Read Hmong Daw Phau Ntawv Nkauj 16 Bible Online

Phau Ntawv Nkauj 16 - Hmong Daw bible

Phau Ntawv Nkauj 16

¹Vajtswv, thov koj tsomkwm kuv; kuv tso siab plhuav rau koj, vim koj yog kuv lub chaw cawm siav.

²Kuv hais rau tus TSWV tias, “Koj thiaj yog kuv tus TSWV; txhua yam zoo uas kuv muaj puavleej yog koj pub.”

³Cov neeg uas muaj lub siab npuab tus TSWV yog cov uas muaj koob meej. Qhov uas kuv zoo siab tshaj plaws yog kuv tau nrog lawv nyob ua ke.

⁴Cov neeg uas pe lwm tus vajtswv, mas yog lawv lob kev txomnyem los rau lawv xwb. Kuv yuav tsis nrog lawv koom hlawv khoom fij; kuv yuav tsis pe lawv tej vajtswv.

⁵Tus TSWV, koj yog txhua yam uas kuv muaj, thiab koj pub txhua yam uas kuv xav tau rau kuv; kuv lub neej yav tom ntej nyob hauv koj lub xibteg.

⁶Kuv xav tsis thoob rau tej uas tus TSWV pub rau kuv; tej ntawd zoo kawg li!

⁷Kuv ua tus TSWV tsaug, rau qhov nws coj kuv txoj haukev, thiab hmo ntuj los kuv lub siab pheej ntuas kuv tsis tseg.

⁸Kuv yeej nco ntsoov hais tias tus TSWV nrog nraim kuv nyob, yeej tsis muaj ib yam dabtsi ua rau kuv ntshai, rau qhov nws nyob ze kuv.

⁹Yog li ntawd, kuv thiaj zoo siab thiab ua nws tsaug, kuv tau nyob tso siab pluav,

¹⁰rau qhov koj tiv thaiv tsis pub kuv raug kev ploj kev tuag, lossis tsis cia tus uas muaj lub siab npuab koj mus rau hauv tubtuag teb.

¹¹Koj yuav qhia txojkev uas mus tau txojsia rau kuv, koj nrog nraim kuv ua rau kuv txaus siab thiab zoo siab mus ibtxhis.