Read Hmong Daw Phau Ntawv Nkauj 34 Bible Online

Phau Ntawv Nkauj 34 - Hmong Daw bible

Phau Ntawv Nkauj 34

¹Kuv yuav niaj hnub ua tus TSWV tsaug, kuv yuav qhuas nws tsis tseg tsis tu.

²Kuv yuav qhuas nws rau tej haujlwm uas nws tau ua tas los lawm, thov kom txhua tus uas raug kev tsimtxom cia li mloog thiab zoo siab!

³Cia li nrog kuv piav tus TSWV lub hwjchim uas loj kawg nkaus, peb sawvdaws cia li tib txhij qhuas nws lub npe.

⁴Kuv thov tus TSWV, thiab nws teb kuv tej lus thov, nws cawm kuv dim ntawm tej kev txhawj ntshai huv tibsi lawm.

⁵Cov neeg uas raug tsimtxom tsa qhovmuag ntsia nws thiab lawv zoo siab kawg li, lawv yuav tsis plam tej uas lawv cia siab rau.

⁶Thaum cov neeg txomnyem thov nws pab, nws teb lawv tej lus thov; nws cawm lawv dim ntawm lawv tej kev ntxhov siab uas lawv raug.

⁷Tus TSWV tus timtswv zov rawv cov neeg uas hwm tus TSWV, thiab nws cawm lawv dim ntawm tej kev puastsuaj.

⁸Nej sim xav saib tus TSWV ua zoo npaum li cas rau nej lawm. Cov neeg uas los nrhiav chaw nkaum ntawm tus Tswv, lawv tau zoo nyob kaj siab lug.

⁹Tus TSWV haivneeg txhua tus cia li hwm nws; cov neeg uas mloog tus TSWV lus yeej tsis tu ncua ib yam dabtsi li.

¹⁰Txawm yog tsov ntxhuav los tseem tshaib plab thiab tu pluas tsis muaj noj, tiamsis cov neeg uas hwm tus TSWV yuav muaj txhua yam zoo uas lawv xav tau.

¹¹Kuv tej tubki, nej cia li los ntawm no thiab mloog kuv hais, kuv yuav qhia kom nej paub ua lub neej hwm tus TSWV.

¹²Nej puas xav tau lub neej lomzem kaj siab lug? Nej puas ntshaw txojsia ntev thiab lub neej kaj siab lug?

¹³Nej cia li tseg tsis txhob hais tej lus phem thiab tsis txhob hais lus dag li.

¹⁴Tso pluav tej kev ua phem tseg thiab tig los ua txoj zoo, cia li nrhiav kev nrog luag sib haumxeeb kom kawg nej lub siab.

¹⁵Tus TSWV saib ntsoov cov neeg ncaj ncees thiab mloog lawv tej suab quaj,

¹⁶tiamsis nws tawmtsam cov neeg ua phem, thaum lawv tuag thiaj tsis muaj neeg nco txog lawv li.

¹⁷Thaum cov neeg ncaj ncees thov tus TSWV, nws mloog lawv tej lus thov, nws cawm lawv dim ntawm lawv tej kev ntxhov siab.

¹⁸Tus TSWV nyob ze cov neeg uas tas kev cia siab, nws cawm cov neeg uas tsis muaj chaw vamkhom.

¹⁹Tus neeg ncaj ncees tiv ntau yam kev nyuaj siab, tiamsis tus TSWV cawm nws dim tej kev ntxhov siab ntawd huv tibsi.

²⁰Tus TSWV tsomkwm nws nraim tsis tso nws tseg, nws tej txha yeej tsis muaj ib yag yuav lov li.

²¹Tej kev phem yuav ua rau cov neeg siab phem tuag mus, cov uas ntxub cov neeg ncaj ncees yuav raug txim.

²²Tus TSWV yuav cawm nws haivneeg, cov uas los cuag tus TSWV thiab thov nws tsomkwm lawv yuav tsis raug kev puastsuaj.