Read Hmong Daw Phau Ntawv Nkauj 107 Bible Online

Phau Ntawv Nkauj 107 - Hmong Daw bible

Phau Ntawv Nkauj 107

¹“Cia li ua tus TSWV tsaug, nws yog tus muaj lub siab zoo; nws txojkev hlub nyob mus ibtxhis!”

²Nej cov uas tus TSWV cawm dim lawm, cia li rov hais cov lus no txhua zaus uas nej qhuas tus TSWV. Nws tau cawm nej dim ntawm nej cov yeebncuab,

³thiab coj nej tawm hauv lwm haivneeg tej tebchaws, tsis hais sab hnubtuaj, sab hnubpoob, sab qaumteb thiab sab qabteb rov los.

⁴Muaj ibtxhia mus mus los los tom tiaj suabpuam, vim lawv nrhiav tsis tau kev mus rau hauv lub nroog uas lawv yuav mus nyob.

⁵Lawv tshaib plab thiab nqis dej heev, lawv tsis muaj chaw cia siab rau qhov twg li.

⁶Thaum lawv raug kev nyuaj siab, lawv hu txog tus TSWV, nws cawm lawv dim kev txomnyem.

⁷Nws coj lawv taug kev ncaj nraim mus rau hauv lub nroog uas lawv nyob.

⁸Lawv yuav tsum ua tus TSWV tsaug vim nws txojkev hlub uas tsis paub kawg, thiab vim tej txujci tseemceeb uas nws tau ua pab lawv lawm.

⁹Nws pub dej rau cov neeg nqhis dej haus kom txaus siab, thiab pub zaub mov zoo rau cov neeg tshaib plab noj tsau npo.

¹⁰Muaj qee leej nyob hauv txojkev uas tsaus ntuj nti thiab nyuaj siab ntxhov plawv kawg li, lawv raug luag muab saw hlau khi rau txim txomnyem ntsuav;

¹¹vim lawv tawv nyom tus Vajtswv uas muaj hwjchim loj kawg nkaus tej lus samhwm thiab tsis mloog nws tej lus qhia.

¹²Lawv qaug zog vim ua haujlwm hnyav heev; lawv ntog los tsis muaj leejtwg pab lawv.

¹³Thaum lawv raug kev nyuaj siab, lawv hu tus TSWV, nws cawm lawv dim txojkev txomnyem.

¹⁴Nws coj lawv tawm hauv txojkev nyuaj siab thiab ntxhov plawv uas tsaus ntuj nti los, thiab nws ua rau tej saw hlau uas khi lawv tu pes nrho.

¹⁵Lawv yuav tsum ua tus TSWV tsaug vim nws txojkev hlub uas tsis paub kawg, thiab vim nws tej txujci tseemceeb uas nws tau ua pab lawv lawm.

¹⁶Nws tsoo tej qhovrooj uas yog tooj povtseg, thiab tsoo tej nqaj hlau ntsoog mos nyoos.

¹⁷Muaj qee leej ruam thiab raug txomnyem vim tej kev txhaum thiab kev phem kev qias uas lawv ua;

¹⁸lawv dhuav zaub mov kawg li, lawv twb yuav tuag.

¹⁹Thaum lawv raug kev nyuaj siab, lawv hu tus TSWV, nws cawm lawv dim tej kev txomnyem.

²⁰Tus TSWV hais xwb, ces lawv tej mob txawm zoo thiab nws cawm lawv dim txojkev tuag.

²¹Lawv yuav tsum ua tus TSWV tsaug vim nws txojkev hlub uas tsis paub kawg, thiab vim tej txujci tseemceeb uas nws tau ua pab lawv lawm.

²²Lawv yuav tsum fij khoom ua nws tsaug thiab zoo siab luag ntxhi hu nkauj qhia txhua yam uas tus TSWV tau ua lawm rau sawvdaws mloog.

²³Muaj qee leej tsav nkoj mus los saum hiavtxwv, ua lag ua luam nrhiav noj.

²⁴Lawv pom tej haujlwm uas tus TSWV muaj tswvyim ua tau, yog nws tej txujci tseemceeb uas nyob hauv hiavtxwv.

²⁵Vajtswv hais xwb, ces txawm muaj tej nthwv cua ntsawj tuaj ua rau dej ntas nphau nphwv.

²⁶Tej nkoj tshoom pes plaws rau nruab ntug thiab poob rov los rau qhov tob. Tej xwm no ua rau neeg poob siab thiab ntshai kawg;

²⁷lawv ntog pujpoog ib yam li neeg qaug cawv, lawv tej kev txawj ntse pab tsis tau lawv lawm.

²⁸Thaum lawv raug kev nyuaj siab lawv hu tus TSWV, nws cawm lawv dim txojkev txomnyem.

²⁹Nws ua rau tej cua daj cua dub tu, thiab ua rau dej hiavtxwv nyob tus yees.

³⁰Lawv zoo siab heev vim cua daj cua dub tu thiab dej hiavtxwv tus lawm. Tus TSWV coj lawv los txog ntua lub chaw nres nkoj raws li lawv lub siab xav tsis raug kev nyuaj siab li cas.

³¹Lawv yuav tsum ua tus TSWV tsaug vim nws txojkev hlub uas tsis paub kawg, thiab vim tej txujci tseemceeb uas nws tau ua pab lawv lawm.

³²Lawv yuav tsum piav tus TSWV lub hwjchim loj rau zej tsoom sawvdaws paub, thiab qhuas nws rau ib tsoom thawjcoj uas tuaj ua ke sablaj mloog.

³³Tus TSWV ua rau tej dej tu qhuav qhawv thiab ua rau tej dej cag tu nrho tsis ntws li lawm.

³⁴Nws ua rau tej av rog qab ntsev tsis zoo cog dabtsi, vim cov neeg uas nyob hauv thaj av ntawd ua phem ua qias.

³⁵Nws muab tej tiaj suabpuam hloov ua pasdej; thiab ua kom muaj qhovdej txhawv hauv tebchaws mojsab qhua.

³⁶Nws cia cov neeg tshaib nqhis los nyob rau hauv, ces lawv txawm rhawv nroog nyob rau qhov ntawd.

³⁷Lawv cog qoob thiab txiv hmab rau hauv tej teb thiab sau tau qoobloo ntau nplua mias.

³⁸Nws foom koob hmoov rau nws haivneeg muaj tubki huamvam coob; nws tsis pub lawv tej tsiaj txhu tus noob li.

³⁹Thaum Vajtswv haivneeg swb rog, vim raug luag tsimtxom thiab raug kev txomnyem,

⁴⁰thaum ntawd Vajtswv thuam thiab saib tsis taus cov nomtswv, thiab ua kom lawv mus mus los los tom tiaj suabpuam uas tsis muaj kev.

⁴¹Tiamsis nws cawm cov neeg pluag kom dim txojkev txomnyem, thiab pub kom lawv tej tubki huamvam coob ib yam li tej pab yaj.

⁴²Thaum cov neeg ncaj ncees pom tej xwm no mas lawv zoo siab kawg li, tiamsis cov neeg ua phem nyob ntsiag to tsis hais ib lo lus li.

⁴³Thov kom cov neeg muaj tswvyim ras txog tej no; thov kom lawv lees paub hais tias tus TSWV yog tus uas muaj kev hlub uas tsis paub kawg.