Read Hmong Daw Phau Ntawv Nkauj 147 Bible Online

Phau Ntawv Nkauj 147 - Hmong Daw bible

Phau Ntawv Nkauj 147

¹Cia li qhuas tus TSWV! Qhov uas hu nkauj qhuas peb tus Vajtswv yog ib qho uas zoo heev, yeej tsimnyog sawvdaws txaus siab thiab qhuas nws kawg li.

²Tus TSWV yog tus uas txhim kho lub nroog Yeluxalees, nws coj cov neeg uas raug luag ntes mus lawm rov qab los.

³Nws kho cov neeg uas siab ntsws puas tas thiab qhwv lawv tej qhov txhab.

⁴Nws yeej kom tseg saib pub muaj pestsawg lub hnubqub, thiab nws tis npe rau txhua lub hnubqub nyias muaj nyias npe.

⁵Peb tus TSWV yog tus uas muaj hwjchim thiab muaj zog loj zog nchav, tsis muaj leejtwg yuav totaub txog nws lub tswvyim.

⁶Nws txhawb tus uas txo hwjchim, tiamsis nws tsuj tus ua phem ua qias rau hauv av.

⁷Cia li hu nkauj qhua tus TSWV, cia li ntaus nkauj nogncas qhuas Vajtswv.

⁸Nws ua kom muaj huab nyob saum nruab ntug, nws tso nag los ywg lub ntiajteb thiab ua kom nroj tsuag tuaj saum tej pov roob.

⁹Nws pub kom tej tsiaj muaj noj muaj haus, thiab pub kom tej menyuam uablag tau noj thaum lawv quaj.

¹⁰Tsis yog nws txaus siab rau cov nees uas muaj zog, thiab tsis yog nws txaus siab rau cov tubrog uas siab tawv;

¹¹tiamsis nws txaus siab rau cov neeg uas hwm nws, thiab cov neeg uas cia siab rau nws txojkev hlub uas tsis paub kawg.

¹²Yeluxalees, cia li qhuas tus TSWV! Xi-oos, cia li qhuas koj tus Vajtswv!

¹³Nws tsomkwm koj tej roojvag nyob ruaj khov kho, nws foom koob hmoov rau koj haivneeg.

¹⁴Nws tsomkwm tsis pub kom luag tuaj txeeb koj ciam dej ciam av, thiab nws pub kom koj ua tau qoobloo ntau.

¹⁵Nws hais rau lub ntiajteb thiab tej lus uas nws hais ua rau txhua yam tiav.

¹⁶Nws tso daus los puv toj roob hauv pes dawb paug ib yam li plaub yaj, thiab muaj te khov dawb paug rau txhua qhov ib yam li hmoov tshauv.

¹⁷Nws tso lawg los ib yam li tej pobzeb, yeej tsis muaj leejtwg tiv taus qhov uas nws tso los ntawd li!

¹⁸Nws hais lus xwb tej dej nkoog cia li yaj tas, nws tso cua ntsawj tuaj, ces tej dej cia li ntws lawm.

¹⁹Nws qhia nws txojlus rau Yakhauj, nws piav nws tej lus samhwm thiab tej kevcai rau cov Yixalayees.

²⁰Nws tsis tau qhia tej ntawd rau lwm haivneeg li, rau qhov lwm haivneeg tsis paub nws tej kevcai. Cia li qhuas tus TSWV!