Read Hmong Daw Phau Ntawv Nkauj 2 Bible Online

Phau Ntawv Nkauj 2 - Hmong Daw bible

Phau Ntawv Nkauj 2

¹Vim li cas txhua haivneeg tuavhauv ntxeev siab? Vim li cas cov pejxeem tuav tswvyim ua tej uas tsis muaj qabhau?

²Lawv cov vajntxwv los ntxeev siab, thiab lawv tej nomtswv tuaj txoos ua ke tuav tswvyim tawmtsam tus TSWV thiab tawmtsam tus vajntxwv uas tus TSWV xaiv.

³Lawv hais tias, “Cia peb nyob ywj siab tsis txhob cia nkawd kav peb, thiab cia peb khiav tawm ntawm nkawd kev tswjhwm.”

⁴Tus TSWV nyob saum nws lub zwmtxwv saum ntuj luag lawv plig, thiab thuam lawv tej tswvyim uas tsis muaj qabhau.

⁵Nws ntuas lawv npautaws vog thiab nws txojkev chim ua rau lawv ceeb ras pes dheev.

⁶Nws hais tias, “Kuv tsa kuv tus vajntxwv rau saum lub Roob Xi-oos uas yog kuv lub roob dawbhuv lawm.”

⁷Tus vajntxwv hais tias, “Kuv yuav qhia tej lus uas tus TSWV hais tseg cia. Nws hais rau kuv li no: ‘Koj yog kuv tus tub, hnub no mus kuv yog koj txiv lawm.

⁸Cia li thov, kuv yuav muab txhua haivneeg cob rau koj, tagnrho lub ntiajteb no yuav yog koj tug.

⁹Koj yuav muab ib tug qws hlau los kav lawv, koj yuav ntaus lawv tawg ntsoog ntxaws ib yam li tej laujkaub av.’ ”

¹⁰Nej cov uas yog vajntxwv, nej cia li mloog tej lus qhuab ntuas no, nej cov uas kav lub ntiajteb, nej cia li kawm zaj no.

¹¹Nej cia li muab lub siab dawb paug ua tus TSWV tes haujlwm thiab paub ntshai nws,

¹²cia li txo hwjchim thiab txhos caug ntua pehawm nws, lossis yuav cia nws chim sai rau nej, thiab ua kom nej tuag tamsim. Txhua tus uas mus thov nws ua tus tsomkwm thiaj yuav tau kev kaj siab lug.