Read Hmong Daw Phau Ntawv Nkauj 140 Bible Online

Phau Ntawv Nkauj 140 - Hmong Daw bible

Phau Ntawv Nkauj 140

¹Tus TSWV, thov koj pab kom kuv dim ntawm cov neeg siab phem, thov cawm kom kuv dim ntawm cov neeg limhiam.

²Lawv lub siab pheej xav ntsoov ua phem nkaus xwb, thiab niaj hnub do kom muaj kev sib cav sib ceg.

³Lawv tus nplaig muaj taug ib yam li taug nab, thiab lawv tej lus muaj taug ib yam li taug nab raj kubsai.

⁴Tus TSWV, thov koj tiv thaiv kuv kom dim ntawm cov neeg siab phem lub hwjchim, thov cawm kom kuv dim ntawm cov neeg uas xav txov kuv txojsia.

⁵Cov neeg khavtheeb cuab hmuv tos kuv kev, lawv cuab vas thiab cuab hmuv raws ntug kev kom mag kuv.

⁶Kuv hais rau tus TSWV hais tias, “Koj yog kuv tus Vajtswv.” Tus TSWV, thov koj mloog tej lus uas kuv thov koj pab kuv!

⁷Tus TSWV, kuv tus TSWV, tus tiv thaiv kuv uas muaj zog heev, koj twb cawm kuv dim hauv tshavrog los lawm.

⁸Tus TSWV, thov koj tsis txhob pub rau cov neeg siab phem raws li lawv thov, thov tsis txhob pub kom lawv tej kev ntxeev siab ntawd tiav.

⁹Thov koj tsis txhob pub kuv cov yeebncuab kovyeej kuv, thov kom tej lus phem uas lawv hais rov los raug lawv.

¹⁰Thov kom cov hluavncaig uas cig liab ploog poob los rau saum lawv taubhau, thov muab lawv pov rau hauv qhov ntuj kom tawm tsis tau los li.

¹¹Thov kom cov neeg uas liam luag tsis tseeb tsis txhob yeej, thov kom txojkev phem los raug cov neeg limhiam thiab ua kom lawv raug kev puastsuaj.

¹²Tus TSWV, kuv paub hais tias koj yeej tuaj cov neeg pluag tog, thiab txiav txim ncaj rau cov neeg uas txomnyem.

¹³Cov neeg ncaj ncees yuav tuav koj lub npe ua koj tsaug, lawv yuav nyob ntawm koj lub xubntiag mus ibtxhis.