Read Hmong Daw Phau Ntawv Nkauj 148 Bible Online

Phau Ntawv Nkauj 148 - Hmong Daw bible

Phau Ntawv Nkauj 148

¹Cia li qhuas tus TSWV! Nej cov uas nyob saum ntuj, cia li qhuas tus TSWV!

²Tagnrho nws cov timtswv, cia li qhuas nws, tagnrho nws cov tubrog saum ntuj, cia li qhuas nws.

³Lub hnub thiab lub hli, cia li qhuas nws, tej hnubqub uas ci ntsa iab, cia li qhuas nws.

⁴Ntuj ceebtsheej thiab tej dej uas nyob saum nruab ntug, cia li qhuas nws.

⁵Ib puas tsav yam cia li qhuas tus TSWV lub npe! Nws hais kom muaj, ces tej no txawm tshwmsim tuaj;

⁶twb yog nws hais tej no thiaj nyob ruaj khov qhov qub chaw mus ibtxhis, thiab tej ntawd yeej tsis hla tus TSWV tej lus li.

⁷Dej hiavtxwv thiab ib puas tsav yam tsiaj uas nyob hauv hiavtxwv, cia li tuaj hauv ntiajteb no qhuas tus TSWV;

⁸xob laim thiab lawg, daus thiab huab, thiab cua daj cua dub cia li mloog tus TSWV tej lus.

⁹Tej pov roob thiab tej hauv roob, tej ntoo uas txi txiv thiab tej havzoov, cia li qhua tus TSWV;

¹⁰txhua yam tsiaj, tsiaj nyeg thiab tsiaj qus, nab qa thiab tej noog, cia li qhuas tus TSWV.

¹¹Tej vajntxwv thiab txhua haivneeg, vajntxwv cov tub thiab tej nomtswv, cia li qhuas tus TSWV;

¹²tej tub ntxhais hluas, tej laus thiab tej menyuam yaus, cia li qhuas tus TSWV ib yam nkaus.

¹³Ib puas tsav yam no cia li qhuas tus TSWV lub npe! Nws lub npe muaj koob meej dua txhua lub npe huv tibsi, nws lub tshwjchim nyob puv nkaus hauv ntiajteb thiab saum ntuj.

¹⁴Tus TSWV ua rau nws haivneeg muaj zog heev, nws haivneeg txhua tus puavleej qhuas nws, haivneeg ntawd yog cov Yixalayees uas nws hlub kawg nkaus. Cia li qhuas tus TSWV!