Read Hmong Daw Phau Ntawv Nkauj 18 Bible Online

Phau Ntawv Nkauj 18 - Hmong Daw bible

Phau Ntawv Nkauj 18

¹Tus TSWV, kuv hlub koj kawg li! Koj yog tus tiv thaiv kuv.

²Tus TSWV yog tus tiv thaiv kuv; nws yog kuv lub chaw fajxwm uas ruaj khov. Kuv tus Vajtswv yog tus tiv thaiv kuv, kuv nrog nws nyob tso siab plhuav. Nws tiv thaiv kuv ib yam li daim thaiv hniav ntaj, nws tiv thaiv kuv thiab pab kuv dim.

³Kuv hu txog tus TSWV, nws pab kuv dim ntawm kuv cov yeebncuab. Cia li ua tus TSWV tsaug!

⁴Kev tuag nyob puagncig kuv, kev puastsuaj nphau nphwv tuaj tsuam kuv.

⁵Kev tuag nyob puagncig kuv, thiab lub qhov ntxa twb cuab lug tos kuv lawm.

⁶Thaum kuv raug kev txomnyem, kuv hu tus TSWV; kuv thov kuv tus Vajtswv pab kuv. Nws nyob hauv nws lub Tuamtsev hnov kuv lub suab, nws mloog kuv lub suab quaj uas thov nws pab.

⁷Lub ntiajteb txawm qeeg nkaws thiab ua zog koog; tej taw roob co ua zog koog, rau qhov Vajtswv chim heev.

⁸Pa taws ncho auv niab hauv nws lub qhovntswg tuaj, nplaim taws thiab ncaig taws cig lam lug hauv nws lub qhovncauj tuaj.

⁹Tus TSWV qhib plho lub ntuj thiab nqis nrog tauv huab dub tsaus nti ntawm nws kotaw los.

¹⁰Nws caij rawv saum tus qhelunpees phab tis thiab ya, nws nyob saum tus qhelunpees phab tis ya nrog cua ceev heev.

¹¹Nws muab kev tsaus ntuj thaiv nws lub cev, muaj huab ntom nti thiab muaj dej puagncig nws.

¹²Lawg thiab nplaim taws tawm hauv cov xob laim los tsoo tej huab dub tshab plaws mus ua tus TSWV ntej.

¹³Ces tus TSWV thiaj ua kom xob nroo saum ntuj tuaj, thiab hnov tus uas muaj hwjchim loj kawg nkaus lub suab.

¹⁴Nws tua nws xibxub tuaj thiab ua rau nws cov yeebncuab tawg ri sua, nws ua kom xob laim ci ntsa iab raws lawv khiav.

¹⁵Tus TSWV, thaum koj cem koj cov yeebncuab thiab nyooj rau lawv ntawm koj txojkev chim, ua rau qab thu dej hiavtxwv khoob lug thiab lub ntiajteb nyob do dus tsis muaj dabtsi thaiv.

¹⁶Tus TSWV thiaj cev tes puag saum nruab ntug tuaj tuav kuv hauv qab thu no, nws thiaj rub kuv tawm hauv qab thu dej qhov tob tshaj plaws los.

¹⁷Nws cawm kuv dim ntawm kuv cov yeebncuab lub hwjchim, thiab dim ntawm cov neeg uas ntxub kuv, rau qhov lawv muaj zog dua kuv.

¹⁸Thaum kuv raug kev nyuaj siab, lawv txawm tuaj ntaus kuv ntag, tiamsis tus TSWV tsomkwm kuv.

¹⁹Nws pab kuv tawm hauv txojkev puastsuaj, nws cawm kuv rau qhov nws txaus siab rau kuv.

²⁰Tus TSWV muab nqi zog rau kuv rau qhov kuv yeej ua ncaj ua ncees xwb, nws foom koob hmoov rau kuv rau qhov kuv tsis tau ua txhaum dabtsi.

²¹Kuv yeej hwm tus TSWV txoj kevcai, kuv tsis khiav tawm ntawm kuv tus Vajtswv hlo li.

²²Kuv yeej ua raws li nws tej kevcai qhia tsis muaj ib zaug uas kuv yuav tsis mloog nws tej lus samhwm li.

²³Nws yeej paub kuv tsis tau ua txhaum, kuv tswj nrees kuv tsis ua ib qho txhaum li.

²⁴Yog li ntawd, nws thiaj muab nqi zog rau kuv, rau qhov kuv ua dabtsi los yeej ua ncaj ua ncees xwb.

²⁵Tus TSWV, koj yeej ua ncaj rau cov neeg uas ua ncaj rau koj, koj ua zoo kawg nkaus rau cov neeg uas tsis tau ua txhaum.

