Read Hmong Daw Phau Ntawv Nkauj 119 Bible Online

Phau Ntawv Nkauj 119 - Hmong Daw bible

Phau Ntawv Nkauj 119

¹Cov neeg uas ua lub neej tsis muaj leejtwg thuam tau, thiab ua lub neej raws li tus TSWV txoj kevcai yog cov uas tau koob hmoov.

²Cov neeg uas ua lub neej raws li Vajtswv tej lus samhwm, thiab hwm nws kawg siab kawg ntsws yog cov uas tau koob hmoov.

³Lawv tsis ua kev phem kev qias, tiamsis lawv ua lub neej raws li tus TSWV tej lus qhia.

⁴Tus TSWV, koj tau muab koj tej kevcai cob rau peb, thiab qhia kom peb niaj hnub coj raws li tej kevcai ntawd.

⁵Thov pab kom kuv muaj lub siab npuab koj thiab ua raws li koj tej kevcai.

⁶Yog kuv ua raws li koj tej lus samhwm, ces kuv yuav tsis poob ntsejmuag li.

⁷Thaum kuv paub koj tej kevcai ncaj ncees lawm, kuv yuav qhuas koj ntawm lub siab dawb paug.

⁸Kuv yuav hwm koj tej kevcai; thov koj tsis txhob tso kuv tseg!

⁹Yuav ua li cas ib tug tub hluas thiaj ua tau nws lub neej kom dawbhuv? Yog nws yuav tsum coj raws li koj tej lus samhwm.

¹⁰Kuv ua koj tes haujlwm kom zoo kawg kuv lub siab lub ntsws; thov pab kom kuv txhob tawv dhau koj tej lus samhwm.

¹¹Kuv khaws koj tej lus rau hauv kuv lub siab, kuv thiaj tsis ua txhaum rau koj.

¹²Tus TSWV, kuv qhuas koj; thov qhia koj tej kevcai rau kuv.

¹³Kuv yuav muab tej kevcai uas koj qhia rau kuv lawm cim rau nruab siab.

¹⁴Kuv txaus siab ua raws li koj tej lus samhwm heev dua li txaus siab rau kev muaj txiag npluanuj.

¹⁵Kuv yuav niaj hnub kawm koj tej kevcai thiab cim ntsoov koj tej lus.

¹⁶Kuv txaus siab heev rau koj tej kevcai, thiab kuv yuav nco ntsoov koj tej lus samhwm.

¹⁷Thov koj ua zoo rau kuv uas yog koj tus tubtxib, kom kuv thiaj muaj txojsia nyob mloog koj tej lus.

¹⁸Thov koj qhib kuv ob lub qhovmuag kom kuv paub koj txoj kevcai thiab pom koj tej txujci tseemceeb.

¹⁹Kuv ua neej nyob hauv ntiajteb no ib vuag xwb, thov tsis txhob muab koj tej lus samhwm zais tsis qhia kuv paub.

²⁰Kuv lub siab xav paub koj tej kevcai txhua lub sijhawm los ntev lawm.

²¹Koj cem cov neeg khavtheeb, thiab foom tsis zoo rau cov neeg uas tsis mloog koj tej lus samhwm.

²²Thov koj pab kom kuv dim ntawm cov neeg uas saib tsis taus kuv thiab thuam kuv, rau qhov kuv niaj hnub ua raws li koj tej kevcai.

²³Txawm yog tej nomtswv tuavhauv ntxeev siab rau kuv, los kuv yuav kawm koj tej lus qhia tsis tso tseg li.

²⁴Koj tej lus ua rau kuv muaj kev kaj siab; tej lus ntawd yog tej uas qhuab ntuas kuv.

²⁵Kuv twb yuav tuag, kuv pw rau hauv av lawm xwb; thov koj tsa kuv sawv rov los raws li koj tau coglus tseg lawm.

²⁶Thaum kuv qhia txhua yam uas kuv tau ua tas los, thiab koj teb kuv tej lus thov lawm, thov koj qhia koj tej kevcai rau kuv.

