Read Hmong Daw Phau Ntawv Nkauj 41 Bible Online

Phau Ntawv Nkauj 41 - Hmong Daw bible

Phau Ntawv Nkauj 41

¹Cov uas mob siab cov neeg pluag yog cov uas tau kev kaj siab lug, tus TSWV yuav pab lawv thaum lawv raug kev txomnyem.

²Tus TSWV yuav tiv thaiv lawv thiab tsomkwm kom lawv muaj sia nyob, nws yuav pub kom lawv tau zoo nyob kaj siab hauv lawv lub tebchaws, nws yuav tsis muab lawv tso rau lawv cov yeebncuab.

³Tus TSWV yuav pab lawv thaum lawv raug mob raug nkeeg thiab yuav kho lawv tej mob kom zoo, lawv thiaj rov muaj zog tuaj.

⁴Kuv hais tias, “Tus TSWV, kuv ua txhaum loj kawg nkaus rau koj, thov koj hlub kuv thiab pab kho kom kuv zoo!”

⁵Kuv cov yeebncuab hais tej lus phem kawg li rau kuv. Lawv xav kom kuv tuag thiab xav kom kuv ploj ntais mus.

⁶Cov neeg uas tuaj pom kuv yog cov uas siab tsis ncaj, thaum lawv tawm mus lawv coj kuv lub moo mus xyav tsis zoo, lawv coj kuv lub moo mus xyav rau txhua txhia qhov.

⁷Tagnrho cov neeg uas ntxub kuv, ib leeg ntxhi rau ib leeg hais txog kuv, lawv xav ua tej yam phem rau kuv.

⁸Lawv hais tias, “Nws tabtom raug mob hnyav kawg nkaus, nws yuav tsis sawv saum nws lub txaj los ib zaug ntxiv li lawm.”

⁹Txawm yog kuv tus phoojywg zoo uas kuv ntseeg siab tshaj plaws, thiab tus uas nrog kuv noj mov ua ke los tseem ntxeev siab rau kuv lawm thiab.

¹⁰Tus TSWV, thov hlub kuv thiab txhawb kom kuv muaj zog tuaj, thiab kuv yuav rov ua pauj rau kuv cov yeebncuab.

¹¹Lawv yuav tsis yeej kuv ib zaug li lawm, thiab kuv yuav paub hais tias koj yeej txaus siab rau kuv tiag.

¹²Koj yuav pab kuv, rau qhov kuv yeej ua ncaj ua ncees, thiab koj yuav puag rawv kuv rau hauv koj lub xubntiag mus ibtxhis li.

¹³Cia li qhuas tus TSWV uas yog cov Yixalayees tus Vajtswv! Nimno cia li qhuas nws thiab qhuas mus ibtxhis tsis kawg li! Amees! Amees!