Read Hmong Daw Phau Ntawv Nkauj 105 Bible Online

Phau Ntawv Nkauj 105 - Hmong Daw bible

Phau Ntawv Nkauj 105

¹Cia li ua tus TSWV tsaug, cia li piav nws lub koob lub npe uas zoo kawg nkaus rau sawvdaws; cia li qhia kom txhua haivneeg paub tus TSWV tej haujlwm uas nws ua.

²Cia li hu nkauj qhuas tus TSWV; cia li qhia kom txhua tus paub tus TSWV tej txujci tseemceeb uas nws ua.

³Cia li zoo siab rau qhov peb yog Vajtswv tug; txhua tus uas pehawm nws cia li zoo siab.

⁴Cia li mus cuag tus TSWV thiab thov nws pab, thiab niaj hnub pehawm nws.

⁵Nej cov uas yog Anplahas uas yog tus TSWV tus tubtxib cov xeebntxwv, nej cov uas yog Yakhauj tus uas tus TSWV xaiv tseg cov xeebntxwv: nej yuav tsum nco ntsoov tej txujci tseemceeb uas tus TSWV ua thiab nws txojkev txiav txim.

⁷Tus TSWV yog peb tus Vajtswv; nws yog tus uas txiav txim rau neeg ntiajteb txhua tus.

⁸Nws yuav ceev nws tej lus cog tseg mus ibtxhis, nws tej lus cog tseg kav txog ib txhiab tiam neeg.

⁹Tus TSWV yuav ceev tej lus uas nws tau cog tseg rau Anplahas thiab tej lus uas nws tau cog tseg rau Ixaj lawm.

¹⁰Tus TSWV coglus nrog Yakhauj tib zaug xwb kav mus ibtxhis.

¹¹Nws hais tias, “Kuv yuav muab lub tebchaws Kana-as rau koj ua koj tug mus li.”

¹²Thaum Vajtswv haivneeg tsis tau huamvam coob, mas lawv tsiv ib qho rau ib qho hauv lub tebchaws Kana-as.

¹³Lawv tsiv ib haivneeg mus rau ib haivneeg, thiab lawv tsiv ib lub tebchaws mus rau ib lub tebchaws.

¹⁴Tiamsis Vajtswv tsis pub leejtwg tsimtxom lawv li; nws tsomkwm lawv thiab txwv tej vajntxwv hais tias:

¹⁵“Nej tsis txhob ua li cas rau cov tubtxib uas kuv xaiv lawm; nej tsis txhob kov kuv cov cevlus.”

¹⁶Tus TSWV rho lawv tej zaub mov lawm, thiab tso kev tshaib nqhis rau lawv lub tebchaws.

¹⁷Tiamsis nws tso ib tug txivneej ua lawv ntej mus, tus ntawd yog Yauxej, tus uas raug muab muag mus ua luag qhev.

¹⁸Luag muab saw hlau khi nws ob txhais kotaw, thiab muab khawb hlau khawm nws cajdab,

¹⁹mus txog thaum Yauxej tej lus tshwm muaj tseeb, tus TSWV tej lus ua timkhawv qhia hais tias Yauxej yog tus ncaj.

²⁰Ces tus vajntxwv uas kav tebchaws Iziv thiaj samhwm kom cov nomtswv uas saib pejxeem muab Yauxej tso.

²¹Vajntxwv tsa Yauxej ua ib tug nom loj thiab ua tus tswj thoob plaws lub tebchaws,

²²Yauxej muaj hwjchim loj tshaj vajntxwv tsoom nomtswv txhua tus, thiab muaj hwjchim samhwm rau vajntxwv cov tuavxam txhua tus.

²³Ces Yakhauj thiaj tsiv mus rau nram tebchaws Iziv, thiab mus nyob hauv lub tebchaws ntawd lawm.

²⁴Tus TSWV pub nws haivneeg muaj tubki huamvam coob thiab ua rau lawv muaj zog tshaj lawv cov yeebncuab.

²⁵Nws ua kom cov neeg Iziv ntxub nws haivneeg thiab dag ntxias nws cov tubtxib.

²⁶Ces nws txib Mauxes uas yog nws tus tubtxib, thiab Aloos tus uas nws xaiv tseg lawm mus.

²⁷Mauxes thiab Aloos tau ua Vajtswv tes haujlwm loj, thiab ua tej txujci tseemceeb nram tebchaws Iziv.

²⁸Vajtswv tso kev tsaus ntuj los rau hauv tebchaws Iziv, tiamsis cov neeg Iziv tsis mloog nws tej lus samhwm.

²⁹Tus TSWV muab lawv tej dej hloov ua ntshav thiab ua rau lawv tej ntses tuag tas huv tibsi.

³⁰Muaj qav los puv nkaus hauv lawv lub tebchaws; thiab los puv nkaus rau hauv vajntxwv lub loog.

³¹Vajtswv hais, ces txawm muaj yoov qaib thiab yoov ya los puv nkaus hauv lub tebchaws.

³²Vajtswv tso lawg hloov nag thiab ua xob laim cig liab vog los rau hauv lawv lub tebchaws;

³³Vajtswv ua rau lawv tej txiv hmab, txiv ncuavpias thiab tej ntoo lov tuag tas.

³⁴Vajtswv hais, ces txawm muaj kooj ya los, muaj ntau vam tus kooj yeej suav tsis txheeb li.

³⁵Cov kooj ntawd noj tej ntoo thiab tej qoobloo thoob plaws lub tebchaws tas dulug.

³⁶Vajtswv tua cov neeg Iziv txhua yim tus tub hlob tuag tas.

³⁷Ces tus TSWV thiaj coj cov Yixalayees khiav tawm; lawv coj nyiaj coj kub ntau heev nrog lawv mus, lawv txhua tus puavleej noj qab nyob zoo thiab muaj zog khov kho.

³⁸Cov Iziv ntshai cov Yixalayees kawg li, thiab zoo siab uas cov Yixalayees khiav mus lawm.

³⁹Vajtswv ua ib tauv huab los roos nws haivneeg, thiab ua tus nplaim hluavtaws rau lawv pom kev hmo ntuj.

⁴⁰Lawv thov, thiab nws tso noog ncuab los; nws tso manas saum ntuj los rau lawv noj nplua mias.

⁴¹Nws rua pobzeb, ces txawm dej txhawv tawm los, thiab ntws mus rau hauv tiaj suabpuam cuag li ib tug dej.

⁴²Nws nco ntsoov nws tej lus tseemceeb uas nws tau cog tseg rau nws tus tubtxib Anplahas lawm.

⁴³Yog li ntawd, nws thiaj coj haivneeg uas nws xaiv tseg tawm mus, ces lawv hu nkauj zoo siab kawg li.

⁴⁴Nws muab lwm haivneeg tej tebchaws los ua nws haivneeg tug, thiab cia nws haivneeg tau kav luag tej tebchaws.

⁴⁵Yog li ntawd, nws haivneeg thiaj li ceev nws tej kevcai, thiab ua raws li nws tej lus samhwm. Cia li qhuas tus TSWV!