²⁷Thov pab kom kuv totaub koj tej kevcai, thiab kuv yuav xav ntsoov koj tej lus qhuab qhia uas zoo rau nruab siab.

²⁸Tej kev nyuaj siab ua rau kuv lwj siab ntsuav; thov txhawb kuv lub zog raws li koj tau coglus tseg lawm.

²⁹Thov koj ua zoo rau kuv thiab qhia koj tej kevcai rau kuv kom kuv thiaj tsis yuam kev mus ua txhaum.

³⁰Kuv xaiv txojkev uas muab lub siab npuab koj; kuv ua lub neej raws li koj tej kevcai.

³¹Tus TSWV, kuv yeej ua raws li koj tej kevcai; thov tsis txhob cia kuv poob ntsejmuag.

³²Kuv yuav maj nroos ua raws li koj tej lus samhwm, rau qhov koj yuav ua rau kuv totaub tej lus ntawd.

³³Tus TSWV, thov qhia koj tej kevcai lub ntsiab rau kuv, kuv yuav niaj hnub ua raws li tej kevcai ntawd.

³⁴Thov qhia kom kuv totaub koj tej kevcai, kuv yuav coj tej kevcai ntawd kom kawg siab kawg ntsws.

³⁵Thov coj kuv txoj haukev kom mus raws li koj tej lus samhwm, rau qhov txoj kevcai ntawd ua rau kuv muaj kev kaj siab.

³⁶Thov koj pub kom kuv muaj lub siab txawj ntshaw koj tej kevcai heev dua kev muaj txiag npluanuj.

³⁷Thov koj pab kom kuv tswj tau kuv ob lub qhovmuag, tsis txhob saib tej yam tsis zoo; thov koj ua zoo rau kuv raws li koj tau coglus tseg lawm.

³⁸Thov koj ua raws li tej lus uas koj cog tseg rau kuv uas yog koj tus tubtxib, yog tej lus uas koj cog tseg rau cov neeg uas hwm koj.

³⁹Thov tshem txojkev poob ntsejmuag uas kuv ntshai kom deb ntawm kuv, rau qhov koj txoj kevcai ncaj ncees.

⁴⁰Kuv xav ua raws li koj tej lus samhwm, kuv lub siab xav ntsoov rau koj tej kevcai; thov pub txojsia tshiab rau kuv, rau qhov koj yog tus ncaj ncees.

⁴¹Tus TSWV, thov qhia rau kuv paub hais tias koj yeej hlub kuv tiag, thiab cawm kuv raws li koj tau coglus tseg lawm.

⁴²Kuv thiaj muaj lus teb cov neeg uas pheej thuam kuv, rau qhov kuv cia siab rau koj tej lus.

⁴³Thov pab kom kuv niaj hnub hais koj tej lus tseeb, rau qhov kuv cia siab ntsoov rau koj tej kevcai.

⁴⁴Kuv yuav niaj hnub ua raws li koj tej kevcai mus ibtxhis li.

⁴⁵Kuv yuav ua neej nyob tso siab plhuav, rau qhov kuv ua lub neej raws li koj tej kevcai.

⁴⁶Kuv yuav piav koj tej kevcai rau cov vajntxwv mloog, kuv yuav tsis txajmuag li.

⁴⁷Kuv ua neej raws li koj tej lus samhwm ua rau kuv muaj kev kaj siab, rau qhov kuv nyiam tej lus samhwm ntawd heev.

⁴⁸Kuv nyiam thiab hwm koj tej lus samhwm; kuv lub siab yuav xav ntsoov txog koj tej kevcai.

⁴⁹Thov koj nco ntsoov tej lus uas koj tau cog tseg rau kuv uas yog koj tus tubtxib lawm; tej lus cog tseg ntawd ua rau kuv muaj kev cia siab.

⁵⁰Txawm yog kuv raug kev txomnyem los tseem muaj koj txojlus nplig kuv siab, rau qhov koj tej lus cog tseg ua rau kuv muaj sia nyob.

⁵¹Cov neeg uas khavtheeb pheej txob thuam kuv, tiamsis kuv yeej tsis tso koj tej kevcai tseg li.

