Read Hmong Daw Phau Ntawv Nkauj 12 Bible Online

Phau Ntawv Nkauj 12 - Hmong Daw bible

Phau Ntawv Nkauj 12

¹Tus TSWV, thov koj pab peb lauj! Tsis tshuav ib tug neeg uas ua zoo seem nyob qhov twg li; neeg ntiajteb cov uas ncaj ncees twb ploj tas lawm.

²Lawv ib leeg dag ib leeg; lawv ib leeg ntxias ib leeg ntawm tej lus mos lus muag.

³Tus TSWV! Thov koj muab tus nplaig uas txawj dag ntxias txiav thiab ntsaws lub qhovncauj uas khavtheeb hais tias,

⁴“Peb xav yuav yam twg, peb yeej tau yam ntawd. Peb yuav hais raws li peb lub siab nyiam los yeej tau, tsis muaj leejtwg txwv peb li.”

⁵Tus TSWV hais tias, “Kuv yuav los tamsim no ntag, rau qhov cov neeg txomnyem raug tsimtxom hnyav heev thiab cov neeg nyuaj siab quaj tu siab kawg li. Kuv yuav muab txojkev uas nyob tso siab lug uas lawv twb tos los tau ntev lawm rau lawv.”

⁶Tus TSWV tej lus cog tseg yog tej uas cia siab tau, tej lus ntawd muaj nqis ib yam li tej nyiaj uas nchuav tawm hauv lub yeejvub xya zaus los lawm.

⁷Cov neeg siab phem nyob txhua qhov thiab txhua tus puavleej nyiam ua phem ua qias. Tus TSWV, thov tiv thaiv peb kom peb tau kev kaj siab, thiab tsomkwm peb kom dim ntawm cov neeg siab phem.