Read Hmong Daw Phau Ntawv Nkauj 144 Bible Online

Phau Ntawv Nkauj 144 - Hmong Daw bible

Phau Ntawv Nkauj 144

¹Cia li qhuas tus TSWV uas yog tus tiv thaiv kuv! Nws yog tus uas qhia kuv sib tua thiab npaj kuv mus ntaus nrog.

²Nws yog tus tiv thaiv kuv thiab tuaj kuv tog, yog kuv lub chaw cawm siav thiab yog kuv tus cawmseej, kuv tso siab plhuav rau nws. Nws tsa kuv ua tus kav tagnrho txhua haivneeg.

³Tus TSWV, neeg yog dabtsi, koj thiaj yuav xam txog nws, neeg yog leejtwg, koj thiaj li ua zoo rau nws ua luaj?

⁴Neeg zoo ib yam li ib nthwv cua xwb; nws txojsia zoo ib yam li tus duab ntxoov ntxoo uas nyob ib vuag xwb.

⁵Tus TSWV, thov koj cia li qhib plho rooj ntug nqis los, koj cia li kov tej hauv roob kom muaj pa ncho tawm tuaj.

⁶Cia li tso xob laim ua kom koj cov yeebncuab khiav ri sua, cia li tua koj cov xub hneevnti kom lawv khiav tas.

⁷Koj cev tes saum ntuj tuaj rub kuv tawm hauv cov dej uas tob tob thiab cawm kom kuv dim, thov koj cawm kom kuv dim ntawm cov neeg txawv tebchaws

⁸uas hais lus tsis tseeb thiab dag tsis ua raws li lawv tau coglus tseg.

⁹Vajtswv, kuv yuav hu ib zaj nkauj tshiab qhuas koj, kuv yuav ntaus nkauj nogncas thiab hu nkauj qhuas koj.

¹⁰Koj pub cov vajntxwv mus ntaus yeej rog, thiab koj tau cawm koj tus tubtxib Daviv dim.

¹¹Thov koj cawm kuv dim ntawd kuv cov yeebncuab uas tsivtsaim heev, thov koj cawm kom kuv dim ntawm cov neeg txawv tebchaws uas hais lus tsis tseeb thiab dag tsis ua raws li lawv tau coglus tseg.

¹²Thov kom peb cov tub hluas loj hlob zoo li tej ntsuag ntoo, thiab thov kom peb cov ntxhais zoo li tej ncej kaum uas txheem lub loog.

¹³Thov kom peb tej txhab muaj txhua yam qoobloo puv nkaus, thov pub kom peb tej yaj uas nyob tom tiaj nrag yug tau menyuam coob txog ntau txhiab ntau vam tus.

¹⁴Thov kom peb tej nyuj huamvam coob ua npoj ntws, thiab tsis txhob muaj ib tug tshob lossis ploj li, thov kom tsis txhob muaj tej suab quaj ntxhov siab rau txhua txojkev.

¹⁵Cov neeg uas tau txais koob hmoov yog cov uas muaj kev kaj siab! Cov neeg uas muaj Vajtswv ua lawv tus TSWV yog cov uas tau koob hmoov.