⁵²Tus TSWV, thaum kuv xav txog koj tej kevcai uas muaj nyob thaum ub los lawm, tej ntawd txhawb kuv zog kawg li.

⁵³Thaum kuv pom cov neeg siab phem tsis coj koj tej kevcai, mas mob kuv siab kawg li.

⁵⁴Thaum kuv tseem ua neej nyob hauv lub ntiajteb no, kuv tau muab koj tej kevcai sau ua nkauj hu.

⁵⁵Tus TSWV, thaum tsaus ntuj los kuv yeej nco ntsoov koj lub npe, thiab kuv ua raws li koj txoj kevcai.

⁵⁶Thaum kuv ua raws li koj tej lus samhwm, mas kuv muaj kev kaj siab kawg li.

⁵⁷Tus TSWV, koj yog ib puas tsav yam uas kuv xav yuav; kuv coglus tseg hais tias yuav ua raws li koj txoj kevcai.

⁵⁸Kuv thov koj kawg siab kawg ntsws kom koj hlub kuv raws li koj tau coglus tseg lawm.

⁵⁹Kuv twb tshuaj kuv lub neej tas lawm, kuv coglus hais tias kuv yuav ua raws li koj tej lus qhia;

⁶⁰Kuv tsis tos li lawm, kuv yuav rawm ua raws li koj tej lus samhwm.

⁶¹Cov neeg siab phem cuab hmuv tos kuv kev, tiamsis kuv yeej nco ntsoov koj txoj kevcai.

⁶²Ntuj teb tag hmo kuv sawv los qhuas koj, vim koj tej kevcai uas ncaj ncees.

⁶³Kuv ua phoojywg rau txhua tus uas hwm koj, thiab rau txhua tus uas ua raws li koj tej kevcai.

⁶⁴Tus TSWV, lub ntiajteb puv nkaus koj txojkev hlub uas tsis paub kawg; thov qhia koj tej kevcai rau kuv.

⁶⁵Tus TSWV, koj yeej ua raws li koj tej lus cog tseg, thiab ua zoo rau kuv uas yog koj tus tubtxib.

⁶⁶Thov pub tswvyim thiab kev txawj ntse rau kuv, rau qhov kuv cia siab rau koj tej lus samhwm heev.

⁶⁷Thaum koj tsis tau cia kuv raug kev txomnyem, kuv yuam kev ua txhaum. Tiamsis nimno kuv ua raws li koj tej lus qhia lawm

⁶⁸Koj yog tus ua zoo thiab muaj lub siab dawb; thov qhia koj tej kevcai rau kuv!

⁶⁹Cov neeg uas khavtheeb hais lus dag liam kuv, tiamsis kuv ua raws li koj tej kevcai kawg siab kawg ntsws.

⁷⁰Cov neeg ntawd tsis paub qabhau dabtsi, tiamsis koj txoj kevcai ua rau kuv zoo siab heev.

⁷¹Qhov uas koj cia kuv raug kev txomnyem muaj nqis rau kuv, rau qhov tej ntawd ua rau kuv paub koj tej kevcai.

⁷²Txoj kevcai uas koj muab rau kuv ntawd muaj nqis tshaj tej nyiaj tej kub hauv ntiajteb no.

⁷³Koj yog tus tsim kuv thiab cawm kuv dim; thov pub kom kuv totaub, kuv thiaj kawm tau koj tej kevcai.

⁷⁴Thaum cov neeg uas hwm koj pom kuv mas lawv yuav zoo siab heev, rau qhov kuv cia siab rau koj tej lus cog tseg.

⁷⁵Tus TSWV, kuv paub hais tias koj txojkev txiav txim yeej ncaj ncees, qhov uas koj rau txim rau kuv, koj yeej ua ncaj lawm.

⁷⁶Thov cia koj txojkev hlub uas tsis paub kawg nplig kuv lub siab raws li koj tau coglus rau kuv uas yog koj tus tubtxib lawm.

⁷⁷Thov koj hlub kuv, kuv thiaj muaj sia nyob, rau qhov koj tej kevcai ua rau kuv zoo siab heev.

