw Phau Ntawv Nkauj 102 Bible Online

Phau Ntawv Nkauj 102 - Hmong Daw bible

Phau Ntawv Nkauj 102

¹Tus TSWV, thov koj mloog kuv tej lus thov, thiab mloog kuv lub suab uas thov koj pab!

²Thaum kuv raug kev txomnyem, thov koj tsis txhob khiav nkaum kuv! Thov koj tig ntsej mloog kuv tej lus thiab teb kuv thaum kuv thov koj.

³Kuv txojsia tabtom yuav ploj mus ib yam li cov pa ncho; thiab kuv lub cev tabtom kub cuag hluavtaws hlawv.

⁴Kuv raug luag tsuj ntog ib yam li tej nroj qhuav; kuv thiaj tsis nco qab los noj kuv cov mov lawm.

⁵Kuv ntsaj laws; kuv lub cev tshuav tawv qhwv pobtxha lawm xwb.

⁶Kuv zoo li tus noog uas nyob tom tiaj suabpuam, zoo ib yam li tus plas uas nyob hauv lub zos uas do cuas.

⁷Kuv pw tsis tsaug zog li; kuv zoo ib yam li tus noog uas nyob kho siab khuav saum rutsev;

⁸Kuv cov yeebncuab tuaj thuam kuv tas hnub; cov neeg uas tuam mom kuv tuav kuv lub npe foom tsis zoo.

⁹Vim koj chim thiab npautaws, kuv thiaj noj tshauv ib yam li noj mov, thiab haus dej los haus tau kuv cov kua muag. Koj muab kuv nqa thiab laim povtseg.

¹¹Kuv txojsia zoo ib yam li tus duab ntxoov ntxoo thaum yuav tsaus ntuj; kuv zoo ib yam li tej nroj uas qhuav lawm.

¹²Tiamsis tus TSWV, koj zaum saum koj lub zwmtxwv mus ibtxhis; txhua tiam neeg yuav nco ntsoov koj.

¹³Koj yuav sawv tsees los hlub Xi-oos; rau qhov twb txog lub sijhawm uas hlub Xi-oos lawm; lub sijhawm uas teem cia los txog lawm lauj!

¹⁴Koj cov tubtxib nyiam Xi-oos kawg li, txawm yog Xi-oos raug rhuav puastsuaj ua tej pawg pobzeb lawm los lawv tseem tshua nws kawg li.

¹⁵Txhua haivneeg yuav ntshai tus TSWV; txhua tus vajntxwv uas nyob hauv ntiajteb no yuav ntshai nws lub hwjchim.

¹⁶Thaum tus TSWV rov txhim kho lub nroog Xi-oos dua tshiab, nws lub hwjchim yuav tshwm rau sawvdaws pom.

¹⁷Nws yuav mloog nws haivneeg uas tsis muaj leejtwg mob siab rau tej lus thov.

¹⁸Cia li muab tej uas tus TSWV tau ua tas los lawm sau cia rau tej neeg yav tom ntej tau nyeem kom cov neeg uas tseem yuav yug los thiaj paub qhuas Vajtswv.

¹⁹Tus TSWV ntsia saum nws lub chaw dawbhuv saum ntuj tuaj, nws nyob saum ntuj ntsia tuaj rau hauv ntiajteb.

²⁰Nws hnov cov neeg uas raug txim tej suab quaj thiab nws tso cov neeg uas raug luag rau txim kom dim kev tuag.

²¹Thiab neeg yuav piav nws lub npe hauv Xi-oos, thiab neeg yuav qhuas nws nyob hauv lub nroog Yeluxalees,

²²rau thaum uas ntau haivneeg thiab ntau lub tebchaws tuaj sib sau ua ke pehawm tus TSWV.

²³Tus TSWV txo kuv lub zog rau thaum kuv tseem hluas; nws txiav kuv txojsia kom kuv ua neej nyob tsis ntev.

²⁴Vajtswv, thov koj tsis txhob coj kuv mus thaum kuv tseem yog ib nrab neej. Tus TSWV, koj yog tus uas nyob mus ibtxhis;

²⁵thaum chivkeeb koj txhais tes tsim lub ntiajteb thiab tsim lub ntuj.

²⁶Tej ntawd yuav ploj mus tas, tiamsis koj yuav nyob mus ibtxhis; tej ntawd yuav txawj qub thiab ntuag ib yam li tej tsoos tsho. Koj yuav muab tej ntawd hloov ib yam li luag hloov ris tsho, ces tej ntawd yuav ploj mus.

²⁷Tiamsis koj zoo li qub, thiab koj yuav nyob mus ibtxhis tsis txawj kawg li.

²⁸Peb tej tubki yuav nyob kaj siab lug, vim koj yog tus tiv thaiv, thiab lawv cov xeebntxwv yuav nyob tso siab plhuav.