Read Hmong Daw Phau Ntawv Nkauj 31 Bible Online

Phau Ntawv Nkauj 31 - Hmong Daw bible

Phau Ntawv Nkauj 31

¹Tus TSWV, kuv los cuag koj thov koj tsomkwm kuv, thov tsis txhob cia kuv swb luag hlo li. Kuv tsa ncauj thov koj, koj yog tus Vajtswv uas ncaj ncees, thov koj pab kom kuv dim!

²Thov mloog kuv lub suab thov! Pab kom kuv dim tamsim no! Thov koj ua kuv lub chaw cawm siav thiab tsomkwm kuv, koj yog tus tiv thaiv kuv thiab pab kuv dim.

³Koj yog kuv qhov chaw cawm siav thiab yog tus tiv thaiv kuv, thov qhia kuv thiab coj kuv txoj haukev raws li koj tau coglus tseg lawm.

⁴Thov pab kom kuv tsis txhob mus poob lub qhov uas luag khawb tos kuv kev, thov koj tsomkwm kuv tsis txhob pub kuv raug tej kev puastsuaj.

⁵Kuv thov muab kuv lub cev rau koj ua tus saib xyuas, Tus TSWV, koj yeej yuav pab kom kuv dim, koj yog tus Vajtswv uas ncaj ncees.

⁶Koj ntxub cov neeg uas pe tej vajtswv cuav, tiamsis kuv cia siab rau koj xwb.

⁷Kuv yuav txaus siab thiab zoo siab rau koj txojkev hlub uas ruaj kho. Koj pom kuv tej kev txomnyem, koj paub kuv tej kev ntxhov siab huv tibsi.

⁸Koj tsis pub kuv cov yeebncuab ntes tau kuv, koj pub kuv mus tau txhua qhov raws li kuv xav mus.

⁹Tus TSWV, thov koj hlub kuv, rau qhov kuv muaj kev ntxhov siab; kuv qhovmuag qhib tsis taus vim kuv quaj heev, kuv qaug zog zis tsis muaj ib lub zog li.

¹⁰Tej kev tu siab ua rau kuv tws kev tas li, thiab kev quaj ntsuag ua rau kuv txojsia luv kawg nkaus. Muaj tej kev nyuaj siab ntawd thiaj ua rau kuv tsaug muag ua luaj, txawm yog kuv tej pobtxha los tsis muaj zog tas li lawm.

¹¹Kuv tej yeebncuab txhua tus saib tsis taus kuv thiab kuv tej phoojywg zejzog, hajyam thuam thiab luag kuv plig, cov neeg uas yeej ibtxwm paub kuv los ntshai kuv, thaum lawv pom kuv nyob ntawm tej kev lawv lug kev khiav.

¹²Sawvdaws xam tsis muaj kuv, ib yam li kuv twb tuag lawm, kuv zoo ib yam li tej khoom uas luag muab povtseg lawm.

¹³Kuv hnov tej yeebncuab sib ntxhis zom zaws, tej kev txhawj ntshai nyob puagncig kuv. Lawv tuav tswvyim tawmtsam kuv, thiab ntxeev siab yuav muab kuv tua.

¹⁴Tus TSWV, koj yog kuv tus Vajtswv, kuv yeej cia siab ntsoov rau koj xwb,

¹⁵Koj niaj hnub tsomkwm kuv, thov cawm kom kuv dim ntawm kuv cov yeebncuab, thiab dim ntawm cov neeg uas tsimtxom kuv.

¹⁶Kuv yog koj tus tubtxib, thov koj ua zoo rau kuv, thov koj txojkev hlub uas tsis hloov li cawm kom kuv dim.

¹⁷Tus TSWV, kuv tsa ncauj hu koj, thov tsis txhob cia kuv poob ntsejmuag. Thov kom cov neeg siab phem poob ntsejmuag, thov kom lawv cia li mus ntsiag to rau hauv tubtuag teb.

¹⁸Thov koj muab cov neeg khavtheeb uas pheej thuam thiab tsis quavntsej tej neeg ncaj ncees lub qhovncauj pos kom nyob ntsiag to.

¹⁹Tej uas koj npaj tseg rau cov neeg hwm koj, mas zoo kawg nkaus li! Txhua leej txhua tus paub hais tias koj yog tus zoo kawg nkaus, koj tsomkwm cov neeg uas cia siab rau koj tsis pub ib tug ploj li.

²⁰Koj muab lawv zais rau ntawm koj lub xubntiag uas yog qhov chaw kaj siab lug, kom lawv dim ntawm cov neeg tuav hauv ua phem; koj muab lawv zais rau ntawm qhov chaw uas nyob tso siab plhuav tsis raug lawv cov yeebncuab txob thuam.

²¹Ua tus TSWV tsaug! Nws ua rau kuv pom txojkev hlub uas loj kawg nkaus, thaum uas cov yeebncuab tuaj vij kuv thiab puav ntes kuv.

²²Kuv ntshai thiab xav hais tias nws ntiab kuv tawm ntawm nws lub xubntiag mus lawm. Tiamsis nws tseem hnov kuv lub suab quaj, thaum kuv thov nws pab.

²³Txhua tus uas muab siab npuab tus TSWV cia li hwm nws. Tus TSWV tsomkwm cov neeg uas muab siab npuab nws, tiamsis nws rau txim rau cov neeg uas khavtheeb raws li lawv tsimnyog raug.

²⁴Nej cov uas cia siab rau tus TSWV, nej cia li cuab zog khov kho thiab ua siab tawv qhawv.