Read Hmong Daw Phau Ntawv Nkauj 22 Bible Online

Phau Ntawv Nkauj 22 - Hmong Daw bible

Phau Ntawv Nkauj 22

¹Kuv tus Vajtswv, kuv tus Vajtswv, vim li cas koj tso kuv tseg lawm? Kuv tsa suab quaj thov koj pab, tiamsis koj tsis teb kuv tej lus thov.

²Kuv tus Vajtswv, kuv thov koj tas hnub los koj tsis teb, thaum tsaus ntuj kuv thov koj ib hmos tsis so li.

³Txawm yog li ntawd los koj tseem yog tus dawbhuv uas zaum saum koj lub zwmtxwv, thiab yog tus uas cov Yixalayees sawvdaws qhuas.

⁴Peb cov yawgkoob puavleej cia siab rau koj tib leeg xwb, lawv yeej ibtxwm cia siab rau koj thiab koj yeej ibtxwm pab lawv dim.

⁵Lawv thov koj pab, thiab koj cawm lawv dim ntawm tej kev puastsuaj, lawv cia siab rau koj thiab tsis raug txajmuag.

⁶Tiamsis kuv tsis yog neeg lawm, kuv yog kas xwb, txhua leej txhua tus yeej ntxub thiab nto kuv.

⁷Txhua tus uas pom kuv puavleej luag kuv plig, lawv hlev nplaig thiab co hau nto rau kuv.

⁸Lawv hais tias, “Koj twb cia siab rau tus TSWV lawm ne. Ua li cas nws tseem tsis pab koj thiab? Yog tus TSWV yeej nyiam koj tiag, vim li cas nws tsis pab koj?”

⁹Koj yog tus coj kuv tawm hauv kuv niam plab los tsis raug xwm dabtsi, thaum kuv tseem mos liab, koj tsomkwm kuv ntawm kuv niam lub xubntiag.

¹⁰Kuv yeej ibtxwm cia siab rau koj txij hnub uas yug tau kuv los, thiab koj yeej ibtxwm yog kuv tus Vajtswv.

¹¹Thov koj tsis txhob nyob nrug deb ntawm kuv! Tej kev txomnyem twb los ze kuv lawm, thiab tsis muaj leejtwg pab kuv li.

¹²Yeebncuab nyob ibncig kuv ib yam li pab heev nyuj, tagnrho lawv puavleej nyob vij vog kuv ib yam li pab heev nyuj tom tebchaws Npasas.

¹³Lawv rua lawv tej qhovncauj loj heev rau kuv ib yam li tej tsov ntxhuav nyooj yuav tom thiab dua kuv.

¹⁴Kuv lub zog ntaug tas ib yam li cov dej uas nchuav ntxaum rau hauv av lawm. Kuv tej pob qij txha pluam tas huv tibsi lawm, kuv lub siab yaj ua kua tas ib yam li ciab ntab.

¹⁵Kuv lub qa qhuav qhawv ib yam li tej hmoov av, thiab kuv tus nplaig lo nkaus rau hauv kuv lub qhovncauj sab saud lawm. Koj tso kuv tuag xyab luas rau hauv cov hmoov av.

¹⁶Muaj ib pab neeg ua phem nyob ibncig kuv; zoo ib yam li pab dev uas dhia cuag tus tsi tuaj rau kuv, lawv tuaj dua kuv ob txhais tes thiab ob txhais taw.

¹⁷Kuv yeej pom tagnrho kuv tej pobtxha huv tibsi. Kuv cov yeebncuab saib ntsoov thiab ua qhovmuag nruj qoom rau kuv.

¹⁸Lawv muab kuv tej ris tsho coj mus twv thiab coj mus sib faib.

¹⁹Tus TSWV, thov tsis txhob nyob nrug deb kuv! Cia li maj nroos los pab kom kuv dim!

²⁰Cawm kom kuv dim ntawm rab hniav ntaj, cawm kom kuv txojsia dim ntawm cov dev no.

²¹Pab kom kuv dim ntawm cov tsov ntxhuav no, cawm kom kuv dim ntawm cov nyujqus tej kub.

²²Kuv yuav qhia tej txujci uas koj tau ua lawm rau kuv cov pejxeem paub, thaum lawv tuaj sib sau ua ke kuv yuav ua koj tsaug li no:

²³“Nej cov uas yog tus TSWV cov tubtxib cia li ua nws tsaug! Nej cov uas yog neeg Yixalayees tej xeebntxwv cia li hwm nws! Nej cov uas yog neeg Yixalayees, nej cia li pehawm nws!

²⁴Nws tsis tau muab cov neeg pluag tso tseg lossis tsis quavntsej tej kev txomnyem uas lawv raug, nws tsis tau khiav tso lawv tseg, tiamsis nws yeej teb lawv tej lus thov thaum lawv thov nws.”

²⁵Thaum sawvdaws tuaj txoos ua ke txhij lawm kuv yuav ua koj tsaug rau tej txujci uas koj tau ua tas los. Kuv yuav muab tej khoom theej txhoj uas kuv coglus tseg lawm los fij rau koj tabmeeg rau ib tsoom sawvdaws uas tuaj pehawm koj.

²⁶Cov neeg pluag yuav tau noj tsau npo raws li lawv xav noj, txhua tus uas los cuag tus TSWV yuav ua nws tsaug. Thov kom lawv muaj kev vammeej mus ibtxhis.

²⁷Txhua haivneeg yuav nco ntsoov tus TSWV. Tej neeg uas nyob txhua qhov hauv qab ntuj no yuav los cuag nws, mas txhua haivneeg yuav pehawm nws.

²⁸Tus TSWV yog vajntxwv, nws kav txhua haivneeg.

²⁹Txhua tus neeg uas khavtheeb yuav qhau cev hlo pe nws, txhua tus neeg uas txawj tuag yuav qhau cev hlo ntawm nws xubntiag pe nws.

³⁰Yav tom ntej no txhua tiam neeg yuav txhawb nqa nws, tej neeg sawvdaws yuav qhia tus TSWV zaj rau tiam neeg uas yuav los tom ntej.

³¹Yuav tsum tau qhia rau cov uas tseem tsis tau yug los kom paub hais tias: “Tus TSWV yog tus cawm nws haivneeg.”