⁷⁸Thov kom cov neeg uas khavtheeb raug kev txajmuag, rau qhov lawv lam tau lam liam kuv; tiamsis kuv yuav cim kom tau koj tej kevcai rau nruab siab.

⁷⁹Thov cia cov neeg uas hwm koj tuaj cuag kuv, kom lawv thiaj yuav paub koj tej kevcai.

⁸⁰Thov kom kuv txawj hwm koj tej kevcai kawg siab kawg ntsws, kuv thiaj tsis raug kev txajmuag.

⁸¹Tus TSWV, kuv twb yuav tuag, kuv tos ntsoov koj txojkev cawm dim; kuv cia siab ntsoov rau koj tej lus.

⁸²Kuv tos koj tej lus cog tseg tau ntev heev, kuv ob lub qhovmuag qhib tsis taus li lawm, thaum ntawd kuv hais tias, “Tav twg koj mam li los pab kuv?”

⁸³Kuv tsis muaj nqis ib yam li lub hnab tawv ntim cawv txiv hmab uas luag tsis siv lawm; tiamsis kuv yeej nco ntsoov koj tej kevcai.

⁸⁴Kuv uas yog koj tus tubtxib tseem yuav ua siab ntev tos txog tav twg? Thaum twg koj mam li rau txim rau cov neeg uas tsimtxom kuv?

⁸⁵Cov neeg khavtheeb uas tsis hwm koj txoj kevcai khawb qhov tos kuv kev.

⁸⁶Koj tej kevcai yog tej uas tso siab tau rau; muaj neeg tsimtxom kuv, thov koj pab kuv!

⁸⁷Lawv txov yuav luag tau kuv txojsia kom ploj hauv ntiajteb no mus, tiamsis kuv yeej tsis tso koj tej kevcai tseg li.

⁸⁸Rau qhov koj txojkev hlub uas tsis paub kawg ua zoo rau kuv, kuv thiaj ua taus raws li koj tej kevcai.

⁸⁹Tus TSWV, koj txojlus yuav nyob mus ibtxhis; thiab nyob ruaj nrees saum ntuj ceebtsheej mus li.

⁹⁰Koj txojkev ncaj ncees nyob ib tiam dhau ib tiam; koj teeb lub ntiajteb no tseg li cas, nws yuav nyob li ntawd mus li.

⁹¹Ib puas tsav yam nyob ruaj khov kho los txog niaj hnub no, twb yog vim tej lus uas koj tau hais tseg, rau qhov ib puas tsav yam ntawd yog koj tej tubtxib.

⁹²Yog koj txoj kevcai tsis ua lub hauvpaus uas ua rau kuv zoo siab, ces kuv yuav ris tej kev txomnyem ntawd tuag li.

⁹³Kuv yuav nco ntsoov koj tej lus qhia mus ibtxhis, vim muaj tej lus ntawd koj thiaj tseg kuv txojsia nyob.

⁹⁴Kuv yog koj tug, thov koj cawm kom kuv dim; kuv yeej ibtxwm xyaum ua raws li koj tej kevcai.

⁹⁵Cov neeg siab phem tos rawv tua kuv povtseg, tiamsis kuv yuav ua tib zoo xyuas koj tej kevcai saib hais li cas.

⁹⁶Kuv paub hais tias tsis muaj ib yam dabtsi uas yuav zoo tas huv tibsi; tiamsis koj tej kevcai yeej zoo kawg nkaus li.

⁹⁷Kuv nyiam koj txoj kevcai kawg nkaus li! Kuv xav ntsoov koj txoj kevcai ntawd tas hnub tas hmo.

⁹⁸Kuv coj raws li koj txoj kevcai txhua lub sijhawm, txoj kevcai ntawd ua rau kuv ntse dua kuv cov yeebncuab.

⁹⁹Kuv paub dua kuv cov xibhwb, rau qhov kuv ua tib zoo xyuas koj tej lus qhia saib hais li cas.

¹⁰⁰Kuv txawj ntse dua cov neeg laus, rau qhov kuv ua raws li koj tej kevcai.

