Read Hmong Daw Phau Ntawv Nkauj 106 Bible Online

Phau Ntawv Nkauj 106 - Hmong Daw bible

Phau Ntawv Nkauj 106

¹Cia li qhuas tus TSWV! Cia li ua tus TSWV tsaug, rau qhov nws muaj lub siab dawb siab zoo, nws txojkev hlub nyob mus ibtxhis.

²Leejtwg thiaj muaj cuabkav piav tau tej txujci tseemceeb uas tus TSWV ua? Leejtwg thiaj txawj qhuas nws tas siab nrho?

³Cov neeg uas niaj hnub ua ncaj raws li tus TSWV tej lus samhwm, mas lawv yog cov uas muaj kev zoo siab kawg li.

⁴Tus TSWV, thaum koj pab koj haivneeg, thov koj nco ntsoov kuv; thaum koj cawm lawv thov xam txog kuv thiab.

⁵Thov kom kuv pom koj haivneeg vammeej thiab tau koom koj haivneeg ua neej nyob kaj siab lug, kom kuv thiaj tau nrog koj haivneeg tau koob meej.

⁶Peb tau ua txhaum ib yam li peb cov yawgkoob; peb tau ua kev txhaum thiab ua phem ua qias lawm.

⁷Thaum tseem nyob nram tebchaws Iziv peb cov yawgkoob tsis totaub Vajtswv tej txujci tseemceeb li; lawv tsis nco hais tias nws tau qhia nws txojkev hlub ntau zaus rau lawv, thiab thaum nyob rau ntawm Hiavtxwv Liab lawv tau ntxeev siab rau tus uas muaj Hwjchim Loj kawg nkaus.

⁸Txawm li ntawd los nws tseem cawm lawv raws li nws tau coglus tseg, yog nws xav qhia nws lub hwjchim loj rau lawv pom.

⁹Nws hais rau dej Hiavtxwv Liab, ces dej txawm faib hlo ua kev qhuav qhawv; nws coj nws haivneeg mus dhau rau sab tim ub.

¹⁰Nws pab lawv dim ntawm cov neeg uas ntxub lawv; nws cawm lawv dim ntawm lawv cov yeebncuab.

¹¹Dej hiavtxwv nphau nphwv los npog nkaus lawv cov yeebncuab; ua rau cov yeebncuab tuag tas tsis seem ib tug li.

¹²Nws haivneeg thiaj ntseeg nws tej lus cog tseg thiab hu nkauj qhuas nws.

¹³Tiamsis lawv txawm siv tsis nco qab tej txujci uas tus TSWV tau ua lawm, lawv lam tau lam ua tsis yuav Vajtswv ua tus tuavxam li.

¹⁴Thaum nyob nram tiaj suabpuam, lawv lub siab hlob xav tau ntau, lawv thiaj sim Vajtswv siab;

¹⁵nws muab tej uas lawv thov rau lawv, tiamsis nws tso tej kab mob uas txaus ntshai heev los rau lawv.

¹⁶Thaum nyob nram tiaj suabpuam lawv ua saib tsis taus Mauxes thiab Aloos uas yog tus TSWV ob tug tubtxib uas dawbhuv.

¹⁷Ces av txawm qhib plho nqos kiag Dathas thiab nphau los txhub Anpilas tsevneeg;

¹⁸hluavtaws poob los kub lawv cov kwvtij thiab hlawv cov neeg siab phem tuag tas huv tibsi.

¹⁹Lawv muab kub nchuav tau ib tug mlom nyuj rau ntawm roob Xinais thiab lawv pe tus mlom nyuj ntawd;

²⁰lawv muab tus mlom uas zoo li tus tsiaj noj zaub los hloov Vajtswv lub tshwjchim uas ci ntsa iab chaw.

²¹Lawv tsis nco qab Vajtswv tus uas tau ua tej txujci loj cawm lawv dim nram tebchaws Iziv lawm.

²²Tus TSWV tau ua tej txujci tseemceeb nyob nram tebchaws Iziv! Thiab tau ua tej txujci uas xav tsis thoob nyob ntawm Hiavtxwv Liab!

²³Thaum Vajtswv hais tias nws yuav ua kom nws haivneeg puastsuaj, Mauxes uas yog Vajtswv tus tubtxib uas nws xaiv txawm, sawv cheem tsis pub Vajtswv txojkev chim rhuav nws haivneeg.

