Read Hmong Daw Phau Ntawv Nkauj 115 Bible Online

Phau Ntawv Nkauj 115 - Hmong Daw bible

Phau Ntawv Nkauj 115

¹Tus TSWV, koj tib leeg, koj tib leeg xwb, thiaj yog tus tau koob meej! Peb tsis tsimnyog tau, rau qhov koj yog tus ncaj ncees thiab muaj txojkev hlub uas tsis paub kawg.

²Vim li cas lwm haivneeg yuav nug peb hais tias, “Nej tus Vajtswv nyob qhov twg?”

³Peb tus Vajtswv nyob saum ntuj; nws ua ib puas tsav yam raws li nws xav ua.

⁴Lawv tej mlom yog muab nyiaj thiab kub nchuav, tej ntawd puavleej yog neeg txhais tes ua xwb.

⁵Tej mlom ntawd muaj qhovncauj, tiamsis tsis txawj hais lus; muaj qhovmuag, tiamsis tsis pom kev;

⁶muaj pobntseg, tiamsis tsis hnov lus; muaj qhovntswg, tiamsis tsis hnov ntxhiab;

⁷muaj tes, tiamsis tsis txawj kov dabtsi, muaj kotaw, tiamsis tsis txawj tshais ruam; tej mlom ntawd ua tsis tau suab rov hauv qa tuaj li.

⁸Cov neeg uas nchuav mlom thiab cia siab rau tej mlom ntawd, lawv zoo li tej mlom uas lawv ncuav ntawd ntag.

⁹Cov Yixalayees, nej cia li tso siab rau tus TSWV. Nws yog tus pab nej thiab tiv thaiv nej.

¹⁰Vajtswv cov povthawj, nej cia li tso siab rau tus TSWV; Nws yog tus pab nej thiab tiv thaiv nej.

¹¹Txhua tus uas pehawm tus TSWV, nej cia li tso siab rau tus TSWV; Nws yog tus pab nej thiab tiv thaiv nej.

¹²Tus TSWV nco ntsoov peb thiab yuav foom koob hmoov rau peb; tus TSWV yuav foom koob hmoov rau cov Yixalayees thiab rau Vajtswv cov povthawj txhua tus.

¹³Nws yuav foom koob hmoov rau txhua tus uas hwm nws, tsis hais tus hlob tus yau huv tibsi.

¹⁴Thov tus TSWV pub kom nej thiab nej cov tubki muaj xeebntxwv coob!

¹⁵Thov tus TSWV uas tsim lub ntuj thiab lub ntiajteb, foom koob hmoov rau nej.

¹⁶Lub ntuj yog Vajtswv tib leeg li, tiamsis nws muab lub ntiajteb pub rau neeg nyob.

¹⁷Tus tuag uas mus nyob hauv lub chaw uas ntsiag to yeej tsis txawj qhuas tus TSWV lawm.

¹⁸Tiamsis peb cov uas muaj sia nyob peb yuav ua nws tsaug, nimno thiab mus ibtxhis li. Cia li qhuas tus TSWV!