Read Hmong Daw Phau Ntawv Nkauj 24 Bible Online

Phau Ntawv Nkauj 24 - Hmong Daw bible

Phau Ntawv Nkauj 24

¹Lub ntiajteb thiab txhua tsav yam uas nyob hauv lub qab ntuj no puavleej yog tus TSWV li, lub ntiajteb thiab txhua tus uas nyob hauv lub ntiajteb puavleej yog nws tug huv tibsi.

²Nws tsim lub ntiajteb rau saum cov dej hiavtxwv thiab muab lub ntiajteb teeb rau hauv qab thu hiavtxwv.

³Leejtwg thiaj mus tau rau saum tus TSWV lub roob? Leejtwg thiaj mus tau rau hauv nws lub Tuamtsev uas dawbhuv?

⁴Cov neeg uas tau mus rau hauv, yog cov ua ncaj thiab ua zoo, yog cov uas tsis pe dab tsis peb mlom lossis tsis hais tej lus tsis tseeb.

⁵Tus TSWV yuav foom koob hmoov rau lawv cov ntawd thiab yuav cawm kom lawv dim, Vajtswv yuav hais tias lawv yog cov neeg tsis muaj txim.

⁶Cov neeg no yog cov uas los cuag Vajtswv lawm, lawv yog cov uas los sawv tabmeeg ntawm Yakhauj tus Vajtswv.

⁷Muab tej roojvag qhib kom dav fo, muab tej qhovrooj qub thaum ub qhib cia, tus vajntxwv uas muaj hwjchim yuav tuaj rau hauv.

⁸Leejtwg yog tus vajntxwv uas muaj hwjchim? Nws yog tus TSWV uas muaj zog thiab muaj hwjchim, yog tus TSWV uas ntaus yeej rog.

⁹Muab tej roojvag qhib kom dav fo, muab tej qub qhovrooj thaum ub qhib cia, tus vajntxwv uas muaj hwjchim yuav tuaj rau hauv.

¹⁰Leejtwg yog tus vajntxwv uas muaj hwjchim? Tus TSWV uas muaj hwjchim loj kawg nkaus, nws yog tus vajntxwv uas muaj hwjchim ntawd.