Read Hmong Daw Phau Ntawv Nkauj 40 Bible Online

Phau Ntawv Nkauj 40 - Hmong Daw bible

Phau Ntawv Nkauj 40

¹Kuv ua siab ntev tos tus TSWV los pab kuv, nws mloog kuv tej lus thov thiab hnov kuv lub suab quaj.

²Nws rub kuv tawm hauv lub qhov uas yog txojkev puastsuaj, thiab rub kuv tawm hauv lub qhov tuag uas yog cov suabzeb. Nws tsaws kuv mus tso rau saum lub pobzeb uas nyob kaj siab lug, thiab ua rau kuv muaj chaw nyob ruaj khov.

³Nws qhia kuv hu ib zaj nkauj tshiab, yog zaj nkauj uas hu qhuas peb tus Vajtswv. Txhua tus uas pom yuav ntshai thiab yuav cia siab rau tus TSWV.

⁴Txhua tus uas cia siab rau tus TSWV muaj kev kaj siab, lawv yog cov uas tsis mus pe mlom lossis yog cov uas tsis koom nrog cov uas pehawm tej vajtswv cuav.

⁵Tus TSWV, peb tus Vajtswv, koj tau ua ntau yam txujci pab peb los lawm; yeej tsis muaj ib tug zoo li koj! Koj npaj ntau yam zoo rau peb. Kuv yeej piav tsis tau tej ntawd, rau qhov tej ntawd muaj ntau heev.

⁶Koj tsis xav tau tej tsiaj uas tua theej txhoj thiab tej khoom fij, koj tsis tau hais kom muab tsiaj tua hlawv tagnrho rau saum lub thaj lossis kom muab tsiaj tua hlawv fij daws kev txhaum. Tiamsis koj qhib kuv lub qhovntsej mloog koj tej lus,

⁷yog li ntawd, kuv thiaj teb hais tias, “Kuv nyob ntawm no, koj tej lus qhia kuv nyob rau hauv phau ntawv Kevcai.

⁸Kuv tus Vajtswv, kuv yeej txaus siab ua zoo kom haum koj siab. Kuv yuav khaws koj tej lus qhia rau hauv kuv lub siab mus li.”

⁹Tus TSWV, thaum koj haivneeg tuaj sib sau ua ke, kuv yuav qhia txojmoo zoo uas yog koj txojkev cawm peb rau lawv mloog. Koj paub hais tias kuv qhia zaj no tsis tseg li.

¹⁰Kuv tsis tau muab txojmoo zoo uas yog txojkev cawm dim npog cia thiab cia kuv ib leeg paub xwb, kuv qhia koj txojkev ncaj ncees thiab kev cawm dim tsis tseg li. Kuv tsis tau muab koj tej lus zoo thiab kev hlub uas nyob mus ibtxhis npog cia tsis qhia rau koj haivneeg uas tuaj txoos ua ke no li.

¹¹Tus TSWV, kuv paub hais tias koj yeej hlub kuv tsis tso kuv tseg li. Koj txojkev hlub thiab kev ncaj ncees yuav cawm kom kuv dim.

¹²Muaj kev txomnyem nyob ibncig kuv suav tsis txheeb li! Kuv tej kev txhaum rov raug kuv thiab ua rau kuv qhovmuag tsis pom kev lawm, tej kev txhaum ntawd tseem ntau tshaj cov plaubhau saum kuv taubhau, thiab ua rau kuv tas kev cia siab li lawm.

¹³Tus TSWV, thov cawm kuv, cia li pab kuv tamsim no.

¹⁴Thov kom cov neeg uas nrhiav kuv tua, cia li swb thiab tsis sib haum. Thov kom cov neeg uas zoo siab thaum kuv raug kev txomnyem, raug txajmuag thiab tig khiav rov qab.

¹⁵Thov kom cov neeg uas luag kuv plig cia li swb thiab ntshai tshee hnyo.

¹⁶Thov kom txhua tus uas los cuag koj tau kev zoo siab thiab kaj siab lug. Thov kom txhua tus uas tabtom ua tsaug rau koj txojkev cawm dim cia li hais tias, “Tus TSWV yog tus uas muaj hwjchim loj kawg nkaus.”

¹⁷Tus TSWV, kuv qaug zog thiab txomnyem kawg li, tiamsis koj tseem nco ntsoov kuv thiab. Koj yog kuv tus cawmseej thiab yog kuv tus Vajtswv thov koj maj nroos los pab kuv!