Read Hmong Daw Phau Ntawv Nkauj 30 Bible Online

Phau Ntawv Nkauj 30 - Hmong Daw bible

Phau Ntawv Nkauj 30

¹Tus TSWV, kuv ua koj tsaug rau qhov koj yog tus cawm kuv dim, thiab koj tsis pub kuv cov yeebncuab hnyos tau kuv.

²Tus TSWV, kuv tus Vajtswv, kuv quaj thov koj pab kuv, thiab koj tau kho kuv zoo hlo,

³koj tau coj kuv tawm hauv txojkev tuag los. Kuv twb taug txojkev mus rau hauv lub qhov uas tob kawg nkaus lawm, tiamsis koj rov pub txojsia tshiab rau kuv.

⁴Tagnrho nws haivneeg uas ncaj ncees cia li hu nkauj qhuas tus TSWV! Nej nco ntsoov nws lub npe uas yog tus Dawbhuv thiab ua nws tsaug mus li.

⁵Nws txojkev chim tsuas nyob ib pliag xwb, nws txojkev ua zoo nyob mus tsis paub kawg li. Thaum tsaus ntuj muaj kev quaj ntsuag, tiamsis thaum kaj ntug muaj kev zoo siab.

⁶Thaum kuv tau zoo nyob kaj siab kuv xav hais tias, “Kuv yuav tsis swb luag ib zaug li.”

⁷Tus TSWV, koj ua zoo kawg nkaus rau kuv, koj tsomkwm kuv ib yam li lub roob ruaj khov. Tiamsis thaum koj khiav nkaum kuv lawm ua rau kuv ntshai kawg li.

⁸Tus TSWV, kuv tsa ncauj hu koj, kuv thov koj pab kuv li no:

⁹“Yog kuv tuag lawm yuav muaj nqis dabtsi rau koj? Yog kuv mus rau hauv qhov tuag lawm muaj nqi rau koj los? Cov neeg tuag puas qhuas tau koj lawm? Lawv puas mus qhia tau koj txojkev zoo uas tsis txawj puastsuaj li?

¹⁰Tus TSWV, thov mloog kuv lub suab hu thiab hlub kuv! Tus TSWV, thov pab kuv!”

¹¹Koj muab kuv txojkev nyuaj siab hloov ua kev zoo siab dhia seevcev, koj muab kuv tej kev tu siab tshem mus povtseg huv tibsi lawm thiab pub kev zoo siab nyob puagncig kuv.

¹²Yog li ntawd, kuv thiaj tsis nyob ntsiag to; kuv yuav hu nkauj qhuas koj. Tus TSWV, koj yog kuv tus Vajtswv, kuv yuav ua koj tsaug mus ibtxhis.