²⁶Koj ua zoo rau cov neeg uas ua zoo, tiamsis koj ua yeebncuab rau cov neeg uas ua phem.

²⁷Koj cawm cov neeg uas txo hwjchim, tiamsis koj txo cov neeg khavtheeb lub hwjchim.

²⁸Tus TSWV, koj ua lub teeb rau kuv pom kev, koj tshem qhov uas ua rau kuv tsaus ntuj nti.

²⁹Koj ua rau kuv muaj zog ntaus yeej kuv cov yeebncuab thiab koj lub hwjchim muaj peevxwm ntaus yeej cov uas tiv thaiv lawv.

³⁰Tus Vajtswv no nws tes haujlwm yeej zoo tshaj plaws li. Nws tej lus thiaj yog lus tseeb. Nws yog daim thaiv hniav ntaj rau txhua tus uas mus cuag nws.

³¹Tus TSWV tib leeg xwb thiaj yog Vajtswv, Vajtswv tib leeg xwb thiaj yog tus tsomkwm peb.

³²Nws yog tus Vajtswv uas ua kom kuv muaj zog, nws yog tus ua kom txojkev uas kuv taug muaj kev kaj siab lug.

³³Nws ua rau kuv ob txhais taw tsuj av ntsia nkaus ib yam li tus muaslwj, nws tso kuv nyob kaj siab lug saum tej roob.

³⁴Nws qhia kom kuv txawj ntaus rog; yog li ntawd, kuv thiaj muaj peevxwm tua taus rab hneevnti uas muaj zog tshaj plaws.

³⁵Tus TSWV, koj tau muab koj daim thaiv hniav ntaj uas yog txojkev cawm dim rau kuv, thiab koj sab tes xis cawm kuv dim, thiab koj pab kuv, kuv thiaj vammeej.

³⁶Koj rhawv kev dav rau kuv taug luag thiaj ntes tsis tau kuv; thiab kuv tsis ntog ib teeg li.

³⁷Kuv caum kuv cov yeebncuab thiab ntes tau lawv, kuv yeej tsis tso lawv tseg mus txog thaum kuv muab lawv tua puastsuaj tas.

³⁸Kuv ntaus lawv ntog tas huv tibsi, thiab lawv tsis muaj peevxwm sawv tau li, lawv swb thiab ntog pawglug ntawm kuv xubntiag.

³⁹Koj ua rau kuv muaj zog sib tua hauv tshavrog, pub kuv yeej tagnrho kuv cov yeebncuab.

⁴⁰Koj ua rau kuv cov yeebncuab tawg khiav ri sua ntawm kuv mus, cov uas ntxub kuv, kuv yuav ua kom lawv puastsuaj tas.

⁴¹Lawv quaj qw thov pab, tiamsis tsis muaj leejtwg cawm lawv li, lawv thov tus TSWV, tiamsis nws tsis teb lawv tej lus thov.

⁴²Kuv muab lawv tswm ntsoog mos nyoos ib yam li tej hmoov av rau cua ntsawj mus povtseg, kuv tsuj lawv ib yam li tsuj av nkos hauv plawv kev.

⁴³Koj cawm kuv dim ntawm tus neeg uas ntxeev siab rau kuv thiab tsa kuv ua tus kav txhua haivneeg, tej neeg uas kuv yeej ibtxwm tsis tau paub dua li, nimno tau los ua kuv qhev.

⁴⁴Cov neeg txawv tebchaws los puavleej tau tuaj qhau hau hawm kuv, thaum lawv hnov kuv lub moo, lawv puavleej hwm kuv.

⁴⁵Lawv tas kev cia siab, thiab tawm ua ibce tshee hnyo hauv lawv tej chaw fajxwm los.

⁴⁶Tus TSWV yog tus muaj sia nyob! Ua tsaug uas nws yog tus tiv thaiv kuv! Thov kom Vajtswv uas yog kuv tus cawmseej tau koob meej loj tshaj plaws.

⁴⁷Nws pab kuv yeej tagnrho kuv cov yeebncuab, nws ua kom txhua haivneeg hwm kuv

⁴⁸thiab nws cawm kuv dim ntawm kuv cov yeebncuab. Tus TSWV, koj pab kuv yeej tagnrho kuv cov yeebncuab, koj cawm kuv dim ntawm cov neeg limhiam.

⁴⁹Yog li ntawd, kuv thiaj ua koj tsaug tim ntsej tim muag ntawm txhua haivneeg, kuv zoo siab hlo hu nkauj ua koj tsaug.

⁵⁰Vajtswv pub rau nws tus vajntxwv tau txais kev muaj yeej loj kawg nkaus, nws ua zoo rau Daviv, tus uas nws xaiv tseg lawm, thiab nws cov xeebntxwv mus ibtxhis yeej tsis hloov li.