Read Hmong Daw Phau Ntawv Nkauj 136 Bible Online

Phau Ntawv Nkauj 136 - Hmong Daw bible

Phau Ntawv Nkauj 136

¹Cia li ua tus TSWV tsaug, rau qhov nws yog tus muaj lub siab dawb siab zoo, nws txojkev hlub nyob mus ibtxhis.

²Cia li ua tsaug rau tus Vajtswv ntawm txhua tus vajtswv, rau qhov nws txojkev hlub nyob mus ibtxhis.

³Cia li ua tsaug rau tus TSWV ntawm txhua tus tswv, rau qhov nws txojkev hlub nyob mus ibtxhis.

⁴Nws tib leeg thiaj yog tus uas ua tau tej txujci tseemceeb, rau qhov nws txojkev hlub nyob mus ibtxhis.

⁵Nws yog tus muaj lub tswvyim uas tsim lub ntuj, rau qhov nws txojkev hlub nyob mus ibtxhis;

⁶nws tsim lub ntiajteb rau saum cov dej uas tob heev, rau qhov nws txojkev hlub nyob mus ibtxhis.

⁷Nws yog tus tsim lub hnub thiab lub hli, rau qhov nws txojkev nyob mus ibtxhis;

⁸lub hnub cia kav nruab hnub, rau qhov nws txojkev hlub nyob mus ibtxhis;

⁹lub hli thiab tej hnubqub cia kav hmo ntuj, rau qhov nws txojkev hlub nyob mus ibtxhis.

¹⁰Nws yog tus tua cov Iziv tej tub hlob, rau qhov nws txojkev hlub nyob mus ibtxhis.

¹¹Nws coj cov Yixalayees tawm hauv tebchaws Iziv, rau qhov nws txojkev hlub nyob mus ibtxhis;

¹²ntawm nws txhais tes uas muaj zog thiab txhais npab uas muaj hwjchim, rau qhov nws txojkev hlub nyob mus ibtxhis.

¹³Nws ua rau Hiavtxwv Liab faib hlo rau ob sab, rau qhov nws txojkev hlub nyob mus ibtxhis;

¹⁴nws coj nws haivneeg hla dhau mus rau sab dej tim ub, rau qhov nws txojkev hlub nyob mus ibtxhis;

¹⁵tiamsis nws ua rau hiavtxwv nphau los npog Falaus cov tubrog, rau qhov nws txojkev hlub nyob mus ibtxhis.

¹⁶Nws coj nws haivneeg hla dhau tiaj suabpuam, rau qhov nws txojkev hlub nyob mus ibtxhis;

¹⁷nws tua cov vajntxwv uas muaj hwjchim, rau qhov nws txojkev hlub nyob mus ibtxhis;

¹⁸nws tua cov vajntxwv ua muaj koob meej nto moo lug, rau qhov nws txojkev hlub nyob mus ibtxhis;

¹⁹Xihoos uas yog tus vajntxwv kav cov Amaules, rau qhov nws txojkev hlub nyob mus ibtxhis;

²⁰thiab Aunkas uas yog tus vajntxwv kav tebchaws Npasas, rau qhov nws txojkev hlub nyob mus ibtxhis;

²¹nws muab cov neeg ntawd tej tebchaws rau nws haivneeg nyob, rau qhov nws txojkev hlub nyob mus ibtxhis;

²²nws muab tej tebchaws ntawd pub rau Yixalayees uas yog nws tus tubtxib, rau qhov nws txojkev hlub nyob mus ibtxhis.

²³Thaum peb raug tua swb los nws nco ntsoov peb, rau qhov nws txojkev hlub nyob mus ibtxhis;

²⁴nws tso peb dim ntawm peb cov yeebncuab, rau qhov nws txojkev hlub nyob mus ibtxhis.

²⁵Nws pub rau neeg thiab tej tsiaj muaj noj muaj haus tsau npo, rau qhov nws txojkev hlub nyob mus ibtxhis.

²⁶Cia li ua tsaug rau Vajtswv tus uas nyob saum ntuj, rau qhov nws txojkev hlub nyob mus ibtxhis.