Read Hmong Daw Phau Ntawv Nkauj 130 Bible Online

Phau Ntawv Nkauj 130 - Hmong Daw bible

Phau Ntawv Nkauj 130

¹Tus TSWV, kuv txomnyem ntsuav thiab tws kev lawm, kuv thiaj tsa ncauj thov koj pab.

²Tus TSWV, thov koj mloog kuv lub suab hu; thov mloog tej lus uas kuv thov koj pab kuv!

³Yog koj cim peb tej kev txhaum cia lawm, leejtwg thiaj khiav dim tsis raug txim?

⁴Tiamsis koj zam txim rau peb, peb thiaj hwm koj thiab mloog koj lus.

⁵Kuv tos tus TSWV pab kuv kawg siab kawg ntsws thiab kuv tso siab rau nws tej lus.

⁶Kuv kub siab lug tos tus TSWV heev dua tej tub fajxwm ceeb laj tos kaj ntug, ceeb laj tos heev dua tej tub fajxwm tos kom kaj ntug.

⁷Cov Yixalayees, nej cia li tso siab rau tus TSWV, rau qhov nws muaj txojkev hlub uas tsis paub kawg thiab nws tos rawv yuav cawm kom nej dim.

⁸Nws yuav pab nws haivneeg Yixalayees kom dim ntawm lawv tej kev txhaum huv tibsi.