¹⁰¹Kuv yeej tsis nyiam ua kev phem kev qias, rau qhov kuv xav ua raws li koj txojlus.

¹⁰²Kuv nco ntsoov koj tej lus qhia, rau qhov koj yog tus xibhwb uas qhia kuv ntag.

¹⁰³Koj tej lus qhia qab zib tshaj zib ntab lawm thiab.

¹⁰⁴Koj tej kevcai ua rau kuv muaj tswvyim. Yog li ntawd, kuv thiaj ntxub ib puas tsav yam kev phem.

¹⁰⁵Koj txojlus zoo ib yam li lub teeb uas taws ua kuv ntej thiab ci rau kuv txoj haukev.

¹⁰⁶Kuv yuav mloog tej lus tseeb uas koj qhia raws li kuv tau coglus tseg rau koj lawm.

¹⁰⁷Tus TSWV, kuv raug kev txomnyem heev, thov koj pub kuv muaj sia ua neej nyob raws li tej lus uas koj cog tseg.

¹⁰⁸Tus TSWV, thov koj lees tej lus uas kuv ua koj tsaug thiab thov qhia koj tej kevcai rau kuv.

¹⁰⁹Kuv yeej txaus siab tuag txhua lub sijhawm; kuv yeej ncov ntsoov koj txoj kevcai rau nruab siab.

¹¹⁰Cov neeg siab phem cuab hmuv tos kuv kev, tiamsis kuv tsis hla koj tej kevcai li.

¹¹¹Koj tej kevcai yog kuv peev nyiaj mus ibtxhis; thiab ua rau kuv zoo siab twjywm rau nruab siab.

¹¹²Kuv txiav txim siab ua raws li koj tej kevcai mus txog hnub kawg.

¹¹³Kuv ntxub cov neeg uas tsis muab siab npuab koj, tiamsis kuv nyiam koj txoj kevcai kawg li.

¹¹⁴Koj yog tus tuaj kuv tog thiab tiv thaiv kuv, kuv cia siab rau koj tej lus cog tseg.

¹¹⁵Nej cov uas ua phem ua qias cia li khiav ntawm kuv mus. Kuv yuav ua raws li kuv tus Vajtswv tej lus samhwm.

¹¹⁶Thov txhawb kuv lub zog raws li koj coglus tseg lawm, kuv thiaj muaj sia nyob; thov tsis txhob cia kuv txojkev cia siab ua rau kuv poob ntsejmuag.

¹¹⁷Thov tuav kuv tes, kuv thiaj kaj siab lug, kuv yuav niaj hnub ua raws li koj tej kevcai mus ibtxhis.

¹¹⁸Koj tsis lees paub cov uas tsis ua raws koj tej kevcai; lawv tej kev dag ntxias tsis muaj qabhau dabtsi li.

¹¹⁹Koj saib cov neeg siab phem tsis muaj nqis li tej quav tooj quav hlau, tiamsis kuv nyiam koj tej lus qhia kawg li.

¹²⁰Kuv ibce tshee hnyo vim kuv ntshai koj, thiab kuv ntshai koj txojkev txiav txim kawg nkaus li.

¹²¹Kuv ua qhov tseeb thiab qhov zoo xwb; thov tsis txhob tso kuv rau kuv cov yeebncuab.

¹²²Thov koj coglus hais tias koj yuav pab koj tus tubtxib; thov tsis txhob cia cov neeg khavtheeb tsimtxom kuv!

¹²³Kuv ob lub qhovmuag qhib tsis taus vim tos koj tuaj cawm kuv, rau qhov koj tau coglus tseg rau kuv lawm.

¹²⁴Thov ua zoo rau kuv raws li koj txojkev hlub uas tsis paub kawg, thiab qhia koj tej kevcai rau kuv.

¹²⁵Kuv yog koj tus tubtxib, thov koj pab kom kuv totaub, kuv thiaj yuav paub koj tej lus qhia ntawd.

¹²⁶Tus TSWV, twb yog lub sijhawm uas koj rau txim lawm, vim neeg tsis hwm koj txoj kevcai.

