Read Hmong Daw Phau Ntawv Nkauj 26 Bible Online

Phau Ntawv Nkauj 26 - Hmong Daw bible

Phau Ntawv Nkauj 26

¹Tus TSWV, thov qhia rau sawvdaws hais tias kuv tsis tau ua txhaum, rau qhov kuv ibtxwm ua lub neej ncaj ncees thiab cia siab rau koj xwb.

²Tus TSWV, thov koj sim thiab ntsuas kuv; thov tshuaj kuv lub siab thiab kuv tej kev xav.

³Kuv niaj hnub pom koj txojkev hlub thiab koj txojkev ncaj ncees yeej coj kuv txoj haukev.

⁴Kuv tsis nrog cov neeg uas tsis tsim txiaj koom ua ib lub siab, kuv tsis tau nrog cov neeg ntsejmuag ncaj siab nkhaus ua ib yam dabtsi.

⁵Kuv ntxub cov neeg uas sib sau ua kev phem kev qias, thiab kuv tsis koom nrog cov neeg siab phem.

⁶Tus TSWV, kuv ntxuav kuv ob txhais tes qhia hais tias kuv tsis tau ua txhaum, thiab kuv mus pehawm koj ibncig ntawm koj lub thaj.

⁷Kuv hu ib zaj nkauj ua koj tsaug thiab yuav piav koj tej txujci tseemceeb huv tibsi rau sawvdaws mloog.

⁸Tus TSWV, kuv nyiam lub tsev uas yog koj qhov chaw nyob, thiab qhov chaw uas koj lub hwjchim nyob kawg li.

⁹Thov tsis txhob ua rau kuv raug kev puastsuaj nrog cov neeg muaj txim, thov tshem kuv tawm ntawm cov neeg tua neeg,

¹⁰cov neeg uas ua kev phem kev qias txhua lub sijhawm, thiab pheej yuav luag tej nyiaj xiab.

¹¹Tiamsis kuv yuav ua ncaj ua ncees xwb, thov hlub kuv thiab cawm kom kuv dim!

¹²Kuv dim ntawm txhua yam kev puastsuaj, kuv yuav ua tus TSWV tsaug tabmeeg cov neeg coob coob uas tuaj txoos ua ke no.