Read Hmong Daw Phau Ntawv Nkauj 44 Bible Online

Phau Ntawv Nkauj 44 - Hmong Daw bible

Phau Ntawv Nkauj 44

¹Vajtswv, peb tej qhovntsej yeej hnov ntsoov zaj no, peb cov yawgkoob yeej los ibtxwm piav zaj no qhia rau peb hais txog tej txujci tseemceeb uas koj tau ua rau lawv tiam ntawd, ntau xyoo los lawm li no:

²koj muab cov neeg nruj tsiv ntiab khiav tawm, thiab cia koj haivneeg los nyob hauv lawv lub tebchaws, koj rau txim rau luag lwm haivneeg thiab cia koj haivneeg nyob kaj siab lug.

³Koj haivneeg ntaus yeej lub tebchaws ntawd tsis yog vim lawv tej ntaj thiab lawv lub hwjchim; tiamsis yog koj lub hwjchim thiab koj lub zog ua rau lawv yeej, thiab koj txaus siab rau lawv, vim koj hlub lawv.

⁴Koj yog kuv tus vajntxwv thiab yog kuv tus Vajtswv, koj pub rau koj haivneeg muaj yeej,

⁵twb yog muaj koj lub hwjchim peb thiaj yeej peb cov yeebncuab.

⁶Kuv tsis cia siab rau kuv rab hneevnti lossis kuv rab ntaj hais tias nws yuav cawm tau kuv dim,

⁷tiamsis twb yog koj cawm peb dim ntawm peb cov yeebncuab peb thiaj yeej cov neeg uas pheej ntxub peb.

⁸Peb yuav niaj hnub qhuas koj, thiab ua koj tsaug mus ibtxhis li.

⁹Tiamsis nimno koj tso peb tseg thiab cia peb swb luag, koj tsis nrog peb cov tubrog mus ntaus rog li lawm.

¹⁰Koj ua rau peb khiav ntawm peb cov yeebncuab rov qab, thiab txhua yam uas yog peb tug luag muab huab mus lawm dulug.

¹¹Koj cia luag muab peb hlais ib yam li hlais tej yaj, koj muab peb faib mus nyob thoob plaws rau txhua lub tebchaws.

¹²Koj muab koj haivneeg muag ua nqi pheej yig heev, zoo li lawv tsis muaj nqis li.

¹³Peb tej neeg zejzog pom tej uas koj ua rau peb ntawd, lawv saib tsis taus peb thiab luag peb plig.

¹⁴Koj muab peb ua ib zaj kwv huam rau luag pejkum tebchaws hais, lawv thiaj co hau nto thiab saib tsis taus peb li.

¹⁵Kuv poob ntsejmuag kawg nkaus, kuv txajmuag kawg li,

¹⁶thaum kuv hnov kuv cov yeebncuab thiab cov neeg uas ntxub kuv tej lus cem thiab thuam kuv.

¹⁷Thaum tej ntawd los raug peb los peb tseem nco ntsoov koj, lossis tsis tso koj tej lus cog tseg uas koj muab cob rau peb lawm.

¹⁸Peb tsis tau ua saib tsis tau koj, peb tsis tau tawv nyom koj tej lus samhwm.

¹⁹Koj tsis pab peb thiab muab peb tso rau pab tsiaj qus, koj muab peb tso povtseg rau hauv lub qhov uas tob tsaus ntuj nti.

²⁰Yog peb tso tseg tsis pehawm peb tus Vajtswv; thiab mus pe lwm haivneeg tej vajtswv

²¹los Vajtswv yeej yuav paub tej no, rau qhov Vajtswv paub tej uas peb lub siab xav huv tibsi.

²²Tiamsis vim peb ntseeg koj luag thiaj pheej tua peb, luag ua rau peb ib yam li tus yaj uas luag coj mus tua.

²³Tus TSWV, thov koj cia li sawv! Vim li cas koj tsaug zog? Koj cia li sawv! Thov tsis txhob tso peb tseg mus ibtxhis!

²⁴Vim li cas koj khiav nkaum peb? Thiab koj txawm tsis nco txog peb tej kev txomnyem thiab kev nyuaj siab li!

²⁵Peb ntog puastsuaj tas rau hauv av, peb pw txajmuag ntsuav rau saum cov hmoov av,

²⁶Thov koj cia li los pab peb! Rau qhov koj txojkev hlub uas nyob mus ibtxhis yog qhov cawm tau peb dim!