Read Hmong Daw Phau Ntawv Nkauj 116 Bible Online

Phau Ntawv Nkauj 116 - Hmong Daw bible

Phau Ntawv Nkauj 116

¹Kuv hlub tus TSWV, vim nws hnov kuv tej lus; nws mloog kuv tej lus thov.

²Txhua zaus uas kuv thov nws, nws mloog kuv tej lus thov.

³Kev ploj kev tuag nyob ibncig kuv; lub qhov tuag nyob rawv tos kuv, ua rau kuv ntshai thiab lwj siab ntsuav li xwb.

⁴Ces kuv thov tus TSWV hais tias, “Tus TSWV, kuv thov koj cawm kuv txojsia lauj!”

⁵Tus TSWV yog tus muaj lub siab dawb siab zoo thiab ncaj ncees; peb tus Vajtswv yog tus muaj txojkev hlub.

⁶Tus TSWV tiv thaiv tus uas tas kev cia siab; thaum kuv raug kev txomnyem, nws cawm kuv dim.

⁷Kuv lub siab, cia li tso siab plhuav, rau qhov tus TSWV ua zoo rau kuv.

⁸Tus TSWV cawm kuv dim txojkev tuag; nws so kuv lub kua muag thiab tsis pub kuv swb li.

⁹Yog li ntawd, kuv thiaj ua kuv lub neej hauv ntiajteb no nrog cov neeg uas muaj sia nyob tabmeeg tus TSWV.

¹⁰Txawm yog muaj qee zaus kuv yws hais tias, “Kuv txomnyem heev,”

¹¹thiab thaum kuv ntshai, kuv hais tias, “Kuv tsis tso siab rau leejtwg li los kuv tseem ntseeg tus TSWV.”

¹²Tus TSWV ua txhua yam zoo rau kuv, kuv yuav muab dabtsi pauj nws txiaj ntsig?

¹³Kuv yuav coj cawv txiv hmab tuaj fij rau tus TSWV, ua nws tsaug rau qhov nws cawm kuv dim.

¹⁴Hnub uas Vajtswv haivneeg tuaj txoos ua ke kuv yuav coj tej uas kuv tau coglus tseg lawm tuaj fij rau nws.

¹⁵Thaum tus TSWV cov neeg ib tug uas muab siab npuab nws tuag, mas tus TSWV mob siab kawg li.

¹⁶Tus TSWV, kuv yog koj tus tubtxib; kuv ua koj tes haujlwm ib yam li kuv niam uas yog koj tus ntxhais qhev ua ntag. Koj twb daws txoj saw hlau uas khi kuv lawm.

¹⁷Kuv yuav muab khoom fij ua koj tsaug thiab thov koj;

¹⁸thaum koj haivneeg tuaj txoos ua ke rau hauv koj lub Tuamtsev hauv lub nroog Yeluxalees, kuv yuav muab tej uas kuv tau coglus tseg lawm fij rau koj. Cia li qhuas tus TSWV!