¹²⁷Kuv nyiam koj tej kevcai tshaj nyiam kub, thiab nyiam tshaj tej uas tseem kub.

¹²⁸Yog li ntawd, kuv thiaj ua raws li koj tej kevcai; kuv ntxub txhua yam kev txhaum huv tibsi.

¹²⁹Koj tej lus qhia ua rau neeg xav tsis thoob li; kuv yuav coj raws li koj tej lus ntawd kom kawg siab kawg ntsws.

¹³⁰Koj tej lus qhia ua qhov kaj ci pom kev rau kuv, thiab ua rau cov neeg ruam kom txawj ntse tuaj.

¹³¹Kuv tshaib nqhis koj tej lus qhuav siab qhawv.

¹³²Thov koj tig los rau ntawm kuv thiab hlub kuv ib yam li koj ua rau cov neeg uas hlub koj.

¹³³Thov koj tuav kuv kom nyob ruaj khov rau ntawm koj, raws li koj tau coglus tseg lawm, thiab tsis txhob cia tej kev phem kev qhia kovyeej kuv.

¹³⁴Thov cawm kom kuv dim ntawm cov neeg uas tsimtxom kuv, kuv thiaj tau ua raws li koj tej lus samhwm.

¹³⁵Thov koj nrog nraim kuv nyob thiab qhia kom kuv paub koj tej kevcai.

¹³⁶Kuv tej kua muag ntws si laim ib yam li dej ntws, vim tej neeg tsis ua raws koj tej kevcai.

¹³⁷Tus TSWV, koj yog tus uas ncaj ncees, thiab koj tej kevcai yog tej uas tseeb kawg nkaus.

¹³⁸Tej kevcai uas koj muab rau peb coj ncaj thiab tseeb kawg li.

¹³⁹Kuv npautaws ua rau kuv lub siab kub cuag hluavtaws hlawv, vim kuv cov yeebncuab tsis ua raws li koj tej lus qhia.

¹⁴⁰Koj tej lus cog tseg yuav nyob ruaj nrees; kuv nyiam koj tej lus cog tseg heev!

¹⁴¹Kuv yog neeg tsis tseemceeb thiab luag saib tsis taus kuv, tiamsis kuv nco ntsoov koj tej lus qhia.

¹⁴²Koj txojkev ncaj ncees yuav nyob mus ibtxhis, thiab koj txoj kevcai ibtxwm yog txoj tseeb.

¹⁴³Kuv raug kev nyuaj siab ntxhov plawv, tiamsis koj tej kevcai ua rau kuv muaj kev kaj siab.

¹⁴⁴Koj tej lus qhia yeej ibtxwm yog lus tseeb; thov koj pub kom kuv totaub kuv thiaj muaj sia nyob.

¹⁴⁵Tus TSWV, kuv quaj thov koj kawg siab kawg ntsws; thov koj teb kuv, kuv yuav ua raws li koj tej lus samhwm!

¹⁴⁶Kuv quaj hu koj; thov koj cawm kuv, kuv yuav ua raws li koj txoj kevcai.

¹⁴⁷Ua ntej lub hnub tawm tuaj, kuv twb thov koj pab kuv lawm; kuv cia siab ntsoov rau koj tej lus cog tseg.

¹⁴⁸Kuv pw tsis tsaug zog ib hmos kaj ntug, rau qhov kuv xav ntsoov txog koj tej lus cog tseg.

¹⁴⁹Tus TSWV, thov koj mloog kuv tej lus thov, rau qhov koj yog tus muaj txojkev hlub uas tsis paub kawg, thov koj hlub kuv thiab tseg kuv txojsia!

¹⁵⁰Cov neeg siab phem uas tsimtxom kuv tuaj ze kuv heev lawm, lawv yog cov neeg uas tsis ua raws li koj txoj kevcai.

¹⁵¹Tiamsis tus TSWV, koj nyob nrog nraim kuv, thiab koj tej lus samhwm puavleej yog lus tseeb.

¹⁵²Kuv twb paub koj tej kevcai puag thaum ub los lawm; tej kevcai uas koj rhawv ntawd nyob mus ibtxhis li.

