Read Hmong Daw Phau Ntawv Nkauj 33 Bible Online

Phau Ntawv Nkauj 33 - Hmong Daw bible

Phau Ntawv Nkauj 33

¹Nej txhua tus uas yog neeg ncaj ncees, nej cia li hu nkauj zoo siab rau tej uas tus TSWV twb ua rau nej los lawm. Nej cov uas hwm nws, cia li qhuas nws.

²Nej cia li ua tus TSWV tsaug nrog tej suab nkauj nogncas, nej cia li hu nkauj nrog tej suab nkauj nogncas uas muaj kaum txoj hlua ua nws tsaug.

³Hu nkauj tshiab qhuas nws, ntaus nkauj nogncas kom zoo thiab hu nkauj suab nkoov zim zoo siab.

⁴Tus TSWV tej lus yeej yog lus tseeb, thiab nws tej haujlwm puavleej yog tej uas sawvdaws cia siab tau.

⁵Tus TSWV nyiam kev ncaj ncees thiab qhov tseeb xwb, nws txojkev hlub nyob thoob plaws hauv ntiajteb no mus li.

⁶Thaum tus TSWV tsim nruab ntug, lub hnub, tsim lub hli thiab tej hnubqub, nws hais kom muaj ces txawm cia li muaj tuaj.

⁷Nws hais kom dej hiavtxwv sau los nyob ua ke, nws cais tej hiavtxwv tob nyob muaj chaw.

⁸Txhua yam hauv lub ntiajteb no, cia li paub ntshai tus TSWV! Txhua haivneeg uas nyob hauv qab ntuj no cia li hwm nws!

⁹Thaum nws hais, txawm cia li muaj lub ntiajteb no, nws hais xwb, txhua yam txawm cia li tshwmsim tuaj.

¹⁰Tus TSWV muab txhua haivneeg tej kev npaj siab rhuav huv tibsi lawm, nws ua rau lawv tso lawv tej kev npaj siab povtseg.

¹¹Tiamsis nws tes haujlwm nyob ruaj khov mus ibtxhis li, nws tej kev npaj siab yuav nyob mus tsis paub kawg.

¹²Haivneeg uas muaj Vajtswv ua lawv tus TSWV muaj kev kaj siab, cov neeg uas nws xaiv ua nws tug lawm, lawv tau zoo nyob kaj siab lug.

¹³Tus TSWV nyob saum ntuj saib tuaj, nws yeej pom neeg txhua tus huv tibsi.

¹⁴Nws nyob saum ntuj kav rawv, thiab saib ntsoov txhua tus uas nyob hauv ntiajteb no.

¹⁵Nws ua rau neeg muaj tswvyim xav, thiab nws paub txhua yam uas lawv ua.

¹⁶Tus vajntxwv uas yeej luag tsis yog vim nws muaj tubrog coob; tus tubrog uas yeej luag tsis yog vim nws lub zog nchav.

¹⁷Tej txiv nees uas caij mus ntaus rog pab tsis tau kom yeej luag, tej nees ntawd lub zog yeej cawm tsis tau kom dim.

¹⁸Tus TSWV yeej saib ntsoov txhua tus uas hwm nws, thiab cov uas cia siab rau nws txojkev hlub uas tsis hloov li,

¹⁹nws cawm lawv dim ntawm txojkev tuag. Nws cawm lawv txojsia thaum muaj kev tshaib plab.

²⁰Peb cia siab ntsoov rau tus TSWV, nws yog tus tsomkwm thiab yog tus pab peb.

²¹Peb zoo siab kawg rau qhov muaj nws, peb cia siab rau nws lub npe uas dawbhuv.

²²Tus TSWV, thov koj txojkev hlub nrog nraim peb mus li, ib yam li peb muab peb txojkev cia siab cog nkaus rau koj.