Read Hmong Daw Phau Ntawv Nkauj 32 Bible Online

Phau Ntawv Nkauj 32 - Hmong Daw bible

Phau Ntawv Nkauj 32

¹Cov neeg uas tau zoo nyob kaj siab lug yog cov uas tus TSWV tsis suav hais tias muaj txim rau qhov nws zam lawv lub txim lawm.

²Tus neeg uas tau zoo nyob kaj siab lug yog tus uas tus TSWV tsis suav hais tias nws tau ua txhaum thiab nws tsis ua neeg dag ntxias.

³Thaum kuv tsis lees kuv tej kev txhaum, kuv tsis muaj zog, rau qhov kuv quaj tas hnub.

⁴Tus TSWV, koj rau txim rau kuv nruab hnub hmo ntuj, kuv lub zog yaj ntshis ib yam li tej hws uas lub caij ntuj qhua tshav ntuj ziab qhuav lawm.

⁵Thaum ntawd kuv lees kuv tej kev txhaum rau koj, kuv tsis zais tej uas kuv ua txhaum ib qho li, kuv lees kuv tej kev txhaum huv tibsi rau koj, thiab koj zam tagnrho kuv tej kev txhaum huv tibsi mus.

⁶Yog li ntawd, thov cia cov neeg uas hwm koj thov koj thaum lawv xav kom koj pab lawv, thaum muaj kev txomnyem huam tuaj, tej ntawd yuav los tsis txog lawv.

⁷Koj yog kuv lub chaw nkaum, koj yuav cawm kuv kom dim ntawm txojkev puastsuaj. Kuv yuav hu nkauj nrov nrov qhuas koj txojkev cawm dim, rau qhov koj yog tus tsomkwm kuv.

⁸Tus TSWV hais tias, “Kuv yuav qhia txojkev uas koj yuav taug rau koj, kuv yuav qhia koj thiab ua koj tus tuavxam.

⁹Tsis txhob ruam ib yam li tus nees lossis tus nees zag uas yuav tsum muab hwm txee los looj thiab muab xauv sam nws qhovncauj thiaj cob tau.”

¹⁰Cov neeg siab phem yuav raug kev txomnyem, tiamsis tus TSWV txojkev hlub yuav tsomkwm cov neeg uas cia siab rau nws mus li.

¹¹Nej cov uas yog neeg ncaj ncees, cia li txaus siab thiab zoo siab, rau qhov tus TSWV tau pab nej lawm. Nej cov uas mloog nws lus, cia li qw zoo siab.