¹⁵³Thov koj tsa qhovmuag saib kuv tej kev txomnyem thiab pab kom kuv dim, rau qhov kuv yeej nco ntsoov koj tej kevcai.

¹⁵⁴Thov koj pab hais kuv rooj plaub thiab tso kuv dim; thov cawm kom kuv dim raws li koj tej lus cog tseg.

¹⁵⁵Cov neeg siab phem yuav tsis dim, vim lawv tsis ua raws li koj tej kevcai.

¹⁵⁶Tiamsis tus TSWV, koj txojkev hlub loj kawg nkaus li, thov koj hlub thiab cawm kom kuv dim!

¹⁵⁷Kuv muaj yeebncuab thiab muaj neeg tsimtxom kuv coob heev, tiamsis kuv tsis tau tso koj tej kevcai tseg li.

¹⁵⁸Thaum kuv tsa qhovmuag saib cov neeg ntxeev siab, kuv dhuav kawg nkaus li, vim lawv tsis ua raws li koj tej lus qhia.

¹⁵⁹Tus TSWV, koj yeej paub hais tias kuv nyiam koj tej lus qhuab qhia npaum li cas. Koj yeej tsis hloov koj txojkev hlub li; yog li ntawd, thov cawm kuv lauj!

¹⁶⁰Koj txoj kevcai lub ntsiab yeej yog lus tseeb; koj txojkev txiav txim uas ncaj ncees nyob mus ibtxhis.

¹⁶¹Kuv tsis tau ua txhaum los cov neeg uas muaj hwjchim lam tau lam tsimtxom kuv, tiamsis kuv yeej hwm koj txoj kevcai kawg siab li.

¹⁶²Koj tej lus cog tseg ua rau kuv zoo siab npaum li tus neeg uas mus nrhiav tau ib lub qhov nyiaj.

¹⁶³Kuv ntxub thiab dhuav cov neeg uas hais lus dag, tiamsis kuv nyiam koj txoj kevcai heev.

¹⁶⁴Ib hnub twg kuv ua koj tsaug xya zaus vim koj txoj kevcai uas ncaj ncees.

¹⁶⁵Cov neeg uas nyiam koj txoj kevcai nyob tso siab plhuav, thiab tsis muaj ib yam dabtsi ua rau lawv dawm ntog li.

¹⁶⁶Tus TSWV, kuv tos ntsoov koj cawm kuv, thiab kuv ua raws li koj tej lus samhwm.

¹⁶⁷Kuv ua raws li koj tej lus qhia; kuv nyiam koj tej lus kawg siab kawg ntsws.

¹⁶⁸Kuv ua raws li koj tej kevcai thiab koj tej lus samhwm, koj yeej pom ntsoov txhua yam uas kuv ua tas los.

¹⁶⁹Tus TSWV, thov kom kuv tej lus thov tuaj txog koj! Thov pub kom kuv totaub raws li koj tau coglus tseg.

¹⁷⁰Thov mloog kuv tej lus thov, thiab pab kom kuv dim raws li koj tau coglus tseg!

¹⁷¹Kuv yuav niaj hnub ua koj tsaug, rau qhov koj qhia koj txoj kevcai rau kuv.

¹⁷²Thov kom kuv tus nplaig hu nkauj qhuas koj txoj kevcai, rau qhov koj tej lus samhwm yog lus tseeb.

¹⁷³Thov koj npaj rawv pab kuv, rau qhov kuv ua raws li koj tej lus qhia.

¹⁷⁴Tus TSWV, kuv tos koj ntev loo los cawm kom kuv dim, thiab koj tej kevcai ua rau kuv nyob kaj siab lug.

¹⁷⁵Thov koj pub kom kuv muaj sia nyob, kuv thiaj tau qhuas koj, thiab thov cia koj tej lus qhia pab kuv.

¹⁷⁶Kuv ncig mus ncig los ib yam li tus yaj uas yuam kev lawm, thov koj tuaj nrhiav kuv uas yog koj tus tubtxib, rau qhov kuv yeej nco tsoov koj tej kevcai rau nruab siab.