Read Hmong Daw Phau Ntawv Nkauj 112 Bible Online

Phau Ntawv Nkauj 112 - Hmong Daw bible

Phau Ntawv Nkauj 112

¹Cia li qhuas tus TSWV! Tus uas hwm tus TSWV yog tus uas tau koob hmoov, tus uas txaus siab mloog tus TSWV tej lus yog tus uas tau kev zoo siab.

²Tus neeg siab zoo cajces yuav muaj hwjchim hauv lub tebchaws, nws cov xeebntxwv yuav tau koob hmoov.

³Nws cajces yuav muaj txiag nplua nuj thiab yuav vammeej mus li.

⁴Txawm yog cov neeg ncaj ncees nyob rau hauv qhov tsaus ntuj los qhov kaj yuav ci pom kev kaj nrig rau lawv, vim lawv muaj lub siab ncaj, hlub thiab tshua lwm tus.

⁵Tus uas ua siab dawb paug qiv rau luag, thiab ua haujlwm ncaj ncees yog tus uas tau koob hmoov.

⁶Tus uas ua ncaj ncees lub koob meej yuav tsis poob, luag yuav nco ntsoov nws mus ibtxhis.

⁷Txawm yog hnov tej xov tsis zoo los nws yeej tsis ntshai; nws ntseeg ruaj thiab tso siab rau tus TSWV.

⁸Nws tsis txhawj thiab tsis ntshai li; nws paub hais tias nws cov yeebncuab yuav swb.

⁹Nws ua siab dawb paug pub rau cov pluag, thiab nws hlub luag tsis tu li; nws yuav tau koob meej thiab sawvdaws yuav hwm nws.

¹⁰Cov neeg siab phem pom tej no mas lawv chim heev; lawv zawm hniav zog thiab ntxub nws heev los lawv kuj ploj tas; lawv tas kev cia siab mus ibtxhis li.