Read Hmong Daw Phau Ntawv Nkauj 139 Bible Online

Phau Ntawv Nkauj 139 - Hmong Daw bible

Phau Ntawv Nkauj 139

¹Tus TSWV, koj tshawb saib kuv lub siab thiab lub neej, koj yeej paub zoo.

²Koj paub ib puas tsav yam uas kuv ua, txawm yog nyob deb los koj yeej paub tej uas kuv lub siab xav huv tibsi.

³Koj yeej pom ntsoov kuv tsis hais thaum kuv ua haujlwm lossis kuv so, koj paub tej uas kuv ua huv tibsi.

⁴Txawm yog thaum kuv tseem tsis tau hais lus los koj twb xub paub ua ntej lawm hais tias kuv yuav hais dabtsi.

⁵Koj nyob puagncig kuv, koj lub tshwjchim tiv thaiv kuv.

⁶Koj yeej paub hais tias kuv yog neeg zoo li cas.

⁷Kuv yuav khiav mus nkaum qhov twg thiaj khiav dim koj? Kuv yuav khiav mus nkaum qhov twg, koj thiaj tsis pom kuv?

⁸Txawm yog kuv nce mus txog saum ntuj ceebtsheej los koj yeej nyob saud, yog kuv nqis mus rau hauv tubtuag teb los koj yeej nyob hauv thiab.

⁹Yog kuv ya mus dhau rau sab hnubtuaj lossis sab hnubpoob

¹⁰los koj yuav nyob qhov ntawd coj kuv kev, koj yuav nyob qhov ntawd pab kuv.

¹¹Txawm yog kuv hu kom qhov tsaus ntuj los roos kuv lossis kom qhov kaj uas nyob puagncig kuv hloov ua qhov tsaus ntuj,

¹²los qhov tsaus ntuj twb tsis tsaus rau koj li; hmo ntuj los koj yeej pom kev kaj nrig ib yam li nruab hnub, koj saib qhov tsaus kaj nrig ib yam li qhov kaj.

¹³Koj yog tus tsim kuv lub cev txhua yam huv tibsi, thiab koj yog tus uas puab kuv rau hauv kuv niam plab.

¹⁴Kuv qhuas koj rau qhov koj thiaj yog tus uas tsimnyog sawvdaws hwm, tej uas koj ua mas kuv xav tsis thoob thiab tsis txawj piav li, tiamsis kuv paub hais tias tej ntawd yeej yog koj ua.

¹⁵Thaum kuv tej pobtxha tabtom hlob tuaj sib dhos ua ke hauv kuv niam plab, thiab kuv hlob nraim nkoos hauv nruab thiab los koj yeej paub hais tias kuv nyob hauv.

¹⁶Thaum kuv tseem tsis tau yug los, koj twb pom kuv lawm, kuv tej hnubnyoog ua neej nyob, koj twb xub muab sau rau hauv koj phau ntawv ua ntej uas tsis tau muaj tej hnubnyoog ntawd lawm.

¹⁷Vajtswv, kuv totaub nyuaj tej uas koj xav kawg li. Koj xav txhij xav txhua ua rau kuv suav tsis txheeb li!

¹⁸Yog kuv suav txheeb tej uas koj xav, ntshai muaj ntau dua tej suabzeb, thaum kuv tsim dheev los kuv tseem nrog koj nyob.

¹⁹Vajtswv, kuv xav kom koj muab cov neeg ua phem ua qias tua povtseg, kuv xav kom cov neeg limhiam txav deb ntawm kuv mus.

²⁰Lawv hais tej lus phem thuam koj, lawv hais saib tsis taus koj lub npe.

²¹Tus TSWV, kuv ntxub cov neeg uas ntxub koj kawg li, thiab kuv dhuav cov neeg ntxeev siab uas tawmtsam koj.

²²Kuv ntxub lawv kawg nkaus li, kuv suav hais tias lawv yog kuv cov yeebncuab.

²³Vajtswv, thov koj tshuaj kuv kom paub kuv lub siab, thov koj sim kuv thiab nthuav tej uas kuv lub siab xav saib zoo li cas.

²⁴Thov koj saib kuv lub siab saib puas muaj qhov txhaum li cas, thiab thov koj coj kuv taug txojkev uas nyob mus ibtxhis.