Read Hmong Daw Phau Ntawv Nkauj 42 Bible Online

Phau Ntawv Nkauj 42 - Hmong Daw bible

Phau Ntawv Nkauj 42

¹Vajtswv, kuv kub siab lug nrhiav koj ib yam li tus muaslwj nrhiav tus dej ntws txias zias vim nws nqhis dej heev.

²Vajtswv tus uas muaj sia nyob, kuv lub siab xav nyob ze koj. Thaum twg kuv thiaj li tau mus pehawm koj nyob tim ntsej tim muag?

³Kuv quaj tas hnub tas hmo, kuv tej kua muag yog kuv cov mov noj, kuv cov yeebncuab niaj hnub nug kuv hais tias, “Koj tus Vajtswv nyob qhov twg?”

⁴Thaum uas kuv xav txog lub neej yav dhau los, kuv tu siab kawg; thaum kuv nrog cov neeg coob coob mus rau hauv Vajtswv lub tsev, thiab kuv coj lawv mus tsheej pab hu nkauj zoo siab thiab qw qhuas Vajtswv.

⁵Vim li cas kuv muaj kev nyuaj siab ua luaj? Vim li cas kuv yuav raug kev txomnyem ua luaj li? Kuv yuav muab kuv txojkev cia siab tso plhuav rau Vajtswv, thiab kuv yuav rov qhuas nws dua ib zaug ntxiv, nws yog kuv tus cawmseej thiab yog kuv tus Vajtswv.

⁶Kuv poob tebchaws tuaj nyob ntawm no ua lub neej lwj siab ntsuav, kuv thiaj nco txog Vajtswv. Nws cia kev nyuaj siab los raug kuv ib yam li dej hiavtxwv ntas tej niag twv tuaj nyab kuv, thiab ib yam li dej tsaws tsag saum lub Roob Helemoos thiab lub Roob Mixales los rau ntawm tus dej Yauladees.

⁸Thaum nruab hnub thov tus TSWV qhia nws txojkev hlub uas nyob mus li rau kuv; thaum tsaus ntuj kuv thiaj tau hu nkauj ua nws tsaug, kuv thov Vajtswv uas yog tus tuav kuv txojsia.

⁹Kuv hais rau Vajtswv uas yog tus tiv thaiv kuv tias, “Vim li cas koj tsis nco qab kuv lawm? Vim li cas kuv yuav tau tiv kuv cov yeebncuab txojkev tsimtxom?”

¹⁰Lawv thuam kuv, ua rau kuv siab ntsws lwj tas, vim lawv nug kuv tsis tseg hais tias, “Koj tus Vajtswv nyob qhov twg?”

¹¹Vim li cas kuv nyuaj siab ua luaj? Vim li cas kuv yuav raug kev txomnyem ua luaj li? Kuv yuav tso siab pluav rau Vajtswv, thiab kuv yuav rov qhuas nws dua, nws yog kuv tus cawmseej thiab yog kuv tus Vajtswv.