Read Hmong Daw Phau Ntawv Nkauj 25 Bible Online

Phau Ntawv Nkauj 25 - Hmong Daw bible

Phau Ntawv Nkauj 25

¹Tus TSWV, kuv tsa ncauj thov koj,

²kuv tus Vajtswv, kuv cia siab ntsoov rau koj. Thov cawm kom kuv dim tsis txhob pub kuv raug kev txajmuag rau cov neeg uas yeej kuv, thov tsis txhob cia kuv cov yeebncuab saib tsis taus kuv.

³Cov uas cia siab rau koj yeej tsis muaj ib tug swb hlo li, tiamsis cov uas tawmtsam koj, yog cov yuav swb ntag.

⁴Tus TSWV, thov qhia kom kuv paub koj txojkev, qhia kom kuv paub tej kev no tseeb.

⁵Qhia kom kuv ua neej raws li koj txojkev tseeb, rau qhov koj yog kuv tus Vajtswv uas cawm kuv dim. Kuv yeej ibtxwm cia siab rau koj.

⁶Tus TSWV, thov nco ntsoov koj txojkev siab dawb siab zoo thiab txojkev hlub ruaj khov uas koj tau qhia rau peb thaum ub los lawm.

⁷Thov zam txim rau tej kev txhaum thiab tej uas kuv ua yuam kev thaum kuv tseem hluas. Tus TSWV, koj yog tus muaj kev hlub thiab siab dawb uas tsis hloov li, thov koj nco ntsoov kuv.

⁸Rau qhov tus neeg ncaj ncees thiaj yog tus muaj lub siab zoo, nws qhia cov neeg txhaum kom lawv taug txojkev uas tsimnyog lawv taug.

⁹Nws coj cov neeg txo hwjchim taug txojkev tseeb, thiab qhia kom lawv ua haum nws siab.

¹⁰Vim tus TSWV txojkev ncaj ncees thiab kev hlub nws thiaj coj txhua tus uas ua raws li nws txojlus cog tseg thiab mloog nws tej lus samhwm.

¹¹Tus TSWV, thov koj nco ntsoov tej lus cog tseg no, thiab thov koj zam kuv tej kev txhaum, rau qhov tej kev txhaum ntawd ntau kawg li.

¹²Cov neeg uas hwm tus TSWV, nws yuav qhia kom lawv paub taug txojkev tseeb uas tsimnyog lawv taug.

¹³Lawv yuav vammeej thiab lawv tej menyuam yuav tau lub tebchaws no nyob ua lawv tug mus li.

¹⁴Tus TSWV nrog cov neeg uas hwm nws ua phoojywg, thiab nws qhia kom lawv paub nws tej lus cog tseg.

¹⁵Txhua lub sijhawm uas kuv tsa qhovmuag saib tus TSWV, nws yeej cawm kuv dim ntawm txojkev puastsuaj.

¹⁶Tus TSWV, thov tig los rau ntawm kuv thiab hlub kuv, rau qhov kuv nyuaj siab thiab qaug zog kawg li.

¹⁷Thov tshem kuv tej kev nyuaj siab thiab cawm kom kuv dim ntawm kuv tej kev ntxhov siab.

¹⁸Thov nrog saib kuv tej kev ntxhov siab thiab kev txomnyem, thiab thov zam kuv tej kev txhaum huv tibsi.

¹⁹Thov koj tsa qhovmuag ntsia kuv cov yeebncuab saib coob npaum twg, thiab saib lawv ntxub kuv npaum li cas.

²⁰Thov koj tsomkwm kuv thiab cawm kom kuv dim, thiab pab kom kuv tsis txhob swb hlo li. Kuv los cuag koj thiab vamkhom koj pab.

²¹Thov kom kuv tej haujlwm zoo thiab tej kev ncaj ncees tsomkwm kuv, rau qhov kuv cia siab rau koj xwb.

²²Vajtswv, thov cawm koj haivneeg Yixalayees kom dim ntawm tej kev txomnyem uas lawv raug!