Read Hmong Daw Phau Ntawv Nkauj 27 Bible Online

Phau Ntawv Nkauj 27 - Hmong Daw bible

Phau Ntawv Nkauj 27

¹Tus TSWV yog lub teeb rau kuv pom kev thiab yog kuv tus cawmseej, kuv yuav tsis ntshai leejtwg hlo li. Tus TSWV tsomkwm kuv, kuv thiaj tsis raug kev puastsuaj kuv yuav tsis ntshai dabtsi li.

²Thaum cov neeg siab phem tuaj ntaus kuv thiab soj tua kuv povtseg, lawv yuav dawm thiab ntog.

³Txawm yog ib pab tubrog tuaj vij hlo kuv los kuv yuav tsis ntshai, txawm yog yeebncuab tuaj tawmtsam kuv los kuv tseem cia siab rau Vajtswv.

⁴Kuv tsuas thov tus TSWV pub ib yam rau kuv xwb, yam uas kuv xav yuav, yog kuv xav nyob hauv tus TSWV lub tsev mus tas kuv simneej, kuv xav tsis thoob rau tej uas nws ua zoo, thiab kuv yuav thov nws ua tus coj kuv txoj haukev.

⁵Thaum kuv raug kev ntxhov siab nws yog kuv qhov chaw vamkhom, nws yuav tsomkwm kuv hauv nws lub Tuamtsev, thiab nws ua lub chaw khov kho saum lub roob tsuas siab rau kuv nyob.

⁶Yog li ntawd, kuv yuav yeej tagnrho kuv cov yeebncuab uas nyob ibncig kuv. Kuv yuav fij tej khoom theej txhoj hauv lub Tuamtsev nrog tej suab qw zoo siab, kuv yuav hu nkauj, thiab kuv yuav ua tus TSWV tsaug.

⁷Tus TSWV, thov koj mloog kuv lub suab thaum kuv tsa ncauj thov koj! Thov koj hlub kuv thiab teb kuv tej lus thov.

⁸Thaum koj hais tias, “Cia li los pehawm kuv,” kuv teb hais tias, “Tus TSWV, kuv yuav los cuag koj.”

⁹Thov koj tsis txhob khiav nkaum kuv! Thov koj tsis txhob chim rau kuv thiab tsis txhob ntiab koj tus tubtxib tawm. Koj yeej ibtxwm pab kuv los lawm, thov tsis txhob khiav tawm ntawm kuv mus thiab tsis txhob tso kuv povtseg, Vajtswv, koj yog kuv tus cawmseej.

¹⁰Kuv niam thiab kuv txiv yeej tso taus kuv tseg, tiamsis tus TSWV yuav saib xyuas kuv.

¹¹Tus TSWV, thov qhia kuv ua raws li tej uas koj xav kom kuv ua, thiab coj kuv taug txojkev uas kaj siab, rau qhov kuv muaj yeebncuab coob heev.

¹²Thov tsis txhob muab kuv tso rau kuv cov yeebncuab, nyob tsam lawv muab tej lus dag thiab tej lus hem los tawmtsam kuv.

¹³Kuv paub tseeb hais tias kuv tau ua neej nyob saib ntsoov tus TSWV tes haujlwm zoo thaum tsis tau tas kuv simneej.

¹⁴Cia siab rau tus TSWV! Cia li ntseeg, tsis txhob poob siab. Cia siab rau tus TSWV nkaus xwb.