Read Hmong Daw Phau Ntawv Nkauj 39 Bible Online

Phau Ntawv Nkauj 39 - Hmong Daw bible

Phau Ntawv Nkauj 39

¹Kuv hais tias, “Kuv yuav ceevfaj rau tej uas kuv ua thiab tsis pub kuv tus nplaig hais tej lus uas txhaum, kuv yuav tsis hais ib yam dabtsi thaum cov neeg siab phem nyob ze kuv.”

²Kuv nyob twjywm xwb, tsis hais ib lo lus li, txawm yog tej lus zoo los kuv tsis hais. Tiamsis kuv tej kev txomnyem nthuav loj heev tuaj li lawm,

³thiab ua rau kuv ntxhov siab kawg li. Kuv yimhuab xav ntau, mas kuv yimhuab ntxhov siab. Kuv thiaj nug hais tias:

⁴“Tus TSWV, kuv yuav ua neej nyob ntev li cas? Thaum twg kuv mam li tuag? Thov qhia rau kuv paub saib tshuav ntev li cas kuv txojsia mam li tu.”

⁵Koj pub txojsia rau kuv ua neej nyob luv kawg li. Kuv txojsia tsis muaj nqis dabtsi rau koj. Txhua tus neeg txojsia zoo ib yam li nthwv cua ntsawj ib vuag xwb,

⁶thiab zoo ib li tus duab ntxoov ntxoo uas nyob ib pliag xwb, txhua yam uas nws ua tsis tseemceeb dabtsi li, nws khaws tej nyiaj txiag tseg, tiamsis tsis paub hais tias leejtwg yog tus yuav tau.

⁷Tus TSWV, nimno kuv yuav cia siab rau dabtsi? Kuv cia siab rau koj nkaus xwb.

⁸Thov cawm kom kuv dim ntawm kuv tej kev txhaum, thov tsis txhob cia cov neeg ruam luag kuv plig thiab ua saib tsis taus kuv.

⁹Kuv yuav nyob twjywm, thiab tsis hais lus li, rau qhov koj yog tus uas ua rau kuv raug tej kev txomnyem no.

¹⁰Thov txhob nplawm kuv ntxiv lawm, thaum koj nplawm kuv, kuv twb yuav luag tuag.

¹¹Qhov uas koj nplawm thiab qhuab ntuas neeg, twb yog koj rau txim rau lawv tej kev txhaum, thiab koj rhuav lawv tej nyiaj txiag ib yam li ntsaum kabrwg noj. Txhua tus neeg yeej zoo ib yam li nthwv cua uas ntsawj ib vuag xwb.

¹²Tus TSWV, thov koj mloog kuv tej lus thov, thiab hnov kuv lub suab quaj hu koj, thov los cawm kuv thaum kuv tabtom quaj los kua muag no. Kuv tsuas zoo ib li yam tus qhua uas nrog koj nyob ib pliag li thaum kuv tej yawgkoob thiab xwb.

¹³Thov koj tso kuv tseg kom kuv muaj kev kaj siab mentsis, ua ntej kuv tuag mus thiab tsis muaj kuv lawm tso.