Read Hmong Daw Phau Ntawv Nkauj 45 Bible Online

Phau Ntawv Nkauj 45 - Hmong Daw bible

Phau Ntawv Nkauj 45

¹Kuv lub siab puv npo tej lus zoo, thaum kuv sau zaj nkauj no rau vajntxwv. Kuv tus nplaig npaj rawv hais tej lus sib dhos, ib yam li tus uas txawj txawj sau ntawv tus cwjmem.

²Koj yog tus uas zoo nraug tshaj plaws tej txivneej huv tibsi, thiab koj hais lus npliag lias xwb. Vajtswv yeej foom koob hmoov rau koj mus ibtxhis li.

³Tus vajntxwv uas muaj hwjchim, cia li ris koj rab ntaj rau ntawm duav; koj yog tus muaj hwjchim thiab muaj koob meej.

⁴Cia li caij nees mus li tus uas muaj hwjchim thiab muaj yeej thiaj yuav tiv tau txojkev tseeb thiab kev ncaj ncees, koj lub zog nchav yuav ua rau koj muaj yeej loj kawg nkaus.

⁵Koj tej xubvos ntse zuag plias, tej xubvos ntawd yuav chob koj cov yeebncuab lub plawv; ntau haivneeg yuav ntog pawglug ntawm koj kotaw.

⁶Lub zwmtxwv uas Vajtswv muab rau koj, yuav nyob mus ibtxhis li. Koj yuav kav koj haivneeg mus rau txojkev ncaj ncees.

⁷Koj nyiam kev ncaj ncees thiab ntxub kev ua phem ua qias. Vim li no tus TSWV uas yog koj tus Vajtswv, thiaj xaiv koj thiab pub kev zoo siab rau koj ntau tshaj lwm tus vajntxwv huv tibsi.

⁸Muab tej tshuaj tsw qab mules thiab alau-es pleev koj tej ris tsho tsw qab ntxiag hauv koj lub loog uas muaj kaus ntxhw teeb kom zoo nkauj, muaj cov ntaus nkauj nogncas rau koj zoo siab.

⁹Cov pojniam uas nyob hauv koj lub tsev, muaj ibtxhia yog tej vajntxwv cov ntxhais, thiab niam vajntxwv coj tej saw kub uas zoo kawg nkaus sawv ntawm koj lub zwmtxwv sab xis.

¹⁰Vajntxwv tus nkauj nyab, cia li mloog tej lus uas kuv hais, tso plhuav koj haivneeg thiab koj cov neejtsa tseg tsis txhob nco.

¹¹Qhov uas koj zoo nkauj yuav ua rau vajntxwv txaus siab heev, nws yog koj tus tswv, koj yuav tsum hwm nws.

¹²Cov neeg uas nyob pem lub nroog Tiles yuav nqa khoom tuaj pub rau koj, cov neeg npluanuj yuav tuaj nrog koj sib raug zoo.

¹³Vajntxwv tus ntxhais uas nyob hauv lub loog zoo nkauj kawg nkaus li! Muab tej xov kub uas tawg paj nraug zees los xaws nws lub tsho.

¹⁴Nws hnav lub tsho txaij nraug zees ua ntej loo mus cuag vajntxwv, cov niam txais ntsuab ua ke kaj niab raws nws qab, thiab lawv puavleej yog cov uas mus cuag vajntxwv.

¹⁵Lawv muaj kev lomzem zoo siab kawg mus rau hauv vajntxwv lub loog.

¹⁶Kuv tus vajntxwv, koj yuav muaj tub coob, los ua vajntxwv hloov koj cov yawgkoob, thiab koj yuav tsa lawv los kav tagnrho lub ntiajteb no.

¹⁷Kuv zaj nkauj yuav ua rau koj lub koob meej nto moo lug mus ibtxhis, thiab txhua tus yuav qhuas koj mus tas tiam neej.