²⁴Cov Yixalayees tsis kam mus nyob hauv lub tebchaws uas tau zoo, rau qhov lawv tsis ntseeg Vajtswv txojlus cog tseg.

²⁵Lawv nyob hauv lawv tej tsevntaub thiab yws tas zog, tsis kam mloog tus TSWV tej lus li.

²⁶Yog li ntawd, nws thiaj hais rau lawv tias nws yuav cia kom lawv tuag tas rau hauv tiaj suabpuam

²⁷thiab yuav muab lawv cov xeebntxwv raws khiav mus nyob ua sab ua sua xyaw lwm haivneeg; thiab yuav cia lawv tuag tas rau hauv luag tej tebchaws.

²⁸Thaum nyob hauv lub nroog Pe-aus Vajtswv haivneeg tau mus nrog luag pe Npa-as, thiab mus nrog luag noj tej uas muab fij rau tej vajtswv uas tsis muaj sia.

²⁹Tej uas lawv ua ntawd, ua rau tus TSWV npautaws, nws thiaj tso tej kab mob uas txaus ntshai heev los rau lawv.

³⁰Tiamsis Finehas txawm sawv tsees mus rau txim rau cov neeg uas ua txhaum, ces tej kab mob ntawd thiaj dua mus lawm.

³¹Qhov ntawd yog ua kom lawv nco ntsoov tseg ib tiam dhau ib tiam mus ibtxhis li.

³²Nyob ntawm lub qhovdej Melinpas, Mauxes ntxhov siab kawg li, vim cov Yixalayees tau ua rau tus TSWV chim heev.

³³Lawv tau ua rau Mauxes npautaws kawg li, Mauxes thiaj lam tau lam hais lus tsis xav tom ntej tom qab.

³⁴Lawv tsis muab cov yeebncuab tua kom tuag tas raws li tus TSWV hais,

³⁵tiamsis lawv mus nrog cov neeg ntawd ua tshoob ua kos, thiab mus xyaum ua raws li cov neeg ntawd ua.

³⁶Vajtswv haivneeg mus pe mlom, lawv thiaj mus mag luag lub vojhlua.

³⁷Lawv muab lawv tej tub tej ntxhais tua fij rau tej mlom hauv tebchaws Kana-as.

³⁸Lawv muab lawv tej menyuam uas tsis muaj txim tua; vim lawv tua neeg li ntawd, lawv lub tebchaws thiaj tsis huv lawm.

³⁹Tej uas lawv ua ntawd, ua rau lawv tsis huv, thiab lawv tsis muab siab npuab Vajtswv lawm.

⁴⁰Yog li ntawd, tus TSWV thiaj chim rau nws haivneeg; thiab nws dhuav lawv heev.

⁴¹Nws muab lawv cob rau lwm haivneeg txhais tes, thiab cia lawv cov yeebncuab tuaj kav lawv.

⁴²Lawv raug lawv cov yeebncuab tsimtxom thiab raug yuam ua qhev.

⁴³Tus TSWV tau pab lawv ntau zaus lawm, tiamsis lawv txhob txwm ntxeev siab rau nws, thiab lawv tau mus ua kev txhaum loj heev.

⁴⁴Txawm li ntawd los, thaum lawv thov tus TSWV, nws hnov lawv tej suab quaj, thiab nws pab lawv dim kev txomnyem.

⁴⁵Vim nws hlub tshua lawv, nws thiaj nco txog nws tej lus cog tseg, thiab vim nws txojkev hlub loj heev, nws thiaj hloov siab.

⁴⁶Nws ua rau cov neeg uas tsimtxom lawv paub tu siab rau tej uas lawv ua limhiam ntawd.

⁴⁷Tus TSWV uas yog peb tus Vajtswv, thov cawm peb, thiab coj peb ntawm hauv lwm haivneeg rov qab los kom peb thiaj tau ua koj tsaug thiab qhuas koj lub npe uas dawbhuv.

⁴⁸Cia li qhuas tus TSWV uas yog cov Yixalayees tus Vajtswv; cia li qhuas nws nimno thiab qhua mus ibtxhis li. Thiab sawvdaws hais tias, “Amees!” Cia li qhuas tus TSWV!