Read Hmong Daw Phau Ntawv Nkauj 103 Bible Online

Phau Ntawv Nkauj 103 - Hmong Daw bible

Phau Ntawv Nkauj 103

¹Kuv lub siab, cia li qhuas tus TSWV! Tagnrho kuv lub cev, cia li qhuas nws lub npe uas dawbhuv!

²Kuv lub siab, cia li qhuas tus TSWV thiab nco tsoov nws txiaj ntsig.

³Nws zam kuv tej kev txhaum huv tibsi thiab kho kuv tej mob zoo hlo.

⁴Nws pab kuv dim kev ploj kev tuag, nws hlub thiab tshua kuv, nws foom koob hmoov rau kuv.

⁵Nws pub txhua yam zoo rau kuv lub neej, yog li ntawd, kuv thiaj tseem hluas thiab muaj zog khov kho ib yam li tus dav.

⁶Tus TSWV pab cov uas raug luag tsimtxom, thiab nws tuaj lawv tog pab kom lawv yeej.

⁷Tus TSWV qhia nws tes haujlwm rau Mauxes thiab pub rau cov Yixalayees pom nws tej txujci tseemceeb.

⁸Tus TSWV yog tus siab dawb siab zoo thiab muaj kev hlub, nws tsis chim sai thiab nws hlub mus ibtxhis.

⁹Nws tsis cem thiab nws tsis chim mus ibtxhis.

¹⁰Nws tsis rau txim rau peb raws li tej kev txhaum uas tsimnyog peb raug, lossis tsis ua pauj peb lub txim thiab tej kev txhaum uas peb ua.

¹¹Lub ntuj nyob siab ntawm lub ntiajteb npaum li cas, tus TSWV hlub cov uas hwm nws heev npaum li ntawd.

¹²Hnubtuaj deb hnubpoob npaum li cas, tus TSWV tshem peb tej kev txhaum mus povtseg deb npaum li ntawd.

¹³Leej txiv hlub nws cov menyuam npaum li cas, tus TSWV hlub cov ua hwm nws npaum li ntawd.

¹⁴Tus TSWV paub hais tias nws muab dabtsi los tsim peb; nws nco ntsoov hais tias peb yog hmoov av xwb.

¹⁵Peb txojsia zoo ib yam li tej nroj tsuag, peb loj hlob mos nyoos ib yam li lub paj roj;

¹⁶thaum cua ntsawj lub paj ntawd txawm zeeg lawm, thiab tsis muaj leejtwg rov pom lub paj ntawd dua.

¹⁷Tiamsis tus TSWV hlub cov neeg uas hwm nws mus ibtxhis, thiab nws muaj lub siab dawb siab zoo rau txhua tiam neeg,

¹⁸yog pub rau cov neeg uas coj raws li nws tej lus cog tseg, thiab mloog nws tej lus qhuab qhia kawg siab kawg ntsws.

¹⁹Tus TSWV muab nws lub zwmtxwv txawb rau saum ntuj; nws yog tus uas kav txhua tsav yam huv tibsi.

²⁰Cov timtswv ceebtsheej uas muaj zog thiab muaj hwjchim, cov uas ua raws li tus TSWV tej lus qhuab qhia, thiab mloog tej lus uas nws hais, nej cia li qhuas tus TSWV!

²¹Txhua yam uas muaj hwjchim nyob saum qaum ntuj, nej yog tus TSWV cov tubtxib uas ua raws li nws lub siab nyiam, nej cia li qhuas tus TSWV!

²²Txhua yam uas tus TSWV tsim los nyob txhua qhov uas nws kav, cia li qhuas tus TSWV. Kuv lub siab, cia li qhuas tus TSWV!